நந்தினி.ரா
தமிழ் சினிமாவில் மனோபாலா காமெடி நடிகர், குணச்சித்திர நடிகர், இயக்குநர், தயாரிப்பாளர் எனப் பன்முகத் தன்மை கொண்டவர். அவர் இன்று உடல்நலக்குறைவால் காலமானார். அவர் குறித்த ஒரு சிறப்புத் தொகுப்பு இங்கே...
சிறுவயது முதலே சினிமா மீது தீராக் காதல் கொண்ட மனோபாலா முதலில் இயக்குநர் பாரதிராஜாவிடம் 'புதிய வார்ப்புகள்' படத்தில் உதவி இயக்குநராக பணியாற்றியிருக்கிறார்.
உதவி இயக்குநராக தனது சினிமா வாழ்க்கையைத் தொடங்கிய அவர், 'நிழல்கள்', 'அலைகள் ஓய்வதில்லை' உள்ளிட்ட பல படங்களில் பணியாற்றியுள்ளார்.
பின் கார்த்திக், சுஹாசினி நடித்த ‘ஆகாய கங்கை’ மூலம் இயக்குநராக அறிமுகமானவர் பல வெற்றி படங்களைக் கொடுத்திருக்கிறார்.
1987-ம் ஆண்டு ரஜினியை வைத்து 'ஊர்க்காவலன்' என்ற சூப்பர் ஹிட் படத்தைக் கொடுத்தவர் இயக்குநர் மனோபாலா.
அதேபோல் 'சதுரங்க வேட்டை' படத்தைத் தயாரித்து இயக்குநர் H. வினோத்தைத் திரையுலகிற்கு அறிமுகம் செய்தவர் நடிகர் மனோ பாலாதான்.
700 க்கும் மேற்பட்ட படங்களில் பல்வேறு வேடங்களில் நடித்த இவர், இதுவரை 40 படங்களை இயக்கி உள்ளார். அதோடு 16 தொலைக்காட்சி தொடர்களையும் இயக்கி இருக்கிறார்.
கல்லீரல் பாதிப்பால் கடந்த 15 நாள்களாக சிகிச்சை பெற்றுவந்த மனோபாலா, இன்று சிகிச்சை பலனின்றி எல்.வி.பிரசாத் சாலையில் உள்ள அவரது வீட்டில் உயிர் இழந்திருக்கிறார்.
திரையுலகில் பெரும் சோகத்தை ஏற்படுத்திய அவரது மறைவுக்கு சினிமா பிரபலங்கள், அரசியல் தலைவர்கள் எனப் பலரும் இரங்கல் தெரிவித்து வருகின்றனர்.