Published:Updated:

மெளனமே காதலாக!

தமிழ்மகன்

மெளனமே காதலாக!

தமிழ்மகன்

Published:Updated:
##~##

காலத்தை ரீவைண்ட் செய்து கண்முன் நிறுத்தி இருக்கிறது 'தி ஆர்ட்டிஸ்ட்’ திரைப்படம்! இனி திரும்பவே முடியாத, கடந்து மறைந்துவிட்ட அன்றைய திரைக் கலைக்கு மீண்டும் உயிர் கொடுத்திருக்கிறார் இயக்குநர் மைக்கேல் அகனாவிக்கியஸ். மௌனப் படத்துக்கான சகல லட்சணங்களையும் கவனமாகக் கையாண்டு அவர் படைத்திருக்கும் ஒரு காதல் காவியம் இது என்று கொண்டாடிக்கொண்டு இருக்கிறது ஹாலிவுட். ஹாலிவுட் படங்களுக்குக் கெடுபிடி விமர்சனம் அளிக்கும் ஐ.எம்.டி.பி. தளமே 10-க்கு 8.4 மதிப்பெண்கள் அளித்து பாராட்டும் படம்!

 பிரிட்டிஷ் அகாடமி ஃபிலிம் அவார்டு கமிட்டியின் ஏழு விருதுகளைத் தட்டிச்சென்றிருக்கும் 'தி ஆர்ட்டிஸ்ட்’, இப்போது ஆஸ்கர் விருது பரிந்துரையில் மிகுந்த எதிர்பார்ப்பைக் கிளப்பியிருக்கிறது. விருது அறிவிப்பில் கணிசமான விருதுகளை அள்ளப்போவதும் அதுதான் என்று ஹாலிவுட் ஆரூடம் சொல்லிக்கொண்டு இருக்கிறது.

ஒட்டுமொத்த விகடனுக்கும் ஒரே ஷார்ட்கட்!

1920-களில் மௌனப் படத்தில் நடிக்கும் கதாநாயகனை மையப்படுத்தி கதையைப் பின்னியிருக்கிறார் இயக்குநர்.

மெளனமே காதலாக!

ஜார்ஜ் வாலன்டைன் மௌன யுகத்தின் பிரபல கதாநாயகன். சாகஸ ஹீரோ. அவர் பத்திரிகையாளர்களுக்கு போஸ் கொடுத்துக்கொண்டு இருக்கும்போது ஏற்பட்ட நெரிசலில்  ஆட்டோகிராஃப் வாங்க வந்த ரசிகை பெப்பி மில்லர் அவரை இடித்துவிடுகிறாள். திடுக்கிடும் நாயகன், பின்னர் சுதாரித்து, ரசிகையின் தோளில் பாந்தமாகக் கைபோட்டு போஸ் கொடுக்கிறார். அவர் அசரும் அந்த நேரத்தில் பெப்பி அவருடைய கன்னத்தில் முத்தமிட, மறுநாள் 'வெரைட்டி’ இதழில் 'யார் அந்தப் பெண்?’ என்ற படத்துடன் பிரசுரமாகிறாள். அந்தப் படமே ஹாலிவுட்டின் கினோகிராஃப் ஸ்டுடியோவில் பெப்பி நுழைவதற்கு துருப்புச்சீட்டாக மாறுகிறது. ஜார்ஜ் அவளுக்குச் சிபாரிசு செய்கிறார். அந்தப் படத்தில் துணை நடிகையாக இடம்பெறுவதுடன், ஜார்ஜுடன் ஒரு காட்சியில் நடனமாடவும் வாய்ப்பு கிடைக்கிறது. படப்பிடிப்பு முடிந்ததும் ஜார்ஜின் ஒப்பனை அறையில் தயங்கித் தயங்கி நுழைகிறாள் பெப்பி. அங்கு ஜார்ஜ் இல்லை. அங்கிருக்கும் முகம் பார்க்கும் கண்ணாடியில் மை தீட்டும் பென்சிலால் 'தேங்க் யூ’ என்று எழுதுகிறாள். அவளுக்குப் பரவசமாக இருக்கிறது. அங்கு மாட்டி இருக்கும் ஜார்ஜுடைய கோட்டின் வலது கையில் தன் இடது கையை நுழைத்து அவளையே அவள் அணைத்துக்கொண்டு மெய்மறந்து நிற்கிறாள். காதலிப்பதுதான் எத்தனை உயர்ந்த கலை?

அந்த நேரத்தில் ஜார்ஜ் அங்கே வர, ''உங்களுக்கு நன்றி சொல்வதற்காக வந்தேன்'' என்கிறாள். ''ஜெயிக்க வேண்டுமானால் எல்லோரும் செய்வ தையே நீயும் செய்யக் கூடாது. பிரத்யேகமாக ஏதாவது செய்!'' என்று ஆலோசனை சொன்னபடியே அதே மை தீட்டும் பென்சிலால் அவளுடைய உதட்டுக்கு மேலே செயற்கையாக ஒரு மச்சத்தை உருவாக்குகிறார் ஜார்ஜ். அந்தப் புள்ளி அவளுக்கு மேலும் வசீகரத்தை ஏற்படுத்துகிறது. அந்தச் செயற்கை மச்சமே அவளது நிரந்தர அடையாளமாகிறது. அவளுடைய வாழ்க்கையே மாறுகிறது. துணை நடிகை என்று திரையில் பெயர்களின் நெரிசலில் இடம்பெற்ற அவளுடைய பெயர், மெள்ள மெள்ள முதல் வரிசைக்கு நகர்ந்து முன்னணி நடிகையாகிறாள்.

