இது சிம்புவுக்குத்தான் உண்மையான டமால் டுமீல் தீபாவளி!

சும்மாவா... பையன் புதிதாக வாங்கிய ஒரு கோடி ரூபாய் காரில் அல்லவா ஊ...லலல்லா ஊர்வலம் வருகிறார். பி.எம்.டபிள்யூ எக்ஸ் 6. தமிழ்நாட்டில் இப்போதைக்கு சிம்புவிடம் மட்டுமே இருக்கும் கார். கிட்டத்தட்ட சாலையில் நழுவும் சொர்க்கம். ஸ்டைல், வசதி, வேகம் என ஸ்போர்ட்ஸ் கார் பிரியர்களின் அத்தனை தேவைகளையும் சிங்கிள் க்ளிக்கில் ஓ.கே. செய்யும் கார்.

''நிறையப் பேர் என்னை பார்ட்டி, பப்னு திரியும் ஆளுன்னு நினைச்சுட்டு இருக்காங்க. ஆனா, நான் கார், பைக்னு டாப் கியர்ல பறக்கும் பையன். ரோட்ல வேகமாகப் பறக்கும் கார், பீச் மணலில் சிக்கித் திணறும். அதில் ஓடுற வண்டி ஹில்ஸ்ல ஏற முடியாம முனங்கும். பெர்ஃபார்மன்ஸ் இருந்தா லுக் இருக்காது. இது எல்லாமே சேர்ந்த காம்பினேஷன்ல ஒரு கார் தேடிட்டே இருந்தேன். அப்பதான் பி.எம்.டபிள்யூ எக்ஸ் 6 காரை லாஞ்ச் பண்ணாங்க. ஆர்வத்தில், இந்த காரைப்பத்தி விசாரிச்சா, நான் எதிர்பார்த்ததுக்கும் மேலே சங்கதிகள் இருந்தன. இதை எஸ்யூவி காருன்னோ, ஸ்போர்ட்ஸ் கூபே காருன்னோ சொல்ல முடியாது. இரண்டும் கலந்த ஸ்டைலிஷ் காக்டெயில் கார். உடனே புக் பண்ணிட்டேன். போன வருஷமே புக் பண்ணிட்டாலும், அமெரிக்காவில் இருந்து இறக்குமதியாகி, இப்போதான் கைக்குக் கிடைச்சுது!'' என்பவர், கார் ஸீட்டில் இருக்கும் ஒரு பட்டனைத் தட்டுகிறார்.

டிரைவர் இருக்கை முன்னே, பின்னே, மேலே, கீழே என மடங்கி நெளிந்து ஒரு நிலைக்கு வருகிறது. ''ஓட்டுறவங்க வசதிக்கு ஏத்த மாதிரி டிரைவர் ஸீட்டை அட்ஜஸ்ட் பண்ணிக்கலாம். பவர் மெமரி ஸீட். கம்ப்யூட்டர்ல முன்னாடியே செட் பண்ணிட்டா, ஆள் உட்கார்ந்ததும் ஸீட் தன்னாலே அட்ஜஸ்ட் ஆகிடும். அப்புறம் ஸீட்டில் ரொம்ப நேரம் உட்கார்ந்தாலும் சூடாகாது. ஸீட்டுக்குள்ளேயே ஃபேன் இருக்கு. இது ஸீட்டை கூல்பண்ணிக்கிட்டே இருக்கும். ரிவர்ஸ் கேமரா, பஞ்சர் ஆனாலும் 100 கி.மீ. வரை ஓட்டக் கூடிய ரன் ஃபிளாட் டயர்ஸ்னு படா படா வசதிகள். சொல்லப்போனா ஒரு கோடி ரூபா இந்தக் காருக்கு கம்மியான விலைங்க!

கார் சென்னைக்கு வந்தாலும் உடனே நான் டெலிவரி எடுத்திடலை. என் லக்கி நம்பர் 6. அதனால 6-ம் நம்பர்ல ரிஜிஸ்ட்ரேஷன் நம்பர் கிடைக்கிற வரை காத்திருந்து, ரெண்டு வாரம் கழிச்சு டெலிவரி எடுத்தேன். சமத்துப் பையனா அப்பா, அம்மாவை கார்ல வெங்கடாஜலபதி கோயிலுக்குக் கூட்டிட்டுப் போய், பூஜை போட் டேன். அப்புறம் ஈ.சி.ஆர்ல ஒரு அழுத்து அழுத்தினேன் ஆக்ஸிலேட்டரை. டி.வி.டி. பிளேயர்ல ஃபாஸ்ட் ஃபார்வர்ட் பட்டன் அழுத்தினா காட்சிகள் பறக்கிற மாதிரி, காருக்கு வெளியே சென்னை பின்னாடி போச்சு. ஹெட் அப் டிஸ்ப்ளேவைப் பார்த்தா... மை காட் 220 கி.மீ. ஸ்பீடு காட்டுது வண்டி. எனக்கு கை, கால் நடுங்கிருச்சு. ஆனா, காருக்குள்ளே சின்ன அதிர்வுகூட இல்லை. ஸ்டார் ஹோட்டல் சூட் மாதிரி இருக்கு. அவ்வளவு ஸ்டெபிலிட்டி!'' என்கிறார் பெருமிதமாக!

''நான் இந்த கார்ல எங்கே போனாலும் என்னை ஒதுக்கிட்டு, கார்கூட நின்னுதான் போட்டோ எடுத்துக்குறாங்க. இப்போ விஜய் சார் இதே கார் சிவப்பு கலர்ல ஆர்டர் கொடுத்திருக்காரே!'' என்று ரகசியம் சொல்லிவிட்டு, பி.எம்.டபிள்யூ எக்ஸ் 6-ல் சிம்பு விஷ்ஷ்ஷ்ஷ்க்!