காப்பியடிக்க முடியாத கமல்!

பெண்கள்தான் எவ்வளவு சீக்கிரம் வளர்ந்துவிடுகிறார்கள்! குட்டிப் பெண்ணாக விழாக்களில் பார்த்ததும், அழகுப் பெண்ணாக போட்டோசெஷனில் பார்த்ததும்தான் மனதுக்குள் ஓடியது. இப்போது என் எதிரே இசையமைப் பாளராக, நடிகையாக அமர்ந்திருந் தார் ஸ்ருதி. கமல் படத்தின் இசையமைப்பாளர் என்கிற புரமோஷனால் இன்னும் அழகாகி இருக்கிறார். கீ-போர்டில் விரலும், பதில்களில் குரலும் விளை யாடிக்கொண்டே இருக்கின்றன.

"தமிழில் இசை யமைப்பாளராக, இந்தியில் நடிகையாக அறிமுகமாகி றீர்கள். உங்கள் மேல் இருக்கிற எதிர்பார்ப்பை எப்படிச் சமாளிக்கப் போறீங்க?''

"ரொம்ப நல்ல வாய்ப்புகள். இசையமைப்பாளராக என் பாடல்களைக் கேட்டுட்டு நீங்கதான் சொல்லணும்.

நான் சந்தோஷப்பட்ட படம் 'லக்'. ஒரு புது ஹீரோயினுக்கு முதல் படத்தில் திறமையைக் காண் பிக்க அவ்வளவா சந்தர்ப்பங்கள் அமையாது. ஆனா, நான் லக்கி. இந்தப் படத்தில் என் திறமையை நிரூபிக்க அவ்வளவு ஸ்கோப் இருக்கு. இன்னைக்கு பெண்கள் மத்தியில் இம்ரான், லேட்டஸ்ட் இதயத் திருடன். அவர் என் நண்பர். முதல் படத்தில் நண்பனே ஜோடியாக நடிக்கக் கிடைத்தது சந்தோஷமா இருக்கு. ஆக்ஷன், த்ரில்லர்னு போகிற படம் 'லக்'. படத்தில் எனக்கு ஃபைட் இருக்கு. நிறைய பிராக்டீஸ் பண்ணி முன்பைவிட இப்போ ஈஸியா பல்டி அடிக்கிறேன். சஞ்சய்தத், மிதுன்ஜின்னு உடன் நடிச்சவங்க எல்லாம் அப்பா பேருக்காக எனக்கு முழு சப்போர்ட் பண்ணினாங்க. அப்பா எவ்வளவு மனிதர்களையும் மரியாதையையும் சம்பாதிச்சு வெச்சிருக்கார்னு உணர்கிறேன்!''

"கமல் பொண்ணு என்பதாலேயே நிறைய வாய்ப்பு கிடைக்கும். அப்பாவுக்கு இருந்த போராட்டம், வலி இதெல்லாம் உணர முடியுதா?''

"இசை, மாடலிங், சினிமான்னு எல்லாமே என்னோட முயற்சிகள்தான். அப்பா எப்பவும் 'உன் வாழ்க்கையை நீதான் முடிவு பண்ணணும்'னு சொல்வார். அதில் பிடிவாதமாவும் இருப்பார். அதிகபட்சமா அப்பாவிடம் இருந்து அபூர்வமா ஆலோசனைகள் கிடைக்கும். எங்களைச் சுயமான பெண்களாகவே வளர்த்தார். 'லக்' படத்தின் கதையை மட்டும் கேட்டார். மற்றவை எல்லாமே என் முடிவு. என் திறமைகளின் மூலமாகவே நான் வாய்ப்பு களைத் தேடிக்கொள்கிறேன். அப்பாவின் பெயரை நான் பயன்படுத்துவது இல்லை. ஒரு விஷயம்... அப்பாவை யாரும் பின்பற்ற முடியாது. ஏன்னா... அவரை யாரும் காப்பியடிக்கவே முடியாது!''

"தமிழில் யாரோடு நடிக்க ஆசை?''

