Published:Updated:

"இப்படியும் சொல்வோம்; அப்படியும் பண்ணுவோம்!" - இந்திய சென்சாரிடம் ஹாலிவுட் படங்கள் படும்பாடு!

சந்தோஷ் மாதேவன்

இந்தியாவில் தணிக்கைக் குழு, ஒரு தகுதி மதிப்பிடும் நிறுவனமாக (Qualifying Entity) உள்ளது. பெரும்பாலும், இது படைப்பாளிகளின் கருத்து சுதந்திரத்துக்கு ஒரு முட்டுக்கட்டையாக வந்துவிடுகிறது.

Hollywood vs Indian CBFC
Hollywood vs Indian CBFC

ஒரு பிரபல ஹாலிவுட் படத்தின் கதை இப்படியிருக்கிறது... ஒரு கைதேர்ந்த, கொடூர கொலைகாரன். உலகின் ஒழுங்குபடுத்தப்பட்ட குற்றக் கூட்டமைப்பின் (Organised Crime Network) முன்னாள் உறுப்பினராக இருந்தவன் அவன். திடீரென ஒருநாள், தன் உயிருக்கு நிகரான மனைவிக்காகக் குற்றங்கள் புரிவதை விட்டுவிட்டு அவளுடன் சேர்ந்து நிம்மதியான வாழ்க்கையை வாழ்கிறான். ஆனால், விதியோ அவன் மனைவிக்குப் புற்றுநோயைக் கொடுத்து உயிரைப் பறித்துவிடுகிறது. இறக்கும் தறுவாயில், அவனுக்காக அவள் அனுப்பும் ஒரு நாய்க்குட்டி, சரியாக அவள் மறைவுக்குப் பிறகு அவனிடம் வந்து சேர்கிறது. கல் நெஞ்சக்காரனான அந்தக் கொலைகாரனுக்கு, தற்போது தன்னிடம் அன்புகாட்ட, மனைவியின் இடத்தை நிரப்ப, எஞ்சியிருக்கும் ஒரே உயிர் அந்த நாய்தான். இப்படிப்பட்ட சூழலில்தான், அந்த நாயை ஒரு கேங்க்ஸ்டர் கூட்டம் கொன்றுவிடுகிறது. அவர்களை அவன் பழிவாங்குவதுதான் மீதி திரைக்கதை. இப்படியொரு பில்டப் கொடுத்துவிட்டு ஒரு மாஸ் மசாலா, ஆக்‌ஷன் படத்தைத் தொடங்கினால், அந்தப் படத்தின் வன்முறைக் காட்சிகள் எந்தளவுக்கு இருக்கும் என யோசித்துப்பாருங்கள். அதற்கு நம்ம ஊர் சென்சார் போர்டு எப்படியெல்லாம் கத்தரிபோடும் என்பதையும் யோசித்துப்பாருங்கள்.

John Wick
John Wick

'ஜான் விக்' என்ற அதிரடி ஆக்‌ஷன் படத்தின் கதைதான் இது. தன் நாய்க்குட்டி டெய்சியைக் கொன்று, தன்னுடைய ஆடம்பர காரையும் திருடிவிட்டுச் செல்பவர்களை ஜான் விக் எப்படியெல்லாம் துரத்தித் துரத்திக் கொல்கிறான் என்பதை, ரத்தமும் சதையுமாக மட்டுமல்லாமல், எலும்பு, நரம்பு, கண், காது, மூக்கு என எல்லா உறுப்புகளையும் தனித்தனியாகச் சிதைக்கும் அளவுக்கு ஜானை ஒரு கொடூரனாகவே சித்திரித்திருப்பார்கள்.

