Published:Updated:

துப்பறிவாளன் - சினிமா விமர்சனம்

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
துப்பறிவாளன் - சினிமா விமர்சனம்
துப்பறிவாளன் - சினிமா விமர்சனம்

துப்பறிவாளன் - சினிமா விமர்சனம்

பிரீமியம் ஸ்டோரி
துப்பறிவாளன் - சினிமா விமர்சனம்

ரு நாயின் இறப்பைத் துப்புத் துல‌க்கப்போய்ப் பெரும் கொலைகார, சதிகாரக் கும்பலைக் கண்டுபிடிக்கும் `துப்பறிவாள’னின் கதை.

துப்பறிவாளன் கணியன் பூங்குன்றனாக விஷால். உடல்மொழியும் பாவனைகளும் என விஷால் அப்படியே மிஷ்கினை ஸ்கேன் அடித்திருக்கிறார். ஷெர்லாக் ஹோம்ஸுக்கு ஒரு வாட்சனைப்போல, விஷாலுக்குப் பிரசன்னா. ஆனால், விஷால் என்ன செய்கிறார், எதற்குச் செய்கிறார் என்று பிரசன்னாவுக்கு எதுவும் புரிவதில்லை (சமயங்களில் நமக்கும்!). கொடூரமான‌ கிரிமினல் கும்பல் தலைவனாக வினய். விஷாலுக்கு ஏற்ற வாட்டசாட்டமான வில்லன். ஆண்ட்ரியா, பாக்யராஜ், அனு இமானுவேல், சிம்ரன் எனப் படத்தில் நிறைய முகங்கள். ஆனால், பலரும் மிஷ்கின் எப்படி நடக்கச் சொன்னாரோ, எப்படிப் பார்க்கச் சொன்னாரோ,  எப்படி ஓடச் சொன்னாரோ அதை மட்டுமே செய்திருக்கிறார்கள்.

துப்பறிவாளன் - சினிமா விமர்சனம்


கேமரா கோணங்களின் வழியே தான் ஒரு வித்தியாசமான கதை சொல்லி என்பதை இந்தப் படத்தின் மூலமாகவும் உணர்த்தியிருக்கிறார் மிஷ்கின். நிறைய காட்சிகள் தமிழ் சினிமாவுக்கே புதிது. வில்லன் யாரென ஆரம்பத்திலேயே சொல்லிவிட்டுப் படம் முழுக்க சுவாரஸ்யத்தையும் தொடர வேண்டும் என்ற கடுமையான டாஸ்க்கில் வெற்றி பெற்றிருக்கிறார் மிஷ்கின். ஆனாலும், சாமுராய்கள்போல சென்னை ஓ.எம்.ஆரில் வில்லன் கும்பலைச் சேர்ந்தவன் தற்கொலை செய்துகொள்வது, பிச்சாவரம் ஏரியில் ஆப்பிரிக்க வில்லன்கள் சரமாரியாகச் சுடுவது, சைக்கிள் கேப்பில் வில்லனின் பாங்காக் வீடுவரை அத்தனை தகவல்களையும் விஷால் துப்பறிந்து ஒப்பிப்பது எனப் படத்தில் பல விஷயங்கள் நம்பும்படியாக இல்லை. படத்தில் வரும்  முக்கியமான மூன்று பெண் பாத்திரங்களுமே உயிர்த்தியாகம் செய்கிறார்கள். பெண்களுக்கான எந்த முக்கியத்துவமுமே படத்தில் இல்லை.

விஷால், பிரசன்னா மற்றும் அந்தச் சிறுவன் அமர்ந்து பேசும் காட்சி, சிம்ரனின் வீட்டில் இரண்டு கண்ணாடிகள் கொண்டு அமைக்கப்பட்ட காட்சி மற்றும் பைக் சேஸிங் காட்சி எனப் பல இடங்களில் கவனிக்க வைக்கிறார் ஒளிப்பதிவாளர் கார்த்திக் வெங்கட்ராம். அரோல் கரோலியின் வயலின்கள் விளையாடியி ருக்கின்றன. சண்டைக்காட்சிகள் மிகவும் ரியலிஸ்ட்டிக்காக இருக்கின்றன.

எந்தக் கதாபாத்திரத்தின் பின்புலமும் தெளிவாகச் சொல்லப்படாததும், முதற்பாதியில் துப்பறியும் காட்சிகளில் இருந்த டீட்டெய்லிங், பிற்பாதியில் வரும் முக்கியமான காட்சிகளில் காணாமல் போனதும் படத்தின் பலவீனங்கள்.  எங்கே பரிதாபம் வர வேண்டுமோ அங்கே சிரிப்பு வருவதும், வில்லன் வீழ்த்தப்படும்போது பரிதாபம் வருவதுமே இந்தப் படத்தின் மிகப்பெரிய மைனஸ்.

நிறைய புத்தகங்கள் படிக்கிறார் மிஷ்கின் என்பது படம் முழுக்கத் தெரிகிறது. ஆனால், அவர் தமிழ் ரசிகர்களின் மனதையும் படிக்க வேண்டிய நேரம் இது!

- விகடன் விமர்சனக் குழு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு