ஸ்வை ஃப்ளூ செய்ய வேண்டியவை... செய்யக் கூடாதவை!

பன்றிக் காய்ச்சலைவிட, அதிவேகமாகப் பரவுகின்றன அதைப்பற்றிய பீதிகளும்

வதந்திகளும்!

சென்னை கிங் இன்ஸ்டிட்யூட் இணை இயக்குநரும் அதன் வைராலஜி துறைத் தலைவருமான மருத்துவர் குணசேகரனிடம் பன்றிக் காய்ச்சல் குறித்த சில விளக்கங்கள் கேட்டோம்...

"இன்ஃப்ளூயன்சா ஏ (Influenza A H1N1) என்ற வைரஸ்தான் இந்த பன்றிக் காய்ச்சல் நோயை உண்டாக்கும். போன வருடம் இந்த நோய் இந்தியாவில் பரவியபோது, முதல் சில மரணங்களிலேயே சுதாரித்து, அதன் பரவலைக் கட்டுப்பாட்டுக்குள் கொண்டுவந்தோம். ஆனால், இந்த வருடம் பிப்ரவரி முதல் ஏப்ரல் வரை இந்த நோய் தாக்கியதற்கான பதிவுகள் எங்குமே இல்லை. தன் இயல்பை அடிக்கடி மாற்றிக்கொள்ளும் reassortant வகையைச் சேர்ந்த வைரஸ்கள் என்பதால், 'எதற்கும் உஷாராக இருப்போம்' என்ற நோக்கத்தில்தான் தமிழக அரசிடம் எச்சரிக்கை ஒன்றை விடுக்கச் சொன்னோம்.

ஆனால், பொதுமக்கள் பயமோ பதற்றமோ கொள்ளத் தேவையில்லை. நேசோவாக் (NASOVAC) எனும் மூக்கு வழியே செலுத்தப்படும் மருந்தும், வேக்ஸிஃப்ளூ (VAXIFLU) எனும் ஊசி மூலம் செலுத்தப்படும் மருந்தும் தமிழக மருத்துவமனைகளில் போதிய அளவு இருப்பு இருக்கின்றன. இவை தடுப்பு மருந்துகள். நோய் தாக்குதலுக்கு ஆளானவர், தொடர்ந்து மருத்துவரின் பரிந்துரையுடன் டாமிஃப்ளூ மாத்திரைகளும், தகுந்த சிகிச்சையும் எடுத்துக்கொண்டால் மீண்டுவிடலாம்!" என்று தைரிய வார்த்தைகள் தெரிவித்தவர், ஸ்வைன் ஃப்ளூ நோயின் அறிகுறிகள் மற்றும் தற்காப்பு வழிமுறைகளைப் பட்டியலிட்டார்.

அறிகுறிகள்

தொடர்ந்து அதிக காய்ச்சல், வறட்டு இருமல்.

ரத்தம் கலந்து சளி வருதல்

உடல் வலி, மூட்டு வலி, தலை வலி

உடல் சில்லிட்டுப்போதல் மற்றும் பசியின்மை, மூச்சு விடுவதில் சிரமம்!

செய்ய வேண்டியவை

உங்கள் வாய், மூக்கு போன்றவற்றை மாஸ்க் அல்லது கைக்குட்டை மூலம் மூடிக்கொள்ளலாம்.

நோய் தாக்கியவரை தனி அறை, தனித் தட்டு என நோய் குணமாகும் வரை தனிமைப்படுத்துங்கள்.

மூக்கு, கண், வாய் ஆகியவற்றைத் தொடுவதற்கு முன்னும் பின்னும் கைகளை சோப்பு போட்டு நன்றாகக் கழுவவும்.

சத்தான உணவை எடுத்துக்கொண்டு நன்றாக உறங்குங்கள். கடினமான வேலைகளைச் செய்வதைத் தவிர்க்கலாம். நிறைய நீர் அருந்துங்கள்.

செய்யக் கூடாதவை

ஆஸ்பிரின் எடுத்துக்கொள்ளக் கூடாது.

பொது இடங்களில் துப்பாதீர்கள்.

தும்மல், இருமல் வரும்போது கைக்குட்டைகளைப் பயன்படுத்துங்கள்.

கூடிய மட்டும் கை குலுக்கும் ஆங்கிலப் பழக்கத்தை விட்டு வணக்கம் சொல்லும் தமிழ் வழக்கத்தைப் பின்பற்றுங்கள்