வெளியிடப்பட்ட நேரம்: 12:08 (07/01/2016)

கடைசி தொடர்பு:12:33 (07/01/2016)

இது திருநங்கைகளின் சிக்ஸ்பேக் ஹிட்..!

இந்தியாவின் முதன்முறையாக, திருநங்கைகளின் இசைக்குழு ஒன்று துவங்கப்பட்டு யூ-டியூபில் அது பெரும் வரவேற்பைப் பெற்றிருக்கிறது. பாலிவுட்டின் முன்னணி தயாரிப்பு நிறுவனமான யாஷ்ராஜ் பிலிம்ஸ் இந்த முயற்சியை முன்னெடுத்து, ஹிஜ்ரா என்னும் சமூகத்தில் இருந்து, 6 திருநங்கைகளை ஒன்றிணைத்து, சிக்ஸ்பேக் பேண்ட் என்ற பெயரில் இசைக்குழுவைத் தொடங்கியிருக்கிறது. இந்தியாவின் முதல் திருநங்கைகள் இசைக்குழுவான இதற்கு, துணையாக இருப்பவர்கள் பாலிவுட்டின் முன்னணி பாடகர் சோனு நிகாம் மற்றும் அனுஷ்கா ஷர்மா.

“நான் ஒரு பிரபலமான பாடகராக ஆனது முதலே, இவர்களுக்கு ஏதாவது செய்ய வேண்டும் என நினைத்திருக்கிறேன். இவர்களை சினிமா செட்களில் நிறைய முறை பார்த்து மகிழ்ச்சி அடைந்திருக்கிறேன். மிகவும் அப்பாவிகளாக , குழந்தைத்தனமாக இருப்பார்கள். அதனாலேயே இவர்களை மிகவும் பிடிக்கும். நான் ஒரு வேளை, இந்தச் சமூகத்தில் இப்படிப் பிறந்திருந்தால், இந்த உலகம் என்னை எப்படிப் பார்க்கும்? என நினைத்து வருந்தியிருக்கிறேன். நாம் அவர்களுக்கு சரியான, தகுதியான பணிகளையோ, மரியாதையான தொழில்களை அவர்களை செய்யவோ விடுவதில்லை. அதனால்தான் சராசரியான இடங்களில் இவர்களை நாம் பார்க்கவே முடிவதில்லை. இப்படி திறமையான சிலருக்கு வாய்ப்பு அளிக்க வேண்டும் என்பதால்தான் இந்த முயற்சி” என்கிறார் சோனு நிகாம்.

“இந்த உலகத்தில் பிறந்த அனைவருக்கும், சம உரிமையும், மரியாதையும் கிடைக்க வேண்டும் என்பதே எனது விருப்பம். அப்படி இவர்களுக்கு அங்கீகாரம் கிடைக்கவும்,இவர்கள் பற்றிய எண்ணங்களை உடைக்கவும், இந்த முயற்சி உதவியாக இருக்கும் என நினைக்கிறேன். எங்கெல்லாம், வார்த்தைகள் தோற்கிறதோ, அங்கு இசைதான் பேசும்” என தம்ப்ஸ் அப் காட்டுகிறார் அனுஷ்கா ஷர்மா.

மொத்தம் 6 பாடல்களை, இந்த இசைக்குழு மூலம், ஆல்பமாக உருவாக்கத் திட்டமிட்டுள்ளனர். அவற்றில்  முதல் பாடலாக, உலக அளவில் ஹிட் ஆன, பேரல் வில்லியம்ஸின் “ஹேப்பி” பாடலை மையமாக வைத்து, “ஹம் ஹைன் ஹேப்பி” என்ற பெயரில் முதல் வீடியோவை  வெளியிட்டிருக்கின்றனர். அனுஷ்கா ஷர்மாவின் குரலோடு வீடியோ தொடங்குகிறது. “மகிழ்ச்சியாக இருப்போம்” என தீம் கொண்டுள்ள, இந்த பாடலுக்கு யூ-டியூபில் ஷொட்டுகள் கொட்டுகின்றன. அடுத்த பாடலை ஜனவரி 26 ல் வெளியிடத் திட்டமாம். இந்தப் பாடல்களுக்கு இசையமைப்பது, ஷமீர் டண்டன்.

வெல்கம் வெல்கம்..!  

ஞா.சுதாகர்.

வீடியோவிற்கு:

 

நீங்க எப்படி பீல் பண்றீங்க


டிரெண்டிங் @ விகடன்