இப்படி, அந்த ஒருவரிக் கதையை மட்டுமே கொண்ட 'ஜான் விக்' படத்தை அதன் வன்முறைக் காட்சிகளுக்காகவே உலகம் முழுக்க மக்கள் பார்த்து ரசித்தனர். அதன் வெற்றி, 'ஜான் விக்'கை ஒரு படத்தொடராக நீட்சியடையச் செய்தது. இந்தப் படத்தொடரின் மூன்றாவது பாகமான 'பேரபெல்லம்' அண்மையில் வெளியானது. இம்முறை வேடிக்கை என்னவென்றால், எந்தக் காரணத்துக்காக இந்தப் படத்தை ரசிகர்கள் விரும்பிக் கண்டுவந்தார்களோ, அந்தக் காரணத்தையே சுட்டிக்காட்டி இந்தியத் தணிக்கைக் குழு படத்துக்குப் பல கட்டுப்பாடுகள் விதித்தது. படத்தின் எல்லா வன்முறைக் காட்சிகளின் நீளத்தையும் குறைக்க வேண்டும் எனக் கூறிவிட்டது. ஒரு காட்சியில் 50 விழுக்காடு நீளம் குறைக்க வேண்டும் என்றும் சொல்லிவிட்டது. இத்தனையும் படத்துக்கு 'ஏ' சான்றிதழ் வழங்கிய பின்னர் கூறப்பட்டதுதான் உச்சக்கட்ட வேடிக்கை.

இது இன்று நேற்று நடப்பவையல்ல. நீண்டகாலமாகவே ஹாலிவுட்டுக்கும் இந்தியத் திரைப்படத் தணிக்கைக் குழுவுக்கும் இடையில் நிலவும் சிக்கல். பொதுவாக, நிர்வாணக் காட்சிகள் அல்லது மிகவும் ஆபாசமான காட்சிகள் உள்ள படங்களைக் கண்டிப்பாக இந்தியாவில் அவை எடுக்கப்பட்ட வடிவிலேயே வெளியிட முடியாது என்பது ஹாலிவுட் அறிந்ததே. 'ஹேங் ஓவர்', 'ஹாரிபிள் பாஸஸ்', 'வி ஆர் தி மில்லர்ஸ்' போன்ற அடல்ட் காமெடி படங்களும், ஆபாசக் காட்சிகள் நீக்கப்பட்டு இங்கே கடந்த காலத்தில் வெளியாகி, வசூலையும் குவித்துள்ளன.

Fifty Shades of Grey
Fifty Shades of Grey

அதேவேளையில், 'பிஃப்டி ஷேட்ஸ் ஆஃப் க்ரே', 'ஐ ஸ்பிட் ஆன் யுவர் க்ரேவ்', 'மேஜிக் மைக் எக்ஸ்.எக்ஸ்.எல்' போன்ற படங்களை ஆபாசம் என்ற காரணத்துக்காக வெளியிட மறுத்தும் உள்ளது. என்றாலும், இப்படித் தடைவிதிக்கப்பட்ட பல படங்களை இணையதளத்திலிருந்து பதிவிறக்கம் செய்து பலர் பார்த்துவிட்டனர் என்பதுதான் வேடிக்கை. இன்னும் பல சினிமா ரசிகர்கள், 'ஐ ஸ்பிட் ஆன் யுவர் க்ரேவ்' படத்தை இந்தியாவில் வெளியிட வேண்டும் எனக் கோரிக்கை வைத்த வண்ணம் உள்ளனர். காரணம், பாலியல் குற்றங்கள் பெருகிவரும் இந்தியச் சமூகத்தில் ஒருமுறை இந்தப் படத்தைப் திரையிட்டால்போதும், அதைப் பார்ப்பவருக்குத் தன் வாழ்நாளில் பாலியல் வன்கொடுமையில் ஈடுபடும் எண்ணம் கண்டிப்பாக வராது என்பது அவர்கள் கருத்து.

அதேபோல, பி.டி.எஸ்.எம் (BDSM) எனப்படும் வக்கிரமான உடலுறவு குறித்த 'பிஃப்டி ஷேட்ஸ் ஆஃப் க்ரே' திரைப்படத்தை, அதன் ஆபாசக் காட்சிகள் எல்லாவற்றையும் நீக்கிவிட்டு வெளியிட விநியோக நிறுவனங்களே இங்கே தயாராகத்தான் இருந்தன. ஆனால், சென்சார் நிர்வாகம் அதற்கு சம்மதிக்கவில்லை. இதேபோல, பிரபல இயக்குநர் டேவிட் ஃபின்ச்சரின் 'தி கேர்ள் வித் எ ட்ராகன் டாட்டூ' படத்திலிருந்து பாலியல் வன்முறைக் காட்சிகளை நீக்கக்கோரி சென்சார் போர்டு கேட்டுக்கொண்டபோது, டேவிட் அதை மறுத்தார். அதனால், அந்தப் படம் இந்தியாவில் வெளியாகவில்லை.

