இன்பாக்ஸ்

' 'மன்மதன் அம்பு' படத்தில் கெஸ்ட் ரோலில் நடிக்க அழைத்தார் கமல். உடனே, கொடைக்கானல் கிளம்பிச் சென்று நடித்துக் கொடுத்தார் சூர்யா. இது மன்மதன் அன்பு!

பாலாவின் 'அவன் இவன்' கலகலப்பாகத் தயாராகிறது. ஆர்யா - விஷால் இருவருக்கும் கிரேஸியான கெட்டப்பாம். ஆர்யா, தொப்பித் தலையுடன் நகர் வலம் வருகிறார். ஆனால், விஷால் கிட்டத்தட்ட தலை மறைவு வாழ்க்கைதான். காரணம், மிக மிக வித்தியாசமான கேரக்டராம். காக்க ஜோக்க!

28 வருடங்கள் கழித்து கே.பாக்யராஜும் - பூர்ணிமாவும் மீண்டும் திரையில் ஜோடி சேருகிறார்கள், ஒரு விளம்பரப் படத்தில் நடிப்பதற்காக. உலகத் தொலைக்காட்சி வரலாற்றில் நம்ம பாக்யராஜ் ஒரு விளம்பரத்தில் நடிப்பது இதுதான் முதல் முறையாம். பின்னுங்க எஜமான் பின்னுங்க!

நவம்பர் முதல் வாரத்தில் தமிழக சட்ட சபையின் குளிர்காலக் கூட்டத் தொடர் தொடங்கும். பல மாதங்களுக்கு முன்னரே துவக்க விழா முடிந்தும் இன்னமும் கட்டடப் பணிகள் முழுமையாக முடிக்கப்படவில்லை என்ற எதிர்க் கட்சிகளின் கேலி, கிண்டலைத் தவிர்க்க, விறுவிறுவெனப் பணிகளை முடிக்க முடுக்கிவிட்டார் முதல்வர். 'மம்மி ரிட்டர்ன்ஸ்'க்கு தமிழில் என்ன?

பிரபல தம்பதிகள் ஜோடியாக விளம்பரங்களில் நடிப்பதுதான் இப்போதைய டிரெண்ட். டேவிட் பெக்காம், மனைவி விக்டோரியாவுடன் ரொமான்ஸிய பெர்ஃப்யூம் விளம்பரம் செம ஹிட். ஆணுறை விளம்பரத்தில் நடிக்க அழைப்பு வந்திருக்கிறது. விக்டோரியா ஓ.கே. சொன்னாலும், பெக்காம் அநியாயத்துக்குக் கூச்சப்படுகிறாராம். நான் ஷாக் ஆகிட்டேன்!

'வருவாரா... மாட்டாரா?' என்ற சஸ்பென்ஸுக்கு முற்றுப்புள்ளிவைத்து, சைதை துரைசாமியின் மகன் திருமண வரவேற்பில் கலந்துகொண்டார் ஜெயலலிதா. விழாவில், விருந்தினர்களை உபசரிக்கும் பொறுப்பை 100-க்கும் மேற்பட்ட அரவாணிகளிடம் ஒப்படைத்து இருந்தார் துரைசாமி. நல்ல மனசுங்க!

பிரபல மலையாள இயக்குநர் அடூர் கோபாலகிருஷ்ணன், தான் இயக்கிய அத்தனை படங்களையும், அதனை உருவாக்கிய விதத்தைப்பற்றியும் புத்தகம் எழுதி இருக்கிறார். சுயம்வரம், எலிப்பத்தாயம், நாலு பெண்ணுகள், அனந்தராம், கொடியேட்டம், நிழல்கூத்து என ஒவ்வொரு படத்துக்கும் ஒவ்வொரு புத்தகமாம். மொத்தத் தொகுதி என்ன விலை சாரே?

இசையும் இளையராஜாவும் தேசிய அளவில் கௌரவிக்கப்பட்டு உள்ளனர். மம்முட்டி, சரத்குமார் நடித்த 'பழசிராஜா' படத்தின் சிறந்த பின்னணி இசைக்காகத்தான் இந்தத் தேசிய விருது. தேசிய அளவில் சிறந்த இசையமைப்பாளருக்கான விருதை இளையராஜா பெறுவது இது நான்காவது முறை. "நான் விருதுகளைப்பற்றி எப்போதும் நினைப்பதில்லை. இசையைப்பற்றியே என்னுடைய நினைவுகள் எல்லாம்" என்கிறார் இசைஞானி. இது ராஜா ஸ்டைல்!

