"ஏன் சார், இவங்களையே ஹீரோயினா நடிக்க வெச்சிருக்கலாமே?'' என்றால், "கேட்டுப் பார்த்தேனே... 'எந்த டி.வி.டி-யும் பார்க்காம ஒரு ஹாலிவுட் படம் எடுங்க. அதில் நடிக்கிறேன்'னு சொல்லிட்டாங்க. புத்திசாலிப் பொண்ணு சார்''- சந்திப்புக்கு சரி ஜாலி பிள்ளையார் சுழி போடுகிறார் இயக்குநர் வெங்கட் பிரபு.

வறுத்தெடுக்கிற சென்னை வெயிலுக்குச் சில்லென்று இருக்கிற சௌந்தர்யாவின் ஸ்டுடியோவே குட்டி கோவாதான்!

'நீங்கதான் பாஸ் இப்போ ரிப்போர்ட்டர்' என்றதும் வெங்கட் பிரபு முகத்தில் எக்ஸ்ட்ரா எனர்ஜி. "பொதுவா புரொடியூசர்தான் கேள்வி கேட்பாங்க. இப்போ, என்னோட டர்ன். பார்ட்டி சிக்கிக்கிட்டாங்க''-சுட்டுவிரலை நெற்றிப்பொட்டில் தட்டிய வாறு ரவுசை ஆரம்பிக்கிறார் வெங்கட் பிரபு.

"முதன்முதலா புரொடக்ஷனில் இறங்குறீங்க... பெரிய ஹீரோக்களை வெச்சுப் படம் பண்ண முடியும். ஏன் வெங்கட் பிரபு அண்ட் கோ?'' என்று தன்னைப் பற்றிய பிட்டைப் போட்டார் பிரபு.

" 'சென்னை-28' படத்துக்கு கிராஃபிக்ஸ் வொர்க் ஆக்கர் ஸ்டுடியோவில்தான் நடந்தது. அப்பவே உங்களோடு சேர்ந்து ஒரு படம் பண்ணணும்னு முடிவு பண்ணியிருந்தேன். அதுக்குள்ள 'சரோஜா' கமிட் ஆகிட்டீங்க. உங்க இரண்டு படங்களையும் ஒரு ரசிகையா ரசிச்சுப் பார்த்தேன். ஆக்கர் ஸ்டுடியோவோட முதல் தயாரிப்பு, உங்களோட ஹாட்ரிக் வெற்றி இரண்டும் சேர்ந்து இருந்தா நல்லா இருக்குமே... அதான் 'கோவா'.

முதல் இரண்டு படங்களையும்விட, இன்னும் கலர்ஃபுல்லான கதையும், கூடுதல் காமெடி கோட்டிங்கும் வேணும்னு சொன்னேன். அடுத்த பத்தாவது நிமிஷத்தில், நான் எதிர்பார்த்த மாதிரி நீங்க ஒரு கதை சொன்னீங்க. எனக்கு ரொம்ப ஆச்சர்யமா இருந்தது பிரபு'' என்று சிரிக்கிறார் சௌந்தர்யா.

"ஹைய்யோ... நான் மனசுக்குள்ள ஒரு ஸ்க்ரிப்ட் ரெடி பண்ணி வெச்சிருந்தேன். நீங்க கேட்டதும் பில்டப் கொடுக்கிறதுக்காகக் கொஞ்ச நேரம் தீவிரமா யோசிக்கிற மாதிரி பாவ்லா பண்ணிட்டு, டக்குன்னு ரெடியா இருந்த கதையை எடுத்துவிட்டேன்'' என்று வெங்கட் பிரபு தன் தொழில் ரகசியம் சொல்லிச் சிரிக்கிறார்.

"ஆமாங்க, சினிமாவுக்குள் என்ட்ரி கொடுக்கப் போறீங்கன்னு தெரிஞ்சதும் ரஜினி சார் என்ன ரியாக்ட் பண்ணினார்?'' என சௌந்தர்யாவிடம் கேட்டார் வெங்கட்.