ஆபாசக் காட்சிகளால் தடைவிதிக்கப்பட்ட படங்கள் இப்படியிருக்க, மக்களின் உணர்வுகளை, நம்பிக்கைகளைக் கேலி செய்யும், விமர்சிக்கும் படங்களையும் சென்சார் தடைவிதித்துள்ளது. அப்படிச் சொன்னவுடன் பெரும்பான்மையான சினிமா ஆர்வலர்களுக்கு முதலில் நினைவுக்குவரும் திரைப்படம், 'தி டாவின்சி கோட்'. இயேசுவின் மனைவி 'மேரி மேக்டலின்', 'அவர் வெறும் மனிதர்தான்', 'கிறிஸ்துமஸ் நாள் என்பதே பலரால் சேர்ந்து முடிவுசெய்யப்பட்ட நாள்' என கிறிஸ்துவ மதத்தின் சில நம்பிக்கைகளுக்கு எதிர்மறையான கருத்துகள் இருந்த காரணத்தால், இந்தப் படத்தை முதலில் இந்தியா முழுக்க வெளியிடத் தடைவிதித்தது தணிக்கைக் குழு.

The DaVinci Code
The DaVinci Code

பிறகு, சர்ச்சைக்குரிய சில வசனங்களையும் காட்சிகளையும் நீக்கிவிட்டு இந்தப் படத்தை குறிப்பிட்ட சில மாநிலங்களைத் தவிர, பிற இடங்களில் வெளியிட அனுமதி வழங்கியது. இன்றுவரை, 'டாவின்ஸி கோட்' தடைவிதிக்கப்பட்ட மாநிலங்களில் தமிழ்நாடும் ஒன்று.

Indiana Jones and the Temple of Doom
Indiana Jones and the Temple of Doom

கிறிஸ்துவ மதத்துக்கு 'டாவின்ஸி கோட்' என்றால், இந்து மதத்துக்கு 'இண்டியான ஜோன்ஸ் அண்டு தி டெம்பிள் ஆஃப் டூம்'. இந்து மத நம்பிக்கைகளையும் கலாசாரத்தையும் கேலி செய்யும் விதமாகவும் தவறான முறையில் சித்திரித்ததாகவும் கூறி, 1984-ம் ஆண்டு வெளியான இந்தப் படம் தணிக்கைக் குழுவால் தடை செய்யப்பட்டது. பின்னர், தடைவிலக்கப்பட்டு படம் வெளியானது.

இதுவரை கூறியவையெல்லாம் சென்சாரின் சாதாரண காரணங்கள். இவையெல்லாமல் சில விசித்திரமான நிகழ்வுகளும் நேர்ந்துள்ளன. ஹாலிவுட்டின் முன்னணி இயக்குநர்களில் ஒருவரான வூடி ஆலனின் 'ப்ளூ ஜாஸ்மின்' திரைப்படம் ஒரு சாதாரணமான டிராமா வகைப் படம்தான். ஆனால், அதில் வரும் கதாபாத்திரங்களில் சிலர் படத்தின் பெரும்பான்மையான காட்சிகளில் புகை பிடிப்பதால், அந்தக் காட்சிகளில் 'புகைபிடிப்பது உடல் நலத்துக்குக் கேடு' என்ற குறிப்பைச் சேர்க்குமாறு தணிக்கைக்குழு கேட்டுக்கொண்டது. ஆனால், அது தன் படத்தின் போக்கைக் கெடுக்கும் எனக் கூறி அந்தக் குறிப்பை இணைக்க மறுத்துவிட்டார் ஆலன். அதனால், படமும் வெளியாகவில்லை.

