ரஜினி, கமல், விஜய், அஜீத்களே வெரைட்டி விருந்து வைத்தால்தான்

தியேட்டருக்குள் கூட்டம் வருகிறது. சேனல்களில் மட்டும் உட்டாலக்கடி அடித்துக்கொண்டே இருக்க முடியுமா? 'கனாக் காணும் காலங்கள்' சக்சஸ் ஃபார்முலாவில் லொகேஷன் மட்டும் மாற்றம் செய்து, அடுத்த ஜில் ஜாலி கலாட்டாவை ஆரம்பித்துவிட்டது விஜய் டி.வி. இதுவரை சிட்டி பள்ளிக்கூடத்தில் ஜுஜுலிப்பான சேட்டைகள் செய்து வந்த மாணவர்கள் கும்பல், இனி அலப்பறை கொடுக்கவிருப்பது பட்டி பள்ளிக் கூடத் தில்! தேனி குமரகுருபரர் மேல்நிலைப் பள்ளிக்கூடம்தான் இனி 'கள்ளிக்காட்டுப் பள்ளிக்கூடம்!'

கிராமத்து மாணவர்கள் என்றால் வழிய வழிய எண்ணெய் தேய்த்து, வழித்துச் சீவி அடக்க ஒடுக்கமாக இருப்பார்கள் என்று எதிர்பார்த்த எனக்கு ஏமாற்றம். யூனிஃபார்ம் அணிந்த சண்டியர்களாக சூட்டிங் ஸ்பாட்டில் சலம்பிக்கொண்டு இருந்தார்கள் பயபுள்ளைகள்!

''டேய் மாப்ள! நீ எப்புடிறா பத்தாப்பு பாஸ் பண்ணே?'' என்ற குண்டூசியிடம், ''அதெல்லாம் சப்பை மேட்ரு. பரீட்சை பேப்பர்ல, 'சார், என்னை அப்புடி இப்புடி பார்டர்ல பாஸ் பண்ண வெச்சுட்டாக்கூட, நான் மிலிட்டரியில சேர்ந்து காஷ்மீர் பார்டருக்கு ஓடிப் போயிருவேன்'னு எழுதிவெச்சேன். 'இந்தப் பய நொம்பளமே வேண்டாம்னு நினைச்சோ என்னவோ, அந்த வாத்தி ஃபுல் மார்க் போட்டுட்டாப்ல!'' என்றான் இட்லி. உடனே 'கொல்'லென்று வெடித்துச் சிரிக்கிறது மொத்த குரூப்பும்.

அவர்களைக் கொஞ்சம் கவலையுடன் பார்த்துக்கொண்டு இருந்தார் தொடரின் இயக்குநர் ராம்குமார். ''அலும்பு பண்றானுங்க சார். சின்ன வயசுல எங்க வாத்தியார் என்னை மேய்ச்சல் வேலைக்குத்தான் லாயக்குனு சொன்னது சரியாத்தான் இருக்கு. காரியாப்பட்டி-தேனி இந்த ரெண்டு ஊரு ஆட்களுக்கும் பரம்பரை பகை. தேனி பள்ளிக்கூடத்துக்குக் காரியாப்பட்டிக்காரங்க தீ வெச்சுருவாங்க. அதுல இருந்து தேனி ஸ்கூல்ல காரியாப்பட்டி ஆளுகளுக்கு நோ அட்மிஷன். ஆனா, காரியாப்பட்டி ஸ்கூல்ல பத்தாம் கிளாஸ் வரைக்கும்தான் இருக்குறதால, அதுக்கு மேல படிக்க மதுரை, திண்டுக்கல்னு சுத்தி அலையிறாங்க காரியாப் பட்டி பசங்க. அப்ப தேனி ஸ்கூலுக்கு வர்ற ஹெட்மாஸ்டர், காரியாப்பட்டி பசங்களை ஸ்கூல்ல சேர்க்குறாரு. அதுக்கடுத்து நடக்குற அடிபிடி அதிரடி தடாலடி கலாட்டாதான்...'' என்பவரை முடிக்க விடாமல் சுற்றிச் சூழ்கிறது கூட்டம்.

''உங்க அருமை பெருமைகளை அளந்தது போதும்... புவாவுக்கு ஏற்பாடு பண்ணுங்க. இந்நேரம் நாங்க ஸ்கூல்ல இருந்தோம்னா மணியடிச்சதும் சத்துணவு வந்திருக்கும். கொலைப் பட்னி போட்டுக் கொல்றாருடா இந்தத் தொப்பி போட்ட இயக்குநரு!'' - மாணவர்கள் மட்டையடி அடிக்க, உதட்டைப் பிதுக்கும் ராம்குமார் 'முடியல்ல்ல' என்றபடி லஞ்ச் பிரேக் விட்டார்!