இந்த நேரத்தில் கினோகிராஃப் முதலாளி ஜிம்மர் இனி மௌனப் படம் எடுக்கப்போவது இல்லை என்ற முடிவை அறிவிக்கிறார். அதிர்ச்சி அடைகிறார் ஜார்ஜ். 'மௌனப் படம் இல்லைஎன்றால் வேறு என்ன படம் எடுக்க முடியும்?’ என்று கேட்கிறார். சப்தங்கள் கொண்ட சினிமாவைக் கற்பனை செய்ய முடியாமல் தானே சொந்தமாக ஒரு மௌனப் படத்தைத் தயாரித்து, இயக்குகிறார் ஜார்ஜ். நாயகி... பெப்பி.

படம் வெளியாகிறது. அதே நாளில் பெப்பி நாயகியாக நடித்த பேசும் படம் சக்கைப்போடு போட, ஜார்ஜ் தயாரித்த படம் காற்றாடுகிறது. அந்த நேரத்தில் தன்னுடைய பிரபலத்துக்குக் காரணம், தான் பேசும் படத்தில் நடிக்க ஆரம்பித்ததுதான் என்ற அர்த்தத்தில் பெப்பி பேசுவதைக் கேட்டு அவள் மீது கோபமாகிறார் ஜார்ஜ். மாற்றத்தை ஏற்றுக் கொள்ள முடியாமல் புழுங்குகிறார். கடனாளியாகி, குடிப் பழக்கத்தால் தன் மேல் கோட்டையும் அடகு வைக்கும் நிலைக்குப்போகிறார். அவரும் அவருடைய நாயும் மட்டும் சிறிய வீட்டில் ஒடுங்கிக்கிடக்கிறார்கள்.

எந்த விஞ்ஞான வளர்ச்சியும் அந்தத் துறை சம்பந்தப்பட்ட கலைஞனை வாட்டி வதைப்பதை இதனோடு ஒப்பிட்டுப் பார்க்க முடிகிறது. சினிமா வந்தபோது நாடகக் கலைஞர்களிடமும், வினைல் போர்டு வந்தபோது சைன் போர்டு எழுதுபவர்களிடமும், கம்ப்யூட்டர் அனிமேஷன் வந்தபோது செல் அனிமேஷன் வரைபவர்களிடமும் விசைத்தறி வந்தபோது கைத்தறி நெசவாளர்களிடமும் காலம் மனரீதியாக ஏற்படுத்திய வலியை மௌனத்தின் மூலம் காதல் நாடகமாகச் சொல்லியிருப்பது ஆழ்ந்து கவனிக்கத்தக்க அம்சம்.

நாயகி பெப்பியாக நடித்திருக்கும் பெரினிஸ் பெஜொ, அர்ஜென்டினாவில் பிறந்தவர். அவருடைய தந்தை சினிமா தயாரிப்பாளர். ஆனால், உள்நாட்டு யுத்தம் காரணமாக மூன்று வயதிலேயே பிரான்ஸுக்கு வந்துவிட்டவர். அங்குதான் இந்தப் படத்தின் இயக்குநர் மைக்கேல் அகனாவிக்கியஸைக் காதலித்து மணந்தார். மூன்று குழந்தைகள். இப்போது வயது 35. சத்தியம் செய்தாலும் நம்ப மாட்டார்கள். அப்படி ஒரு துறுதுறு! என்னமாக நடிக்கிறார்? ஜார்ஜ் ஏலம்விட்ட அவருடைய பொருட்களை எல்லாம் ரகசியமாக வாங்கி வந்து பாதுகாப்பதில் தொடங்கி, தீ விபத்தில் சிக்கிவிட்டார் என்ற செய்தி அறிந்து

மெளனமே காதலாக!

பதைக்கும்போது வரை ஒலியின் அவசியம்இல்லா மலேயே நெகிழவைத்துவிடுகிறார்.

ஜார்ஜ் வாலன்டைனாக நடித்திருப்பவர் ழான் டுஜார்டின். பிரான்ஸ் டி.வி-க்களில் நகைச்சுவை நடிகராகப் பிரபலமான இவர், இதன் மூலம் உலக சினிமா ரசிகர்களின் மனம் கவர்ந்த ஹீரோவாகிவிட்டார். படத்தின் மௌனகுருவான ஹீரோ ஜார்ஜ் பேசும் ஒரே ஒரு வசனம் படத்தின் இறுதியில் இடம்பெறுகிறது. நாயகி பெப்பி தன் அன்பாலும் அக்கறையாலும் தற்கொலைக்குத் துணிந்துவிட்ட ஜார்ஜை மீட்டு மீண்டும் நடிக்கவைக்கிறாள். இருவரும் ஆடும் நீண்ட நடனக் காட்சி ஒரே டேக்கில் ஓ.கே. ஆகிறது. இருவருக்கும் மூச்சிரைக்கிறது. ஜார்ஜ் முதல்முறையாகத் தன் மூச்சின் சப்தத்தைத் திரையின் மூலமாகக் கேட்கத் தயாராகிறார். 'கட்’ என்கிறார் டைரக்டர். அதுதான் படத்தில் ஒலிக்கும் முதல் வசனம். காட்சி ஓ.கே. என்றாலும் நடனத்தை மீண்டும் பார்க்கும் ஆவலில் இன்னொருதரம் ஆட முடியுமா என்று இயக்குநர் கேட்கிறார். ''மகிழ்ச்சியாக!'' என்ற முதல் வசனத்தைப் பேசுகிறார் ஜார்ஜ். மாற்றத்தை ஏற்றுக்கொள்வதைத்தான் அப்படிச் சொல்கிறார் என்பதைப் புரிந்துகொள்ள முடிகிறது!