"விஷூவல் எஃபெக்ட்ஸ், போஸ்ட் புரொடக்ஷன், அனிமேஷன், டைரக்ஷன்னு ஒவ்வொரு ஸ்டெப்பா ஏறிட்டு இருக்கும்போதே அடுத்து நான் படம் தயாரிக்கப் போறேங்கிறதை அப்பா கண்டுபிடிச்சிட்டார். ஒரே நேரத்தில் நாலஞ்சு வேலை பண்ண முடியும்கிற நம்பிக்கை என்கிட்டே இருந்தது. எதுவும் எனக்குச் சுமையாகிடக் கூடாதுங்கிற கவலை அப்பாகிட்டே இருந்தது. 'முடியுமா கண்ணா... பிராக்டிகலா இருந்தா துணிஞ்சு பண்ணு. இல்லேன்னா, யோசிச்சுப் பண்ணு'னு சொன்னார். ஒருவிதத்தில் அவருக்கு நம்பிக்கை வந்ததுக்கு உங்க டைரக்ஷனும் ஒரு காரணம். அப்பாவுக்கு உங்க படங்களைப் பிடிக்கும்'' என்றதும், வெங்கட் பிரபுவின் முகத்தில் அலை அலையாகச் சந்தோஷம்.

"உங்க வாழ்க்கையில் நடந்த சுவாரஸ்யமான விஷயங்களைச் சொல்லுங்க. அது காதலாக்கூட இருக்கலாம்'' என்று சௌந்தர்யாவிடம் கேட்டுவிட்டு நம்மைப் பார்த்துக் கண்ணடித்தார் வெங்கட் பிரபு.

"நான் ஆறாவது படிக்கும்போது எங்க பி.டி. சார் மேல் எனக்கு ஃபர்ஸ்ட் க்ரஷ் வந்தது. ஒரு உண்மையைச் சொல்றேன்... இப்போ நான் தனியாதான் இருக்கேன். எனக்குப் பிடிச்ச மாதிரி பையன் கிடைச்சா அப்பா, அம்மா முன்னாடி கொண்டுபோய் நிறுத்திச் சம்மதம் கேட்பேன். அவங்க சம்மதத்துடன்தான் என் வாழ்வின் எல்லா நல்ல விஷயங்களும் நடக்கும்!'' என்று சௌந்தர்யா சொல்லி முடிக்க, "ஹப்பா... தமிழ்நாட்டுப் பசங்களுக்கு இப்போதான் நிம்மதி'' என்று வெங்கட் கமென்ட் அடிக்க, செல்லமாக முறைத்த சௌந்தர்யா, "உங்களுக்குத்தான் எக்கச்சக்க ஃப்ரெண்ட்ஸ் இருக்காங்களே... யாரையாவது ஸ்மார்ட்டான ஒரு பையனை எனக்கு அறிமுகம் பண்ணிவெச்சிருக்கீங்களா?'' என்று கேட்க, வாய்விட்டுச் சிரித்துவிட்டார் வெ.பிரபு.

"ஜெய், பிரேம்ஜின்னு என்கூட இருக்குறதெல்லாம் மொக்க பசங்க. அவங்களை நினைச்சா எனக்கே கேரிங்கா இருக்கும். அவ னுங்களை எப்படா கழட்டிவிட லாம்னு பார்த்துக்கிட்டு இருக்கேன்'' என்று பஞ்ச் வைத்த வெங்கட்,

"சரி... ரஜினி சார் அரசியலுக்கு வருவாரா... மாட்டாரா? வந்தா, அவர் எப்படிப்பட்ட ஒரு அரசியல்வாதியா இருப்பார் மேடம்?'' என்று பொலிட்டிக்கல் டிராக்கில் மாறினார்.

