Published:Updated:

சினிமா விமர்சனம் : சாட்டை

விகடன் விமர்சனக் குழு

சினிமா விமர்சனம் : சாட்டை

விகடன் விமர்சனக் குழு

Published:Updated:
##~##

'மாணவர்கள் பாஸ் ஆனால் என்ன... ஃபெயில் ஆனால் என்ன? மாதாமாதம் சம்பளம் வந்தால் போதும்!’ என அரசுப் பள்ளிகளில் அலட்சியமாகச் செயல்படும் ஆசிரியர்களை நோக்கி விளாசப்பட்ட 'சாட்டை’!

 அறிமுக முயற்சியிலேயே கமர்ஷியல் அம்சங்களைக் கருத்தில்கொள்ளாமல், அரசுப் பள்ளிகளின் பரிதாப நிலைமையையும் செயல்வழிக் கற்றல் முறையின் அவசியத்தையும் அச்சு அசலாகப் படம் பிடித்த துணிச்சலுக்காகவே இயக்குநர் அன்பழகன்... ஃபர்ஸ்ட் கிளாஸ் பாஸ்!

சினிமா விமர்சனம் : சாட்டை

அரசுப் பள்ளி மாணவர்களின் தயக்கத்தைக் களையவைக்கும் உத்வேகக் கருத்துகள், 'ஏணியைக் கூரை மேல போடாதீங்க. வானத்தை நோக்கிப் போடுங்க!’, 'புள்ளைங்க எப்பவுமே பெத்தவங்களை நம்புறாங்க... பெத்தவங்கதான் புள்ளைங்களை நம்புறது இல்ல!’ போன்ற வசனங்கள்... பெற்றோர், ஆசிரியர், மாணவர் மூன்று தரப்பினரும் ரசிக்க வேண்டிய ப(£)டம்.  

ஒவ்வொருவரின் மாணவப் பருவ நினைவில் படிந்திருக்கும் பிரியமான ஆசிரியரை நினைவுபடுத்துகிறார் சமுத்திரக்கனி. மாணவர்களிடம் நெகிழ்ந்து அன்பு காட்டுவதும் ஆசிரியர்களிடம் இறுகிப் பிடிவாதம் காட்டுவதுமாக, 'இப்படி ஒரு வாத்தியார் எல்லாப் பள்ளிகளிலும் இருந்தால் நன்றாக இருக்குமே’ என்று ஏங்கவைக்கிறார் 'தயாளன்’. உதவித் தலைமை ஆசிரியர் சிங்கபெருமாளாக, தலை முடியைத் தூக்கி வழுக்கைத் தலையைத் துடைக்கும் மேனரிஸத்திலும் கடன் வாங்கிய தலைமை ஆசிரியரை 'கேட்ச் மை பாயின்ட்’ என்று அதட்டி உருட்டும் திமிரிலும், வயிற்றெரிச்சலில் பொங்கிப் பொருமுவதிலும் சிரிக்க வைத்துக்கொண்டே அந்த கேரக்டர் மீது எரிச்சலை உருவாக்கும் தம்பி ராமையா... அபாரம்யா! சீரியஸ் படத்தில், 'கேம்ஸ் பீரியட்’ போல யுவன்-மஹிமா காதல் அத்தியாயம். அவர்களும் விளையாட்டாகவே காதலிக்கிறார்கள். 'லாஸ்ட் பெஞ்ச் ரவுடி’களாக அலப்பறை கொடுக்கும் பிளாக் பாண்டி அண்ட் கோ-வின் காமெடிகள் இயல்பாக ரசிக்கவைக்கின்றன.

சினிமா விமர்சனம் : சாட்டை

அரசுப் பள்ளி ஆசிரியர்களின் மெத்தனம், தனியார் பள்ளிகளின் கொள்கைகள், மாணவிகளிடமே 'கா’முகம் காட்டும் 'ஓநாய் ஆசிரியர் கள்’ எனப் பள்ளிக்கூடங்களின் இன்றைய கலவர நிலவரத்தை உள்ளும் புறமுமாகக் காட்சிப்படுத்தி இருக்கிறார்கள். இருந்தும்... மாணவர் கள் போட்டிகளில் ஜெயிக்கும் இறுதிக் காட்சிகளிலும் ஆசிரியர்கள் மனம் திருந்தும் சம்பவங்களிலும் 'டெம்ப்ளேட்’ நாடகத்தனம். எல்லாவற்றுக்கும் கருத்து சொல்லும் சமுத்திரக்கனி, மஹிமாவை விடாமல் யுவன் இம்சிக்கும்போது மட்டும் மௌனம் சாதிக்கிறாரே... ஏன்?

ஆயிரம் தயாளன்கள் உருவாகாவிட்டாலும், இரண்டு 'சிங்கபெருமாள்’கள் திருந்தினாலே... அது 'சாட்டை’க்குக் கிடைத்த வெற்றிதான்!