Published:Updated:

களவாடிய பொழுதுகள் - சினிமா விமர்சனம்

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
களவாடிய பொழுதுகள் - சினிமா விமர்சனம்
களவாடிய பொழுதுகள் - சினிமா விமர்சனம்

களவாடிய பொழுதுகள் - சினிமா விமர்சனம்

பிரீமியம் ஸ்டோரி

காலத்தால் பிரியநேர்ந்த முன்னாள் காதலர்கள் சந்திக்கும்போது உண்டாகும் உணர்வுகளின் வலியும், நிகழ்காலத்தின் எதார்த்தமும்தான் ‘களவாடிய பொழுதுகள்’.

அழகி கதைதான். அதில் ஆண் வசதியானவர், பெண் வறுமை கொண்டவர் என்றால்; இதில் பெண் வசதியானவர், ஆண் ஏழை. அதே கதை என்றாலும் மென் உணர்வுகளை அழகாகக் காட்சிப்படுத்தியிருப்பதிலும் நம்மைக் கலங்கவைப்பதிலும் கவர்கிறது. காலம் கடந்து வெளியானாலும் பார்வையாளர்களைத் தக்கவைப்பதில் வெற்றிபெற்றிருக்கிறார் தங்கர் பச்சான்.

நடன நாயகனாய் அசத்திய பிரபுதேவா நடிப்பு நாயகனாய் இந்தப் படத்தில் தன்னை அழுத்தமாய் நிறுவியிருக்கிறார். பூமிகாவிடமிருந்தும் பிரகாஷ்ராஜிட மிருந்தும் விலகுவதற்கு அவர் மேற்கொள்ளும் எத்தனங்களும் வேறுவழியில்லாமல் பிரகாஷ்ராஜின் நிறுவனத்தில் சேர்ந்தபிறகு ஏற்படும் மனப்போராட்டங்களும் எனப் பொற்செழியனாகவே வாழ்ந்திருக்கிறார். “என்கிட்ட உன் போட்டோகூட இல்லை. நல்லா உன்னை ஒருதடவை பார்த்துக்கிறேன்” என்று இறுதியில் பூமிகாவிடம் பிரபுதேவா சொல்லும்போது கலங்கவைத்துவிடுகிறார்.

களவாடிய பொழுதுகள் - சினிமா விமர்சனம்

பிரபுதேவாவுக்குக் கொஞ்சமும் குறைவில்லாமல் சவால்விட்டு நடித்திருக்கிறார் பூமிகா. மனைவியின் காதலை அறியும்போது ஏற்படும் மன உணர்வுகளைத் துல்லியமாக வெளிப்படுத்தியிருக்கிறார் பிரகாஷ்ராஜ். ‘தன் கணவன் ஏன் இப்படி இருக்கிறான்?’ என்று புரியாமல் புலம்பிப் பொருமித்தள்ளும் மனைவியாக இன்பநிலாவும், “அப்பா நான் மறுபடியும் ஓட்டைப் பள்ளிக்கூடத்துக்குத்தான் போகணுமா?” என்று பரிதாபமாய்க் கேட்கும் குழந்தை நட்சத்திரம் ஜோஷிகாவும் நிறைவாக நடித்திருக்கிறார்கள்.

தங்கர்பச்சானின் ஒளிப்பதிவும், பரத்வாஜின் இசையும் அத்தனை அழகு.  ‘அழகழகே’ பாடல் அழகான மெல்லிசை என்றால், மறைந்த பாடகர் திருவுடையானின் குரலில் ‘ஆளுக்கொரு விடுகதையா’ துயரத்தின் பாடல்.

காதல் படம் என்றாலும் அதில் தான் பேச விரும்பும் அரசியலை உரக்கப் பேசவேண்டும் என்ற தங்கரின் சமூக அக்கறை பாராட்டப்பட வேண்டியது. ஆனால், படத்தில் எல்லோருமே அவர்கள் பாத்திரங்களின் இயல்புக்கு அப்பால் தமிழுணர்வு பேசுவது உறுத்தல். 

எட்டு வருடங்களுக்கு முன்பு எடுக்கப்பட்ட படமென்றாலும் அதில் இடைத்தேர்தல் குறித்தும் டாஸ்மாக் எதிர்ப்புப் போராட்டம் குறித்தும் இடம்பெற்றிருக்கும் காட்சிகள் இப்போதும் பொருந்திப்போவது படைப்பின் வெற்றி மட்டுமன்று, சமூக அவலமும்கூட.

களவாடிய பொழுதுகள் - சினிமா விமர்சனம்

நெகிழ்ச்சியான உணர்வுகளைக் கச்சிதமாகக் கடத்தியிருக்கிறது இந்தக் களவாடிய பொழுதுகள்.

- விகடன் விமர்சனக் குழு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு