பிட்ஸ் பிரேக்

வயது கூடக்கூட அஜித்தின் விருப்பங்களும் மாறிக்கொண்டேயிருக்கின்றன. டீன்-ஏஜில் பைக் ரேஸ் பிரியரான அஜித், அதன்பிறகு கார் ரேஸ், போட்டோகிராபி, சமையல், ரேடியோ கன்ட்ரோல்டு ஹெலிகாப்டர்கள் என விருப்பங்களை மாற்றிக்கொண்டே வந்தார். தற்போது `தல’யின் ஆர்வம் துப்பாக்கி சுடுதல் மீது. சென்னை எழும்பூரில் உள்ள ரைஃபிள் கிளப்புக்கு அடிக்கடி வரும் அஜித் துப்பாக்கி சுடும் பயிற்சியில் இறங்கியிருக்கிறார்.

’விஸ்வாசம்’ படத்திலும் ‘தல’யின் தோட்டாக்கள் வெடிக்குமாம்! 

இன்னும் ஒரு படத்தில்கூட நடிக்கவில்லை. ஆனால் துருவ் விக்ரமுக்கு சோஷியல் மீடியாவில் ரசிகர்கள் குவிந்தபடியிருக்கிறார்கள். இன்ஸ்டாகிராமில் செம ஆக்டிவான துருவ்வை 77 ஆயிரம் பேர் பின்தொடர்கிறார்கள். பனிமலை, காடு, நகரம், நாய் என இன்ஸ்டாகிராமில் தன்னுடைய போட்டோகிராபியால் லைக்ஸ் குவித்துவருகிறார் இந்தக் குட்டிப்பையன். இன்ஸ்டாகிராமில் ஜூனியர் சீயான் பின்தொடரும் ஒரே ஆள் சீனியர் சீயான் மட்டுமே!

ஓவியம்: பிரேம் டாவின்ஸி

க்ரோர்பதி ஹீரோயின்கள் லிஸ்ட்டில் சாய் பல்லவியும் இணைந்திருக்கிறார். மலர் டீச்சராக ‘பிரேமம்’ படத்தின் மூலம் பிரபலமான சாய் பல்லவியின் முதல் படம் `தாம் தூம்’. 10 ஆண்டுகளுக்கு முன்பு கங்கனா ரனாவத்துக்குத் தோழியாக நடித்தவர் இப்போது ஹீரோயினாகத் தமிழில் செம பிஸி. கரு, மாரி-2, சூர்யா படம் என வரிசைக்கட்டி நடிக்கும் சாய் பல்லவியின் சம்பளம் 1.5 கோடி ரூபாய்!

இயக்குநர் தனுஷ் அடுத்த படத்துக்கு ரெடி. நாஸ்டால்ஜியா பிரியரான தனுஷ் இந்த முறை 1947-க்கு முன்பு பயணிக்கிறார். சுதந்திரத்துக்கு முந்தைய காலகட்டம்தான் கதைக்களம். கன்னட நடிகர் சுதீப்பை ஹீரோவாக நடிக்கவைக்க அணுகியிருக்கிறார் தனுஷ்!

`செக்கச்சிவந்த வானம்’ படத்தில் போலீஸாக நடிக்கிறார் விஜய்சேதுபதி. இன்ஜினீயராக சிம்பு நடிக்க, அரசியல்வாதியாக அரவிந்த்சுவாமி நடிக்கிறார். அருண் விஜய்தான் படத்தின் வில்லன். ஷூட்டிங் முடியும்வரை தன் படத்தைப் பற்றி எந்தத் தகவலும் வெளியாகக்கூடாது என்பதில் கவனமாக இருப்பார் மணிரத்னம். ஆனால், சோஷியல் மீடியா யுகத்தில் ரகசியங்கள் எதையும் காப்பாற்ற முடிவதில்லை என்பது மணியின் ஆதங்கம்.!