"நல்லது நடக்கணும்னு எல்லா ரும் எதிர்பார்க்குறாங்க. அதில் நானும் ஒருத்தி. அப்பா அரசிய லுக்கு வருவாராங்கிறது உங் களை மாதிரியே எனக்கும் தெரியாது. ஆனா, அப்பா அரசியலுக்கு வந்தா... மொத்த உலகத்தையும் திரும்பிப் பார்க்கவைக்கிற மாதிரி ரோல்மாடல் அரசியல் வாதியா இருப்பார். அவர் எந்த இடத்தில் இருந்தாலும் சென்டர் ஆஃப் அட்ராக்ஷனாத்தான் இருப்பார். அவர் பஸ் கண்டக்டரா இருந்தபோது அந்த ஊரிலேயே அவர்தான் ஃபேமஸான ஆளாம்! இப்போ நடிகரா இருக்கும்போது இண்டஸ்ட்ரிக்கே சுவரா இருக்கிறார். அதே மாதிரி அரசியலுக்கு வந்தா, மரியாதையான இடத்தில் இருப்பார். ஏன்னா, அப்பாவுக்கு நல்லது மட்டும்தான் செய்யத் தெரியும்'' என்றதும், 'உய்ய்' என்று விசிலடித்து வரவேற்ற வெங்கட் பிரபு,

"அரசியல் ரஜினி எப்படி இருப்பார்னு சொல்லிட்டீங்க. தாத்தா ரஜினி எப்படி இருக்கார்?'' என்றார்.

"எவ்ளோ வேலை இருந்தாலும், யாத்ராவுடன் ஒரு மணி நேரம் விளையாடலைன்னா, அப்பாவுக்குத் தூக்கம் வராது. எங்க வீட்டில் ரெண்டு பேருக்கு முழுச் சுதந்திரம் உண்டு. ஒண்ணு... யாத்ரா. இன்னொண்ணு... நந்தான்னு குட்டி நாய். ரெண்டு பேருக்கும் எந்த கன்ட்ரோலும் இல்லை. இந்த ரெண்டு பேரும் அப்பா ரூமுக்குள் எப்போ வேணும்னாலும் போய் வரலாம்.

யாத்ரா இப்போதான் பிறந்த மாதிரி இருக்கார். போன வாரத்தில் இருந்து ப்ளே ஸ்கூல் போக ஆரம்பிச்சிட்டார். தனுஷ், தெலுங்குக் குடும்பத்தைச் சேர்ந்தவர் என்பதால், அப்பா யாத்ராவுடன் தெலுங்கில் தான் பேசுவார். 'ஏமிரா?'ன்னு தாத்தா குரல் கேட்டதும் யாத்ரா முகத்தைப் பார்க்கணுமே... பரபரப்பாகிருவான். அப்பாவுக்கு தமிழ், தெலுங்கு, கன்னடம், ஹிந்தி, மராட்டி, இங்கிலீஷ், மலையாளம் எல்லாமே எழுதவும், படிக்கவும், பேசவும் தெரியும். அப்பா டிரெய்னிங்கில் யாத்ரா பத்து வயசு ஆகிறதுக்குள்ளயே எப்படியும் நாலஞ்சு மொழிகளில் பேச ஆரம்பிச்சிருவான்னு நினைக்கிறேன்'' என்கிறார் சௌந்தர்யா சந்தோஷக் கண்களோடு.

"மறுபடியும் கேட்கிறேன். மனசு மாறினா, நீங்க சினிமாவுக்கு நடிக்க வருவீங்களா?'' என்கிறார் வெங்கட்.

"நடிக்கச் சொல்லி நிறையப் பேர் கேட்கிறாங்க. எனக்கு நடிப்பதில் விருப்பம் இல்லை. ஆனா, ஒருவேளை மனசு மாறினா, நடிக்க வரலாம். எல்லாத்தையும் கடவுள்தான் தீர்மானிக்கணும்!'' என்றபடி மேலே கை காட்டு கிறார் சௌந்தர்யா.

அப்படியே ரஜினி!