Blue Jasmine
Blue Jasmine

இன்றும், பல திரைத்துறையினரும் விமர்சகர்களும் இதைக் காரணமாகக்காட்டி ஒரு கேள்வியையும் எழுப்புகின்றனர். "புகை பிடிப்பது கேடு என்றால், அந்தக் காட்சிகள் படத்தில் இடம்பெறக்கூடாது எனச் சொல்வது சரி. அல்லது காட்சிகளை வைத்துவிட்டு, படத்துக்கு 'ஏ' சான்றிதழ் கொடுப்பதுகூட சரி. காட்சிக்கும் அனுமதி தந்துவிட்டு, டிஸ்கிளைமரும் சேர்க்க வேண்டுமென்றால், அதில் என்ன லாஜிக் இருக்கிறது?" என்பது அவர்கள் வாதம்.

திரைப்படங்களுக்கான தணிக்கைக் குழு உலகின் எல்லா நாடுகளிலும் உள்ளது. அதில் கிட்டத்தட்ட அனைத்து நாடுகளிலும், அவற்றின் தணிக்கைக் குழுக்கள், அளவீட்டு நிறுவனங்களாகத்தான் (Quantifying entity) இயங்கிவருகின்றன. அதாவது, படத்தில் என்ன மாதிரியான காட்சிகள் இருக்கின்றனவோ, அதற்கேற்ற சான்றிதழை வழங்குவதுதான் அவற்றின் வேலை. சான்றிதழுக்கு ஏற்றவாறு படத்தின் பார்வையாளர்கள் யாரெனெ முடிவுசெய்யப்படும். உதாரணமாக, படத்தில் மிகத் தீவிர வன்முறைக் காட்சிகள், அல்லது ஆபாசக் காட்சிகள் இருக்கின்ற என்றால், அதை 16 வயதுக்கு மேற்பட்டவர்கள்தான் பார்க்கவேண்டும் என்பதை மட்டும் முடிவு செய்யவே அவற்றுக்கு அதிகாரம் உண்டு.

ஆனால், இந்தியாவில் தணிக்கைக் குழு ஒரு தகுதி மதிப்பிடும் நிறுவனமாக (Qualifying Entity) உள்ளது. ஒரு படத்தில் வன்முறைக் காட்சிகள் அதிகமாக இருக்கிறதென்றால், அந்தப் படத்துக்கு 'ஏ' சான்றிதழ் வழங்கினாலும்கூட, அதில் சில காட்சிகளைக் கத்தரிக்க வேண்டும் என்பது இங்குள்ள வழக்கம். பெரும்பாலும், இது படைப்பாளிகளின் கருத்து சுதந்திரத்துக்கு ஒரு முட்டுக்கட்டையாக வந்துவிடுகிறது. இங்கே சென்சாரின் சட்ட திட்டங்களும் கொஞ்சம் குழப்படியாகத்தான் இருக்கின்றன. ஒரு ஆண் கெட்ட வார்த்தை பேசினால், அந்தப் படத்துக்கு 'யு/ஏ' சான்றிதழும், பெண் கெட்ட வார்த்தை பேசினால் 'ஏ' சான்றிதழும் கொடுக்க வேண்டும் என்றெல்லாம் வேடிக்கையான சட்டங்களை வைத்திருக்கிறது சென்சார். அப்படி 'ஏ' சான்றிதழ் கொடுத்த பின்பும் சில வார்த்தைகளுக்கு 'மியூட்' போடவும் சொல்கிறது நமது சென்சார். தவிர, இந்திப் படங்களுக்கு ஒரு வரையறை, தமிழுக்கு மற்றொன்று, மலையாளத்துக்கு வேறொன்று என மொழிவாரியாகச் சட்டங்கள் பிரிந்தும் இருக்கின்றன. உள்ளூர் படங்களுக்கே இத்தனை சிக்கல் என்றால், ஹாலிவுட்டுக்குச் சொல்லவே தேவையில்லை. இதனால், வார்னர் ப்ரோஸ், டிஸ்னி உட்பட பல முன்னணி நிறுவனங்கள் தங்களின் சில படங்களை இந்தியாவில் வெளியிட வேண்டாம் என முன்னரே முடிவெடுத்து விடுகின்றனவாம்.

சந்தோஷ் மாதேவன்