செரீனா வில்லியம்ஸ்

* 26-9-1981: அமெரிக்காவின் மிச்சிகன் மாகாணத்தில் ரிச்சர்டு வில்லியம்ஸ் - ஓரசீன் பிரைஸ் தம்பதிக்குப் பிறந்தார், செரீனா. தன் தந்தையைப் பார்த்து 3 வயதிலேயே டென்னிஸ் ஆடத் தொடங்கினார்.

* செரீனாவுக்கு 9 வயது. தன் மகள்களைச் சிறந்த டென்னிஸ் வீராங்கனைகளாக மாற்ற, 4,300 கிலோமீட்டர் தொலைவில் இருக்கும் ஃப்ளோரிடாவுக்கு இடம் மாறினார் ரிச்சர்டு.

* வில்லியம்ஸ் சகோதரிகளின் திறமையைக் கண்டு வியந்தார், பயிற்சியாளரான ரிக் மேக்கி. மற்ற சிறுமிகளைவிட இவர்களுக்குக் கூடுதல் பயிற்சி கொடுக்க ஆரம்பித்தார்.

* மற்ற குழந்தைகளின் பெற்றோர்கள், செரீனாவை நிற அடிப்படையில் கேலி செய்தனர். அதனால்,  மகள்களைப் பயிற்சியிலிருந்து விடுவித்து அழைத்துச் சென்றார் அப்பா.

* அவரே பயிற்சி கொடுக்கத் தொடங்கினார். அதனால், ஜூனியர் போட்டிகளில் அவர்களால் பங்கேற்க முடியவில்லை.

* தந்தையையும் மீறி  WTA தொடரில் தன் பெயரைப் பதிவுசெய்தார் செரீனா. ஆனால், வயது காரணமாக நிராகரிக்கப்பட்டார்.

* அப்போதும் கமிட்டியை எதிர்த்து நீதிமன்றம்  சென்றார் 14 வயது செரீனா. அந்த இளம் பெண்ணின் தைரியம் வியக்கவைத்தது.

* ஆனால், பெற்றோரின் நிர்பந்தத்தால் வழக்கைத் திரும்பப் பெற்றார் செரீனா. சில மாதங்களிலேயே கனடாவில் நடந்த பெல் சேலஞ்ச் தொடர் மூலம், தன் முதல் புரொபஷனல் போட்டியில் பங்கேற்றார்.

*  முதல் போட்டியில் தோல்வி. அடுத்த சில போட்டிகளிலும் தோல்வி. ஆனாலும் செரீனா அசரவில்லை. கடுமையாகப் போராடி வெற்றிகளைக் குவிக்கத் தொடங்கினார்.

* 1997... அமெரிக்கக் கோப்பை 304-வது ரேங்கில் இருந்த செரீனா, தரவரிசையில் 4-வது இடத்திலிருந்த மேரி பியர்ஸ் மற்றும் 7-வது இடத்திலிருந்த மோனிகா செலஸைத் தோற்கடித்து பிரமிக்கவைத்தார்.

* அன்று முதல் செரீனாவின் வெற்றிப் பயணம் தொடர்ந்துகொண்டே இருந்தது. மிகப்பெரிய வீராங்கனைகள் பலரும் செரீனாவிடம் தோற்றுப்போனார்கள்.

* 1998-ல், கலப்பு இரட்டையர் பிரிவில் மேக்ஸ் மிர்னியுடன் இணைந்து, விம்பிள்டன் பட்டம் வென்றார் செரீனா. முதல் கிராண்ட்ஸ்லாம் வெற்றி!

* அடுத்த ஆண்டு, ஒற்றையர் பிரிவில் விம்பிள்டன் பட்டம் வென்று, தன் ராஜ்ஜியத்தைத் தொடர்ந்தார்.

* இரட்டையர் பிரிவில், வீனஸ் - செரீனா இணை வெற்றிகளைக் குவிக்க, பெண்கள் டென்னிஸ் வில்லியம்ஸ் சகோதரிகளால் ஆளப்பட்டது.

* வெற்றி, புகழ், பணம் எனக் குவிந்தாலும், அவர்மீதான இனவெறித் தாக்குதல் குறையவில்லை. வீரர்கள், ரசிகர்கள் பலரும் அவரது நிறத்தைக் கேலி செய்தனர்.

* கறுப்பினப் பெண் என்பதால், மீடியாவும் அவரைக் குறிவைத்தது. அவர்மீது ஊக்கமருந்து குற்றச்சாட்டுகளும் எழுந்தன.

* இதற்கெல்லாம் செரீனா சளைக்கவில்லை. கடுமையாகப்  போராடினார். தான் யார் என்பதைக் களத்தில் காட்டினார். 2002-ம் ஆண்டு விம்பிள்டன் வென்று ‘நம்பர் 1’ வீராங்கனையாக மகுடம் சூடினார்.

* 2004 முதல் 2007 வரை தொடர் காயங்களால் அவதிப்பட்டார். அந்தக் காலகட்டத்தில் ஒரேயொரு கிராண்ட்ஸ்லாம் பட்டம் மட்டுமே வெல்ல முடிந்தது. செரீனா அவ்வளவுதான் என்று நினைத்தார்கள் ரசிகர்கள்.

* ஆனால், செரீனா புயல் ஓயவில்லை. மீண்டும் வெற்றிப் பாதைக்குத் திரும்பினார். முன்பைவிட வேகமாக, துல்லியமாக விளையாடினார். டென்னிஸ் உலகின் மகத்தான வீராங்கனையாக மாறினார்.

* செரீனாவின் ஈடு இணையில்லா ஆட்டம் தொடர்ந்தது. ஒற்றையரில் 23, இரட்டையரில் 14, கலப்பு இரட்டையரில் 2 என 39 கிராண்ட்ஸ்லாம் பட்டங்களைக் குவித்தார்.

* செப்டம்பர் 1, 2017: செரீனா - ஒஹானியன் தம்பதிக்குப் பெண் குழந்தை பிறந்தது. அம்மா ஆகிவிட்டதால், செரீனா இனி டென்னிஸ் ஆடமாட்டார் என்று உலகம் நினைத்தது.

* எதற்குமே, எப்போதுமே விட்டுக்கொடுக்காத செரீனா, மீண்டும் கம்பேக் கொடுத்தார். விம்பிள்டன், அமெரிக்க ஓப்பன் தொடர்களின் இறுதிவரை முன்னேறி,  பிரமிக்கவைத்தார். செரீனா ‘டென்னிஸின் குயின்’ என்றன ஊடகங்கள்.

* காயங்கள், ஊடகச் சாடல்கள், இனவெறித் தாக்குதல்கள், குழந்தைப் பேறு எதுவுமே செரீனாவை, அவர் வெற்றியைத் தடுத்ததில்லை. தன் முன் இருந்த ஒவ்வொரு தடையையும் வென்று சரித்திரம் படைத்துள்ளார். இந்த நூற்றாண்டின் மிகச்சிறந்த விளையாட்டு வீராங்கனை, செரீனா.

- மு.பிரதீப் கிருஷ்ணா