'தலைநகரம்' பண்ணும்போது, 'இதுதான் நாம ஹீரோவா நடிக்கிற முதல் படம்.

இதேதான் கடைசிப் படமும்!'னு நினைச்சேன். காரணம், மக்கள் என்னை ஹீரோவா ஏத்துப்பாங்களாங்கிற சந்தேகம். ஆசைக்கு ஹீரோவா ஒரு படம் பண்ணிட்டு, டைரக்ஷன் பக்கம் போயிரலாம்னுதான் ஐடியா. ஆனால், 'தலைநகரம்' ஹிட் என் தலையெழுத்தை மாத்திடுச்சு. இப்போ ஐந்து வருட இடைவெளிக்குப் பிறகு, டைரக்ஷனைக் கையில் எடுத்து இருக்கேன். நின்னு நிதானமா யோசிச்சுப் பிடிச்ச நல்ல ஸ்க்ரிப்ட்... 'நகரம்'!"-சிலாகித்துப் பேசுகிறார் சுந்தர்.சி.

"இந்த நகரத்திலும் ரவுடிகள், வடிவேலு எல்லாம் உலவுவாங்களா?"

"அதைத்தானே ஆடியன்ஸ் எதிர்பார்க்கிறாங்க. எந்த சினிமாவின் கதையும் முடியும் இடத்தில், நகரத்தின் கதை தொடங்கும். அப்படி ஆரம்பிக்கிறது எனக்குச் சவாலா இருந்தது. ரவுடியாக இருந்து திருந்தியவனின் வாழ்க்கைதான் கதை. ஆனால், படத்தில் ரவுடியிஸம், அரிவாள் எல்லாம் கிடையாது. இந்தப் படத்தில் வடிவேலு இன்னும் இன்னும் ஸ்பெஷலா... 'ஸ்டைல் பாண்டி'யா வர்றார். 'வின்னர்' கைப்புள்ள, 'கிரி' வீரபாகு, 'தலைநகரம்' நாய் சேகர் மாதிரி, இந்த 'ஸ்டைல் பாண்டி'யும் கலக்குவார்!"

"உங்க மனைவி குஷ்பு தீவிர அரசியலில் இறங்கிட்டாங்க. அது உங்க சினிமா கேரியரைப் பாதிக்குமா?"

"நல்ல விஷயம்தானே! அரசாங்கம் சொல்ற

விஷயத்தையே குஷ்பு திருப்பிச் சொன்னப்போ, சிலர் அதைத் தப்பாத் திரிச்சுவிட்டுட்டாங்க. பிரச்னை களைக் கண்டு அவங்க சோர்ந்துபோகலை. நிமிர்ந்து எழுந்து நின்னாங்க. ரொம்பவே சின்ன வயசுல நடிக்க வந்தவங்க குஷ்பு. அப்பவே மூணு அண்ணன், அம்மா எல்லாரையும் வாழ வெச்சவங்க. வேதனைகளும் துயரங்களும் அவங்க வாழ்க்கையோடு கலந்த விஷயம். அதனால், அதைப்பற்றி கவலைப்படவே மாட்டாங்க. 'நீ உழைச்சது போதும். வீட்டில் உட்காரு'ன்னு சொல்லித்தான் கல்யாணம் பண்ணினேன். ஆனா,அவங்களால ஒரு இடத்துல சும்மா உட்கார முடியாது. அதனால, டி.வி, அரசியல்னு களம் இறங்கிட்டாங்க. குஷ்புவுக்கு அரசியல்ல ஒரு நல்ல இடம் காத்திருக்கு!"