Published:Updated:

ஆயிரத்தில் ஒருவன்

ஆயிரத்தில் ஒருவன்


. சினிமா விமர்சனம்
ஆயிரத்தில் ஒருவன்
ஆயிரத்தில் ஒருவன்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
.

ஆயிரத்தில் ஒருவன்

மிக முக்கியமான முயற்சிதான். திகில், த்ரில் இணைந்த இந்த ஃபேன்டஸி தமிழுக்குப் புதுசுதான். ஆனாலும், இவன் 'ஆயிரத்தில் ஒருவன்'தானா?

12-ம் நூற்றாண்டில் சோழ வாரிசையும், பாண்டியர்களின் குலதெய்வச் சிலையையும் ஒரு தீவில் பதுக்கிவைக்கிறார்கள் சோழர்கள். சில நூற்றாண்டுகளுக்குப் பிறகு ஒரு தொல்பொருள் ஆராய்ச்சியாளர் தொலைந்துபோக, அவரைத் தேடும் படலமாகவும், அந்தச் சிலையை மீட்டெடுக்கவுமாகப் புறப்படுகிற குழுவில் ரீமாசென், ஆன்ட்ரியா, கார்த்தி! பற்பல பலிகளுக்குப் பிறகு, இலக்கை அடைகிறார்கள். அங்கே, ஆச்சர்ய அதிர்ச்சியாகச் சில நூறு சோழ வம்சத்தினர் காலங்கள் கடந்தும் பிழைத்திருக் கிறார்கள். அவர்களின் மன்னனாக பார்த்திபன். திடீர்த் திருப்பமாக வில்லி அவதாரம் எடுக்கிறார் ரீமாசென். சோழர்களைப் பாதுகாத்து தாய் மண்ணுக்கு அழைத்து வரும் பொறுப்பு கார்த்தி கையில். யார் ஜெயித்தார்கள் என்பது கிளைமாக்ஸ்!

சில பல ஆங்கிலப் படங்களின் சாயல்கள் தெளித்த களம். சாகசம், காதல், மோதல், பீர், போர் எனப் பல விஷயங்களைக் கோத்து செம நீளமாகச் சொல்லியிருக்கிறார் இயக்குநர் செல்வராகவன். மெக்கனஸ் கோல்டு, மம்மி, அபோகலிப்டோ, டாவின்சி கோட் போன்ற ஹாலிவுட் ஹிட் படங்களின் சாயலிலேயே நகர்கிற கதையில், முதல் பாதி கவர்ச்சி ப்ளஸ் அதிர்ச்சி வசன ரகம். சோழ வம்சத்தினர் இன்னமும் ரகசியமாக வாழ்கிறார்கள் என்று துவங்கும் பின்பாதி குழப்ப ரகம்.

படத்தில் இரண்டு நாயகர்கள். முதல் பாதி கார்த்தி. இரண்டாவது பாதி ரீமாசென். ஆதிவாசிகளைப் பார்த்து அலறுவதும், ஆன்ட்ரியாவைப் பார்த்து உளறுவதுமாக காமெடி ரௌடியாக கார்த்தி. விதவித எக்ஸ்பிரஷன்களைக் கொட்டிக்கொண்டே இருக்கிறார். பேய் பிடித்ததும் கூச்சலிட்டபடியே கார்த்தியைச் சுடுவதில் இருந்து தூள் பறக்கிறது ரீமா ராஜ்ஜியம். விரகதாபம் காட்டி பார்த்திபனை வீழ்த்தத் துடிக்கும் காட்சிகளில் கில்லி வில்லி. பேய் பிடிக்கும்போது மட்டும் நடிப்பு காட்டும் ஆன்ட்ரியா, மற்ற நேரங்களில் ரீமாவுக்குப் போட்டியாக இடுப்பு காட்டுகிறார்.

குனிந்தபடி நடந்து மிருகம் போலச் சண்டை போடும் சோழ மன்னன் பார்த்திபனின் பாடி லாங்குவேஜ் வித்தியாசம். ரீமாவின் சூழ்ச்சியில் ஏமாந்து கண் கலங்கும்போதும், இயந்திரத் துப்பாக்கிகளைப் பார்த்து 'இது என்ன களம்?' என்று வியப்பு காட்டும்போதும்... அப்ளாஸ்! ஆற்றங்கரையோரம் 'தங்களைக் காப்பாற்ற சோழர்களின் கப்பல் வந்துவிட்டது' என்று விழி விரித்து உயிர் உறையுமிடத்தில் ஈழத்தை நினைவூட்டும் வலி.

