அமெரிக்காவின் லாஸ் ஏஞ்சல்ஸ் மாகாணத்தில் உள்ள டால்பி திரையரங்கில், 95-வது ஆஸ்கர் விருது வழங்கும் விழா மிகவும் கோலாகலமாக நடைபெற்றது. இந்த விழாவில் `எவ்ரிதிங் எவ்ரிவேர் ஆல் அட் ஒன்ஸ் (Everything Everywhere All At Once)' திரைப்படத்தில் நடித்ததற்காகச் சிறந்த நடிகைக்கான விருதை வென்றுள்ளார் மிச்செல் யோஹ் (Michelle Yeoh).

95 ஆண்டுக்கால ஆஸ்கர் விருதுகள் வரலாற்றில் சிறந்த நடிகைக்கான விருதை வென்ற முதல் ஆசியப் பெண் என்ற வரலாற்றையும் அவர் படைத்துள்ளார்.

மலேசியாவில் பிறந்து ஹாங்காங் அதிரடித் திரைப்பட உலகில் ஜாம்பவானாகத் திகழ்ந்தவர் மிச்செல். இவர், க்ரூச்சிங் டைகர் (Crouching Tiger), ஹிடன் டிராகன் (Hidden Dragon) மற்றும் கிரேஸி ரிச் ஏசியன்ஸ் (Crazy Rich Asians) போன்ற ஹிட் படங்களில் நடித்துள்ளார்.

கடந்த ஆண்டு வெளியான ’எவ்ரிதிங் எவ்ரிவேர் ஆல் அட் ஒன்ஸ்’ படம் டேனியல் குவான் மற்றும் டேனியல் ஷீனெர்ட் ஆகியோரால் எழுதி இயக்கப்பட்டது. இதில் `ஈவ்லின்’ என்ற கதாபாத்திரத்தில் நடித்ததற்காகவே மிச்செலுக்கு ஆஸ்கர் விருது வழங்கப்பட்டுள்ளது.

விருது பெற்ற பின் விழா மேடையில் பேசிய மிச்செல், “ இந்த விருதை 84 வயதான என் அம்மாவுக்கு சமர்ப்பிக்கிறேன். அவர் மலேசியாவில் இருந்து இந்த நிகழ்ச்சியை பார்த்துக் கொண்டிருப்பார். உலகில் உள்ள அனைத்து அம்மாக்களும் உண்மையில் சூப்பர் ஹீரோக்கள்தான். அவர்கள் இல்லாமல் நாம் யாரும் இங்கு இருந்திருக்க மாட்டோம். இன்று என்னைப் போலவே இருக்கும், என்னைப் பார்க்கும் அனைத்து இளைஞர்களுக்கும் இந்த விருது பெரும் நம்பிக்கை அளிக்கும். பெண்களே... நீங்கள் எப்போதும் உங்கள் வயதைக் கடந்துவிட்டதாகக் கூறாதீர். எந்த வயதிலும் முயற்சி செய்தால் வெற்றி நிச்சயம் என்பதற்கு நானே சாட்சி” என நெகிழ்ச்சியாகக் கூறியுள்ளார்.

இந்த வருடம் நடைபெற்ற கோல்டன் குளோப்ஸ் (Golden Globes) இன்டிபென்டன்ட் ஸ்பிரிட் (Independent Spirit Awards) விருதுகள் மற்றும் ஸ்க்ரீன் ஆக்டர்ஸ் கில்ட் விருதுகள் (Screen Actors Guild Awards) ஆகியவற்றில் சிறந்த நடிகைக்கான விருதுகளையும் மிச்செல் வென்றுள்ளார்.

இந்த வருட ஆஸ்கர் விருதுகளில் மொத்தம் 11 பரிந்துரைகளுடன் ’எவ்ரிதிங் எவ்ரிவேர் ஆல் அட் ஒன்ஸ்’ திரைப்படம் முன்னணியில் இருந்தது. அதில் மிச்செலின் ’சிறந்த நடிகை’க்கான விருது உள்பட மொத்தம் 7 விருதுகளைப் பெற்றுள்ளது இந்த திரைப்படம்.