பாலிவுட்டில் பலப் படங்களுக்கு பாய்காட் பிரசாரம் மூலம் எதிர்ப்பு தெரிவித்து வந்த நெட்டிசன்கள், தற்போது 'பதான்' படத்துக்கும் பாய்காட் மூலம் எதிர்ப்பைத் தெரிவித்து வருகின்றனர்.

சித்தார்த் ஆனந்த் இயக்கத்தில், யாஷ் ராஜ் தயாரிப்பில், விஷால் - சேகர் இசையமைப்பில், ஷாருக்கான், தீபிகா படுகோன், ஜான் ஆபிரகாம் உள்ளிட்ட பலர் நடிப்பில் உருவாகியுள்ள பதான் திரைப்படம் வரும் ஜனவரி 25ம் தேதி திரையரங்களில்  வெளியாக உள்ளது. இந்நிலையில் சமீபத்தில் இப்படத்தில் இடம்பெற்றுள்ள 'Besharam Rang' என்ற பாடலை படக்குழுவினர் வெளியிட்டிருந்தனர். அப்பாடலால் அப்படம் பாய்காட் எதிர்ப்பைச் சந்தித்துள்ளது. காரணம் தீபிகா படுகோன் படத்தில் இடம்பெற்றுள்ள 'Besharam Rang' பாடலில் கவர்ச்சியாக காவி நிற பிகினியை அணிந்து கொண்டு நடனம் ஆடியிருப்பது இந்து சமயத்திற்கு, இந்திய கலாச்சாரத்திற்கு எதிராக உள்ளது என்று கருத்து தெரிவித்து வருகின்றனர்.

மேலும் உடனிருக்கும் ஷாருக்கான் பச்சை நிற ஷர்ட் அணிந்து ஆடியிருப்பது மறைமுகமாக பாகிஸ்தான் கலரை அவர் குறியீடாக வெளிக்காட்டுகிறார் என்றும்  குற்றம்சாட்டி அப்படத்தை தடை செய்ய வேண்டும் என்று #BoycottPathaan, #Deepika Padukone, #ShahRukhKhan என்று பாய்காட் பிரசாரம் மூலம் எதிர்ப்பு தெரிவித்து வருகின்றனர்.

இதனிடையே  பல வண்ணங்களில் பிகினி அணிந்து தீபிகா படுகோன் இந்தப் பாடலுக்கு நடனமாடி உள்ள நிலையில், திட்டமிட்டே ஷாருக்கான் படம் என்பதால் எதிர்ப்பு தெரிவிக்க 'காவி' சர்ச்சையைக் கிளப்புகின்றனர் என ஷாருக்கான் ரசிகர்கள் 'பதான்' படத்தின் பாய்காட் பிரசாரத்திற்கு எதிராக தங்களின் எதிர்ப்பைத் தெரிவித்து வருகின்றனர்.  

பாய்காட் பிரசாரத்தால், ஆமிர் கானின் ’லால் சிங் சத்தா’ மற்றும் அக்‌ஷய் குமாரின் ’ரக்‌ஷா பந்தன்’ உள்ளிட்ட பல படங்கள் பாக்ஸ் ஆபீஸில் படுதோல்வி அடைந்த நிலையில், வரும் ஜனவரி 25ம் தேதி வெளியாக உள்ள ஷாருக்கானின் பதான் படத்துக்கும் இதே நிலைமை உருவாகுமா என்ற கேள்வி எழுந்துள்ளது.