ஆயிரத்தில் ஒருவன்

தமிழில் ஒரு புதிய கதைக் களத்தைப் படைத்திருக்கும் செல்வராகவன் குழுவினரின் ஆர்வம் நிச்சயம் பாராட்டுக்குரியது. எத்தனை அசுரத்தனமான உழைப்பு!

ஆனால், பின்பாதி முழுக்க ஏன் இத்தனை குழப்ப நாடகங்கள்? விருந்தோம்பலுக்கும் தாய் உள்ளத்தின் பரிவுக்கும் பேர் பெற்ற சோழப் பேரரசின் வழி வந்த மன்னன், தனது மக்களைத் தானே கொன்று, நரபலியிட்டுக்கொண்டா இருப்பான்? தனது கால் பதிக்க வளைந்து நிற்பவர்களின் தலையைச் சீவிக் கொல்லும் கொடுங்கோலனாக வளைய வரும் அந்தச் சோழன் ஜெயிக்க வேண்டும் என்று நாம் எப்படி எதிர்பார்க்க முடியும்? கடல், காட்டுவாசிகள், காவல் வீரர்கள், பாம்புகள், பசி, தாகம், புதைகுழிகள், கிறுக்குப் பிடிக்கவைக்கும் கிராமம் என அமானுஷ்யச் சக்திகள் பல படைத்த சோழர்களுக்கு, உண்ண உணவு தேடுவது மட்டும் சிரமமாக இருக்குமா என்ன? ஏழு அபாயங்களைத் தாண்டினால்தான் அடைய முடியும் சோழர் பூமி என்று ஏக பில்ட் -அப் கொடுக்கிறார்கள். ஆனால், கிளைமாக்ஸில் ஒரு மொபைல் காலுக்கே ராணுவப் படை ஹெலிகாப்டரில் வந்து குதிக்கிறது. அரசாங்க அமைச்சரும் ராணுவ அதிகாரியும் பாண்டிய வம்சத்தைச் சேர்ந்தவர்கள் என்பதற்காக இந்திய ராணுவம் கேள்விகளே கேட்காமல் ஓர் அயல் நாட்டில் சோழர்களைச் சோலி முடிப்பது என்ன லாஜிக்?

படம் நெடுக வரும் கிராஃபிக்ஸ் காட்சிகளில் சொதப்பல்களே அதிகம். சோழர் வழி வந்த தமிழர்களை ஏதோ ஆப்பிரிக்கக் காட்டு ஆதிவாசிகள் ரேஞ்சுக்குக் காட்டியிருப்பது நெருடல்! 'சொல்லுங்கோள்', 'வெல்லுங் கோள்' என்று அவர்கள் பேசுகிற தமிழும் பிடிபடுவதாக இல்லை! போரில் பார்த்திபன் தோற்ற பிறகும் காட்சிகளை வளர்த்து நீட்டி முழக்கி... 'போதுமடா சாமி, ஆளை விடுங்கோள்!' என்று அலறவைக் கிறார்கள்.

ஆயிரத்தில் ஒருவன்

ஜி.வி.பிரகாஷின் இசையில் 'உன் மேல ஆசைதான்...', 'ஓ.. ஈசா...' பாடல்கள் தாளம் போடவைக்கின்றன. வைரமுத்துவின் நெஞ்சைக் கனக்கச் செய்யும் 'நெல்லாடிய நிலமெங்கே...' பாடல் வரிகளின்போது, ரீமா மோகம்கொண்டு பார்த்திபனைப் படுத்தியெடுத்துக்கொண்டு இருப்பது கொடுமையடா சாமி!

ராம்ஜியின் கேமரா காடு, மலை, மேடு என்று சுற்றிச் சுழன்று கதையைக் கைப்பிடித்து அழைத்துச் செல்கிறது. சந்தானத்தின் கலை இயக்கத்தில் சிதைந்த சோழர் பூமிகள் கச்சிதக் காட்சிகள்!

பலவீனமான, குழப்பியடிக்கும் திரைக்கதையால் சோழர் பூமி சிதைவுகளுக்குள் சிக்கிச் சிதைந்து மறைந்து போகிற ஒருவன்!

- விகடன் விமர்சனக் குழு

 
ஆயிரத்தில் ஒருவன்
ஆயிரத்தில் ஒருவன்