"அப்பாவோடு நடிக்கத்தான் ஆசை. ஏதாவது ஒரு கேரக்டரில் அவரோடு நடிக்க வேண்டும். மற்றபடி, ஒவ்வொரு ஹீரோவுக்கும் தனித்தனியாக இமேஜ், திறமைகள் இருக்கும். தனிப்பட்ட விதத்தில் ஒவ்வொருவருமே ஸ்பெஷல் தான். 'இவர்தான் என் ஃபேவரைட்'ன்னு யாரையும் குறிப்பிட்டுச் சொல்ல முடியாது. இது நழுவுற பதில் இல்லை. எல்லாரோடும் நடிக்க எனக்கு விருப்பம் உண்டு!''

"தன் மகள் என்பதற்காக கமல் 'உன்னைப் போல் ஒருவன்' படத்துக்கு மியூஸிக் டைரக்டராக உங்களை ஆக்கியிருக்க மாட்டார். எப்படிக் கிடைச்சது இந்த வாய்ப்பு?''

"ரொம்ப கரெக்ட்! அப்பாவுக்குத் தொழிலில் செல்லம் கொடுப்பது பிடிக்காத விஷயம். அப்பா என்னை நிறைய கவனிச்சுக்கிட்டே இருந்திருக்கார். நான் வாசிக்கிறதை நிறைய முறை கேட்டிருக்கார். இந்தப் படம் ஆரம்பிச்சதும், 'நீ வொர்க் பண்றியா?'ன்னு கேட்டார். எனக்கு உலக சந் தோஷம். ஆனா, அதுக்கு முன்னாடி அவர் எனக்கு நிறைய டெஸ்ட் வைச்சார். பாஸ் ஆனதால் வாய்ப்பு கொடுத்தார். நிச்சயம் அவரோட எதிர்பார்ப்பை நிறைவு செய்வேன். 'உன்னைப் போல் ஒருவனி'ல் ஒரு புது இசையை அறிமுகப்படுத்தப் போறேன். இது நீங்க பார்க்காத வேற ஸ்ருதி!''

"உங்க அப்பா, அம்மா ரெண்டு பேருமே அறிவுத் தேடல்களில் இருந்தவங்க. இப்படி ஒரு சூழலில் அன்பு உங்களுக்குத் தாராளமாகக் கிடைச்சுதா?''

"ரெண்டு பேருமே அன்பில் குறை வைக்காதவர்கள். அப்பா வெளியில்தான் பெரிய ஸ்டார். வீட்டுக்குள் சராசரித் தகப்பனைவிட பல மடங்கு அன்பு செலுத்துவார். எவ்வளவு வேலை இருந்தாலும் அப்பா எங்களைத் தவிக்கவிட்டதில்லை. நீங்க ரிப்போர்ட்டர் என்பதால், வீட்டுக்குப் போனா லும் நியூஸ் டைப் பண்ணிட்டே இருப்பீங்களா என்ன? ரிப்போர்ட்டர்ங்கிற வேலையை வீட்டு வாசலிலே கழற்றி வைப்பீங்கதானே!

எல்லார் மாதிரியும்தான் என் அப்பாவும். எல்லோரையும்விட கூடுதல் பிரியமா இருப்பதும் என் அப்பாதான்!''

"உங்க அம்மா இப்போ அருமையான படங்களில் நடிச்சு, தேசிய விருது வரைக்கும் வந்துட்டாங்க. அவரைப் போல ஆகும் எண்ணம் உங்களுக்கு உண்டா?''

"நான் ஏன் அப்பா மாதிரியும், அம்மா மாதிரியும் இருக்கணும்? வேறு மாதிரி இருந்துட்டுப் போறேனே? வாழ்க்கையை அந்தந்த நேரத்துக்குப் பரிசா கொடுக் கணும். இன்னொரு கமல் வேண்டாம்; இன்னொரு சரிகாவும் வேண்டாம். நான் ஸ்ருதியாக வளர, வாழ நினைக்கிறேன். என் விருப்பத்துக்கும், தகுதிக்கும் தேவையான இடத்தை அடைவேன்!''