"'பிரமாதமான ஒரு ஸ்க்ரிப்ட் இருக்கு. நடிக்கிறீங்களா?"ன்னு இந்தியில் இருக்கிற கான்கள், கபூர்கள், தீபிகா படுகோன், வித்யாபாலன்னு யார்கிட்டேன்னாலும் போன் பண்ணிப் பேச முடியும். கதை சொல்லவும் முடியும். ஆனா, இங்கே ஆர்ட்டிஸ்ட்களோட மேனேஜரைக்கூட போனில் பிடிக்க முடியலை. எல்லாம் அவ்வளவு பிஸியா இருக்காங்க"- தலை கோதிச் சிரிக்கிறார் நடராஜன் சுப்ரமணியன் என்கிற நட்டு. 'பிளாக் ஃப்ரைடே', 'பரினீதா', 'ஏகல்வ்யா', 'ஜப் வி மெட்' என இந்தி பாக்ஸ் ஆபீஸ் படங்களின் ஒளிப்பதிவாளர். 'புரோக்கன் ஹார்சஸ்' என்கிற படம் மூலம் ஹாலிவுட்டில் கால் பதிக்கும் பரமக்குடிக்காரர். 'நாளை' என்ற படத்தின் மூலம் நடிகனாக அறிமுகமானவர், 'மிளகா'யில் ஆக்ஷன் அவதாரம் எடுத்திருக்கிறார்.

"ஒளிப்பதிவாளர்கள் படம் இயக்குவதுதானே வழக்கம். நடிக்க வர்றது புதுசா இருக்கே?"

" 'நாளை' இயக்குநர் உதயபானு மகேஷ்வர் என் நண்பன். 'நாளை' படத்தை அவர் டைரக்ட் பண்ணும்போது, மும்பைத் தமிழர் ஒருத்தர்தான் ஹீரோவா நடிப்பதா இருந்தது. கதைப்படி அவர் சென்னைத் தமிழில் பேசி நடிக்கணும். நான்தான் அவருக்கு சென்னைத் தமிழ் வாத்தியாரா இருந்தேன். ஷூட்டிங் ஆரம்பிக்கும்போது திடீர்னு அவரால் நடிக்க முடியலை. "மச்சான்... நீயே நடிச்சிரு!" உதயபானு சொன்னதைத் தட்ட முடியலை. விகடன் விமர்சனத்தில்கூட என் நடிப்பைப் பாராட்டி எழுதியிருந்தீங்க. 'தொடர்ந்து நடிக்கலாமோ'ன்னு அப்போதான் பொறி தட்டுச்சு. அப்படியே நடிப்பைத் தொடர்ந்திட்டேன்!"

" 'மதுரக்காரப் பசங்க நட்புக்காக உசுரையும் கொடுப்பாங்க'னு சப்-டைட்டில் போட்டு நீங்களும் அரிவாளைத் தூக்கிட்டு ஆக்ஷனுக்குக் கிளம்பிட்டீங்க..."

"ரவிமரியா ஆரம்பத்தில் என்கிட்ட சொன்ன கதை செம காரம். ஒரு மாஸ் ஹீரோ பண்ண வேண்டிய சரக்கு. 'நடிப்புக்கு நான் புதுசு. என்னால் இவ்வளவு விஷயங்களைத் தாங்க முடியாது தலைவா'ன்னு சொன்னதும், நாலே நாளில் கதையை மாத்தாமல் காரத்தை மட்டும் குறைச்சிட்டார். வன்முறையோ, ஆபாசமோ படத்தில் கிடையாது. மதுரைக்காரர்களுக்கே உரிய நக்கல் நையாண்டியோடு அவங்க வெள்ளந்தியான மனசைச் சொல்லியிருக்கோம். காவல் தெய்வமான கருப்பண்ணசாமிதான் 'மிளகா'வோட முதல் ஹீரோ. அடுத்தது கதை. அதற்கு அடுத்துத்தான் நான்!"

"இயக்குநர்கள் ஒரு குரூப்பா நடிக்கக் களம் இறங்கி இருக்காங்களே?"

"சிங்கம்புலி ஃபிரேம்ல வந்து நின்னாலே சிரிப்பு பொத்துக்கும். 'வாடா என் ஜிகிர்தண்டா'ன்னா, 'போடா என் பித்தளை அண்டா'ன்னு கவுன்ட்டர் டயலாக் அடிப்பார். 'சோறுன்னாலே சோழவந்தான் வரைக்கும் வருவானுங்க... பிரியாணின்னா பிரிச்சு மேய்வானுங்களே'னு சரவெடிகளைக் கொளுத்திப்போட்டுட்டே இருப்பார். நாமதான் கதைக்குத் தேவையானதைப் பொறுக்கி எடுத்து பொருத்திக்கணும். இப்பப் பரபரப்பான காமெடியன் ஆகிட்டார். இன்னும் பெரிய லெவலில் வருவார். எங்க இயக்குநர் ரவிமரியா, இளவரசு, ஜெகன்னாத், ஜி.எம்.குமார்னு பல இயக்குநர்கள் படத்தில் இயல்பா நடிச்சிருக்காங்க."

"படத்தைப் பார்க்கச் சொல்லி கரீனா கபூர், தீபிகா படுகோன், வித்யாபாலன் எல்லாம் டிரெயிலர்ல சிபாரிசு பண்றாங்களே?"

"நட்புக்காகத்தான். மும்பையில் சப்-டைட்டிலோட மிளகாவை ஸ்க்ரீன் பண்ணினேன். எல்லோருக்கும் பிடிச்சிருந்தது. எவ்ளோ பிரச்னைகள் இருந்தாலும், நான்கைந்து ஹீரோ, ஹீரோயின்கள் அங்கே சேர்ந்து நடிப்பாங்க. அந்த மாதிரியான ஒரு சூழல் தமிழ் சினிமாவில் நடக்கும்போது, நிறையப் படங்கள் வெற்றி அடையும்!"