மீண்டும் திரை அலைக்குள் அறிவுமதியின் தமிழ்த் தென்றல். 'இனி, சினிமா பாட்டு எழுத மாட் டேன்' என்று பிடிவாதம் பிடித்தவரை, இயக்குநர் கரு.பழனியப்பன் 'மந்திரப் புன்னகை'க்காக இழுத்து வந்திருக்கிறார்.

'எங்கே செல்லும் இந்தப் பாதை?' என்று 'சேது'வில் கேட்டவர். 'கவிதையே தெரியுமா... என் கனவு நீதானடி!' என்று 'ஜெயம்' படத்தில் சுட்டியவர். 'செம்பூவே... பூவே' என்று 'சிறைச்சாலை'யில் வர்ணித்தவர். 'பொய் சொல்லக் கூடாது காதலி, பொய் சொன்னாலும் நீயே என் காதலி' என்று 'ரன்' படத்தில் லயித்தவர்... 'இனி எழுத மாட்டேன்' என்று போனது திரைத் தமிழில் விழுந்த சிறு கீறலாகவே பார்க்கப்பட்டது.

"கரு.பழனியப்பனின் 'சதுரங்கம்' படத்தில்தான் இறுதியாக நான் எழுதினேன். திரைச்சூழல் மட்டுமல்ல; அரசியல் சூழலும் இணைந்துதான் பாட்டு எழுத வேண்டாம் என்று முடிவு எடுக்கவைத்தது. ஆனாலும், தனது எல்லாப் படங்களுக்கும் நான்தான் எழுத வேண்டும் என்று பழனிகட்டா யப்படுத்தி வந்தார். பிடிவாதமாக நானும் மறுத்து வந்தேன்.

இம்முறையும் அப்படித்தான் வந்தார். 'உங்களது தமிழ் என்படத் துக்கு நிச்சயம் வேண்டும்' என வந்து நின்றார். யோசிப்பதாகச் சொல்லி அவரை அனுப்பிவைத்தேன். ஆனால், இசையமைப்பாளர் வித்யாசாகருடன் கேரளாவுக்குச் செல்லும் பயணத் திட்டத்துக்குஏற் பாடு செய்துவிட்டார். அவரின் அன்புக் கட்டளையை என்னால் மீற முடியவில்லை" என்று மீண்டும் வந்த காரணத்தைச் சொல்லும் அறிவுமதி, இந்தப் படத்துக்காக எழுதியிருப்பது 'கண்ணன் பாட்டு'!

சுதா ரகுநாதனின் குரலோசையில் கேட்கப்போகும் அறிவு மதியின் தமிழோசையை வாசிக் கும் வாய்ப்பு கிடைத்தது.

என்ன குறையோ
என்ன நிறையோ
எதற்கும் நான்
உண்டென்பான்
கண்ணன்!

என்ன தவறோ
என்ன சரியோ
எதற்கும் நான்
உண்டென்பான்
கண்ணன்!

என்ன வினையோ
என்ன விடையோ
அதற்கும் நான்
உண்டென்பான்
கண்ணன்!

அதற்கும் நான்
உண்டென்பான்
கண்ணன்!

நன்றும் வரலாம்
தீதும் வரலாம்
நண்பன் போலே
கண்ணன் வருவான்!

வலியும் வரலாம்
வாட்டம் வரலாம்
வருடும் விரலாய்
கண்ணன் வருவான்!

நேர்க்கோடு வட்டம்
ஆகலாம்
நிழல்கூட விட்டுப்
போகலாம்!

தாளாத துன்பம்
நேர்கையில்
தாயாக
கண்ணன் மாறுவான்!

அவன் வருவான்
கண்ணில் மழை துடைப்பான்
இருள் வழிகளிலே
புது ஒளி விதைப்பான்!

அந்தக் கண்ணனை
அழகு மன்னனை
தினம் பாடி வா
மனமே!

உண்டு எனலாம்
இல்லை எனலாம்
இரண்டும் கேட்டு
கண்ணன் சிரிப்பான்!

இணைந்தும் வரலாம்
பிரிந்தும் தரலாம்
உறவைப் போலே
கண்ணன் இருப்பான்!

பனிமூட்டம் மலையை மூடலாம்
வழி கேட்டு பறவை
வாடலாம்!

புதிரான கேள்வி
யாவிலும்
விடையாக
கண்ணன் மாறுவான்!

ஒளிந்திருப்பான்
எங்கும் நிறைந்திருப்பான்
அவன் இசை மழையாய்
உலகினை அணைப்பான்!

அந்தக் கண்ணனை
கனிவு மன்னனை
தினம் பாடி வா
மனமே!

- "பாட்டைப் பார்த்தால் இது கண்ணன் பாட்டு மாதிரி தெரியவில்லையே?" என்று கேட்டால், அறிவுமதி சிரிக்கிறார். "உலகத் தமிழினம் இப்போது கவலையில் கரைகிறது. சோகத்தில் சுணங்கி இருக்கிறது.அவர் களுக்கு ஆறுதல் சொல்வதாக இதை எழுதினேன். கண்ணன் வரும் இடங்களில் எல்லாம் 'அண்ணன்' என்று மாற்றினால் பாடலே புதிய பரிமாணம் எடுக் கும்!"

கரு.பழனியப்பனுக்கு இது 'கண்ணன்' பாட்டு. அறிவுமதிக்கு இது 'அண்ணன்' பாட்டு. உங்களுக்கு கண்ணனைப் பிடிக்குமா... அண்ணனைப் பிடிக்குமா?