டி.வி. டைம்!

''சினிமாவில் நடிக்கணும்.

ஒரே ஒரு படத்துல நடிச்சிட்டு சினிமாவைவிட்டே விலகிடணும். இதுதான் என் அதிகபட்ச சினிமா ஆசை. ஆனால், அந்த ஒரு சினிமா வாய்ப்பு பெஸ்டா இருக்கணும்'' என்கிறார் எஸ்.எஸ். மியூஸிக் பூஜா. தமிழை சுத்தமாகப் பேசவும் எழுதவும் கற்றுக்கொள்ளும் ஆர்வத்தில் இருக்கும் பூஜா, தன்னுடன் பேசுபவர்களைத் தமிழில் பேசச் சொல்லித் துன்புறுத்துகிறாராம்(!).

ஜெயா ப்ளஸ் டி.வி-யில் ஹலோ டாக்டர், லிவ் அண்ட் டைன் போன்ற நிகழ்ச்சிகளை நடத்தி வருபவர் சரண்யா. ''ராஜ் டி.வி-யில் 2 வருஷம், ஜெயா ப்ளஸ்-ல் 1 வருஷம்னு எனக்கு 3 வருஷ அனுபவம். பெரியார் பல்கலைக்கழகத்தில் கரஸ்ல பி.ஏ., ஜர்னலிசம் ஃபைனல் இயர் படிக்கிறேன். டைம்ஸ் நவ், என்.டி.டி.வி. மாதிரியான சேனல்ல நியூஸ் ரிப்போர்ட்டர் ஆகி, பல விஷயங்களை அம்பலப்படுத்தி கலக்கணும் என்பதுதான் என்னோட ஒரே லட்சியம். அதுவரைக்கும் ஜெயா பயணம் தொடரும்'' என்பவர் தன்னுடைய 'லிவ் அண்ட் டைன்' நிகழ்ச்சி

மூலம் உலகத்தின் எந்த மூலையில் இருப்பவர்களுக்கும் சென்னையில் உள்ள ஸ்டார் ஹோட்டல்கள், ரிசார்ட்டுகளைப்பற்றி அறிமுகப்படுத்தி வருகிறார்!
'ஸ்டார்ஸ் உங்களுடன்', 'லைட்ஸ் கேமரா ஆக்ஷன் கட்', 'கவுன்ட் டவுன்' என ஜெயா டி,வி-யில் சினிமா தொடர்பான நிகழ்ச்சிகளைத் தொகுத்து வழங்குகிறார் வினோ. ஹலோ எஃப்.எம்-ல் அவர் நடத்தும் 'அஞ்சலி அபார்ட்மென்ட்' நிகழ்ச்சி செம பிரபலம். ''அஞ்சலி அபார்ட்மென்ட் நிகழ்ச்சியில் ஒரு அபார்ட்மென்ட்டின் மேனேஜருக்கும், குடியிருக்கும் எனக்குமான பிரச்னைகள்தான் கதை. என் கேரக்டர் பேரு சந்திரமுகி. இப்போ நான் தமிழ்நாடு முழுக்கப் பிரபலம் தெரியுமா?'' என்பவருக்கு லீவு கிடைக்காததால் சம்மருக்குக்கூடசென்னையைத் தாண்ட முடியவில்லை என்பதுதான் இப்போது ஒரே பிரச்னை. இருந்தாலும், ஒருநாள் லீவில் திருப்பதி சென்று பாலாஜியைத் தரிசனம் செய்து திரும்பியிருக்கிறார் வினோ!

'நாதஸ்வரம்' சீரியலுக்காகப் பெரிய பட்டாளத்துடன் காரைக்குடிக்கே இடம்பெயர்ந்திருக்கிறார் 'மெட்டி ஒலி' திருமுருகன். படப்பிடிப்பு

மட்டுமின்றி எடிட்டிங், டப்பிங் என போஸ்ட் புரொடக்ஷன் வேலைகளையும் காரைக்குடியிலேயே முடித்துவிடுகிறார். எல்லாம் முடித்து எபிசோடு டேப் மட்டும் சேனலுக்கு வருகிறதாம். 'எல்லா வேலைகளையும் சென்னையிலேயே குவிக்காமல் இப்படிச் செய்வது பாராட்டப்பட வேண்டியது' என்கிறார்கள் சேனல் வட்டாரத்தில்!

ஜெயா டி.வி-யின் ஆல் டைம் ஃபேவரைட் நிகழ்ச்சி தேன்கிண்ணம். இதன் தொகுப்பாளர் ஸ்ரீதேவிக்கு சமீபத்தில்தான் திருமணம் நடந்தது. ''அடிப்படையில் நான் கிளாஸிக்கல் டான்ஸர். சின்ன வயசுல இருந்தே சுதாராணி ரகுபதிகிட்ட பரதம் கத்துக்கிட்டேன். எத்தனையோ மேடைகளில் பரதம் ஆடியிருக்கேன். எம்.ஓ.பி. வைஷ்ணவா கல்லூரியில் சோஷியாலஜி முடிச்ச கையோடு, ஜெயா டி.வி-க்கு வந்தேன். இப்போ வரைக்கும் ஜெயா பயணம் தடை இல்லாமப் போய்க்கிட்டு இருக்கு. இப்போ விசு சாருடன் சேர்ந்து 'சின்னச் சின்ன ராகம்' என்ற நிகழ்ச்சியைத் தொகுத்து வழங்கிட்டு இருக்கேன்'' என்கிறார் கண்கள் மின்ன!