'உசுரே போகுதே... உசுரே போகுதே' என்று நிஜமாகவே விக்ரம் பயத்தில் உதறிய சம்பவம் இது. ஃபார்முலா-1 சாம்பியன் லூயிஸ் ஹாமில்டன், சென்னை வந்திருந்தார். விக்ரமை அருகில் உட்காரவைத்துக்கொண்டு, ரேஸ் டிராக்கில் பென்ஸ் காரை 200 கி.மீ. ஸ்பீடில் எகிறவைத்தார் லூயிஸ். காரின் டயர்களே தேய்ந்து தீயும் அளவு ஸ்பீட். 'வீரா' பிடித்துச் சென்ற 'ராகினி' கணக்காக மிரண்டுகிடந்தது... அதே ராவணன். டன்டன்டன் டன்!

கரீனா கபூரின் புது அவதாரம்... டிசைனர். தான் டிசைன் செய்த ஆடைகளை 'கரீனா சைன்ஸ்' என்கிற பெயரில் பிரமாண்ட ஃபேஷன் ஷோ மூலம் வெளியிட இருக்கிறாராம். ஒரு டிசைனா இருக்கும்ல!

தன் உடல் முழுக்க தாராளமாக 13 டாட்டூ சித்திரங்கள் குத்தி இருக்கிறார் ஏஞ்சலினா ஜோலி. சமீபத்தில் கம்போடிய மொழி வாசகம் ஒன்றை செம நீளமாக முதுகில் குத்தினாராம். ஷூட்டிங் சமயத்தில் டாட்டூ இல்லாத 'ஜோலி'யைக் காட்ட... கூடுதல் மேக்கப், வித்தியாசமான கேமரா ஆங்கிள் எனக் கூடுதல் 'ஜோலி'யால் செம கஷ்டமாம். குத்தாதீங்க மேடம் குத்தாதீங்க!

அதிபருக்கான கருத்துக் கணிப்பில் கடைசி இடத்தில் இருந்தாலும், '2013 பாகிஸ்தான் அதிபர் தேர்தலில் போட்டியிடுவேன்' என்று, செல்லும் நாடுகளில் எல்லாம் சுப்பிரமணியன் சாமி ரேஞ்சில் பேட்டி தட்டுகிறார் பர்வேஸ் முஷாரஃப். பாகிஸ்தான் வெள்ள நிவாரணப் பணிகளுக்கென ஒரு கோடி ரூபாய் வழங்கினாராம். அது சரியாகச் செலவிடப்படவில்லை என்று கணக்கு கேட்கிறார். காக்கா தூக்கிட்டுப் போயிருச்சுன்னு சொல்வாங்களோ?

நெகிழ்ச்சியூட்டிய நிகழ்வு இது. கடந்த 17-ம் தேதி வயலின் மேதை லால்குடி ஜெயராமனுக்கு 80-வது பிறந்த நாள். சீனியர் மாணவர்களான பாம்பே ஜெயஸ்ரீ, எஸ்.பி.ராம், விட்டல் ராமமூர்த்தி, சங்கரி கிருஷ்ணன், பத்மா சங்கர் துவங்கி வாரிசுகளான லால்குடி கிருஷ்ணன், விஜயலட்சுமி உட்பட 34 பேர் அடங்கிய சிஷ்யர் குழு, அவர் வீட்டு வாசலில் சர்ப்ரைஸாகத் திரண்டது. அவர்களிடம் இருந்து பூங்கொத்தைப் பெற்றுக்கொண்ட லால்குடியின் கண்கள் கலங்கிவிட்டன. பிறந்த நாள் கேக் வெட்டி, குரு 100 வயதுக்கு மேல் வாழ பல்லாண்டு பாடினார்கள் அனைவரும். குருவே சரணம்!

நவம்பர் மாதம் மனைவி மற்றும் மகள்களோடு இந்தியா வரவிருக்கும் அமெரிக்க அதிபர் ஒபாமா, அவசியம் காண வேண்டிய இடங்களில் தாஜ்மகாலும் இடம் பெற வேண்டும் என்று சொல்லி இருக்கிறாராம். பெஞ்ச் போட்டோ எடுப்பீங்கள்ல!

ஜெயம் ரவி - ஹன்சிகா நடிக்கும் 'இச்' படத் தலைப்பு தமிழ் இல்லை என்பதால், 'எங்கேயும் காதல்' என மாற்றிவிட்டார் இயக்குநர் பிரபுதேவா. அடுத்து, இந்தியில் அக்ஷய் - கேத்ரினா இணைந்து நடிக்கும் படத்தை இயக்க இருக்கிறார் பிரபுதேவா. நடுவுல கன்னட - மலையாளக் கல்யாணமும் இருக்கே!