அவள் விருதுகள்: `திருமணத்துக்குப் பின் நடிக்க கணவர் அனுமதிக்கணும்' - பிரியங்கா மோகன்|#Visual story

இ.நிவேதா & ஆ.சாந்தி கணேஷ்

அவள் விருதுகளின் தொடர்ச்சி...

நடனக் கலைஞர் மற்றும் இயக்குநர், பாடகர், இசையமைப்பாளர், ஆசிரியர், எழுத்தாளர் எனப் பன்முகங்கள்கொண்ட, பத்மஸ்ரீ பத்மா சுப்ரமண்யத்துக்கு `தமிழன்னை விருது’ வழங்கினார், தெலங்கானா ஆளுநரும் புதுச்சேரி துணைநிலை ஆளுநருமான டாக்டர் தமிழிசை செளந்தரராஜன். 

பத்மா சுப்ரமண்யம் - தமிழிசை செளந்தரராஜன்.

``எங்கள் நடனப் பள்ளியில் மீனவர் மகள், கொத்தனார் மகள், நாடோடி இனத்தைச் சேர்ந்தவரின் மகள் என, பொருளாதாரத்தில் பின்தங்கிய குழந்தைகளும், நடனம் பயிலுகிறார்கள். நடனம் எலைட் மக்களுக்கானது மட்டுமே அல்ல’’ என்றார் பத்மா சுப்ரமண்யம். 

நடனம்

பாலியல் தொழிலில் ஈடுபடுத்துவதற்காக, வெளிநாடுகளில் வீட்டு வேலை பார்ப்பதற்காக கடத்தப்பட்ட, விற்பனை செய்யப்பட்ட பெண்களையும் குழந்தைகளையும் மீட்டுக்கொண்டிருக்கும் கன்யா பாபுவுக்கு `செயல் புயல்’ விருது வழங்கினார், `ஜெய் பீம்’ பட இயக்குநர் ஞானவேல்.

கன்யா பாபு - இயக்குநர் ஞானவேல்.

விருதைப் பெற்றுக்கொண்ட கன்யா, ``குழந்தைகளுக்குப் பிச்சையிடாதீர்கள். சாப்பிடக் கொடுங்கள் போதும். நீங்கள் அக்குழந்தைகளுக்குப் பிச்சையிட்டால், அவர்களுக்குப் பின்னால் இருக்கிற கறுப்பு உலகம்தான் கொழுத்து வளரும்’’ என்று எச்சரித்தார்.

வெள்ளித்திரையில் மிளிர்ந்து கொண்டிருக்கும் பிரியங்கா மோகனுக்கு `யூத் ஸ்டார்’ விருது வழங்கினர் நடிகர் விஷ்ணு விஷால் மற்றும் `கட்டா குஸ்தி’ திரைப்பட இயக்குநர் செல்லா அய்யாவு ஆகியோர். 

பிரியங்கா மோகன் - விஷ்ணு விஷால்.

வருங்கால கணவர் பற்றிய கேள்விக்கு பதிலளித்த பிரியங்கா, ``என்னோட வருங்கால கணவர் நம்பிக்கைக்குரியவராக, பெண்களுக்கு மரியாதை அளிப்பவராக, என் புரொஃபஷனின் வேல்யூ தெரிந்து திருமணத்துக்குப் பின், என்னை நடிக்க அனுமதிப்பவராக இருக்க வேண்டும்’’ என்றார்.

ப்ரியங்கா மோகன்

மதுரையிலிருந்தும் திருச்சியிலிருந்தும் ஒலிம்பிக் கனவுகளுடன் தடகளத்தில் தடதடத்துக் கொண்டிருக்கும் ரேவதிக்கும் சுபாவுக்கும் `சிங்கப் பெண்’ விருது வழங்கினார் ஓய்வுபெற்ற இந்திய விளையாட்டு வீராங்கனை ஷைனி வில்சன்.

ரேவதி - சுபா - ஷைனி வில்சன்

அவர் பேசுகையில், ``நான் கல்யாணமான ஒரு வாரத்துல தடகளத்துல தங்கம் வாங்கினேன். குழந்தை பிறந்து 3 மாசத்துக்குப் பிறகுதான் ஏஷியன் சாம்பியன் ஆனேன்’’ என்றவர், ரேவதி மற்றும் சுபாவிடம், ``அடுத்த ஒலிம்பிக்ல ஃபைனலுக்காவது வரணும்’’ என்று உற்சாகப்படுத்தினார். 

ரேவதி - சுபா

தொடர்ந்து சுற்றுச்சூழல் போராளி சாந்தலா ரமேஷுக்கும் `இளம் நம்பிக்கை’ விருது வழங்கி வாழ்த்தினார் ஷைனி வில்சன். 

சாந்தலா ரமேஷ் - ஷைனி வில்சன்.

சாந்தலா பேசுகையில், ``இந்த ஆற்றில் ஏன் இப்போ தண்ணியில்லங்கிற கேள்வியில்தான் என்னோட இந்தப் பயணம் ஆரம்பிச்சது. வெப்பமயமாதல் காரணமா உலகம் அழியுது; அதைத் தடுக்க உலகத் தலைவர்கள் எந்த முயற்சியும் எடுக்கலனு அவர்களைத் திட்டுறதை விட்டுட்டு, பொறுப்பை இளைஞர்கள் கையில எடுக்கணும்’’ என்றார் அழுத்தமாக.  

சாந்தலா