வருங்காலத் தொழில்நுட்பம்

நான் பிறந்து வளர்ந்த, தென் கடற்கரையோரக் குட்டி கிராமமான மணப்பாடு,

பொதுவாக வருடம் முழுதும் சற்றே தூங்கி வழிந்தபடி இருக்கும். ஒரு வாரத்தைத் தவிர!

அது, இந்தக் கட்டுரை எழுதப்படும் செப்டம்பர் இரண்டாவது வாரம். பல நூறு வருடங்களுக்கு முன் கட்டப்பட்ட கோயிலின் திருவிழா, வருடந்தோறும் இந்த வாரத்தில் நடத்தப்படும். இதில் கலந்துகொள்ள மற்ற கடற்கரைக் கிராமங்களில் இருந்தும், கேரளாவில் இருந்தும் ஆயிரக்கணக்கில் பக்தர்கள் புறப்பட்டு வந்து, அந்தச் சிறிய கிராமத்தின் தெருக்களில் கொட்டகை போட்டுத் தங்கி, திருவிழாவில் கலந்துகொள்வார்கள். 80-களின் இறுதியில் ஊரைவிட்டுப் புலம் பெயர்ந்த பின்னர், அந்தத் திருவிழாவையும் திரளாகத் திரண்டு இருக்கும் மக்களையும் பார்க்கும் வாய்ப்பு எனக்குக் கிடைக்காமலே இருந்தது. காரணம், செய்தி ஊடகங்களில் கவரேஜ் செய்யப்படும் முக்கியத்துவம் இல்லை என்பதால்! இந்த வருடம் இணையத் தொழில்நுட்பம், உலகம் முழுவதும் இந்தத் திருவிழாவைப் பார்க்க விரும்பியவர்களை இணைத்தது. டெக் இண்டஸ்ட்ரியில் பணிபுரியும் ஜெஃப்ரியின் முயற்சியில் கண நேரக் காணொளியாக ustream.tv வலைதளத்தில் இரண்டு நாட்கள், திருவிழாக் கொண்டாட்டங்கள் ஒளிபரப்பப்பட, சான்ஃபிரான்சிஸ்கோவில் இருக்கும் எனக்கு, கிட்டத்தட்ட நேரடியாக திருவிழாக் கொண்டாட்டங்களைப் பார்த்த திருப்தி.

இங்கே கோடிட்டுக் காட்ட வேண்டிய முக்கிய keyword: கண நேரக் காணொளி (Real-time, streaming video). எப்போதோ பதிவுசெய்து, அதை மீண்டும் பார்க்கும் வீடியோபோல் அல்லாது, லைவ் டி.வி-யாக இந்தியாவின் ஒரு கோடியில் உள்ள கிராமத்து விழாவை உலகம் முழுதும் காட்ட முடிகிறது என்பது, இணையம் என்ற ஊடகம் நம்மை எங்கே இழுத்துச் சென்றபடி இருக்கிறது என்பதை ஓரளவுக்கே யூகிக்க முடிகிறது. அப்போது சில காலத்துக்கு முன்பு படித்த 'Understanding Media: The Extensions of Man' என்ற புத்தகம் நினைவுக்கு வந்தது.

மார்ஷல் மேக்லூகன் எழுதிய இந்தப் புத்தகம், ஊடகம் பற்றிய உயர் கல்வி வகுப்புகளில் கட்டாயம். 1964-ல் மார்ஷல் இந்தப் புத்தகத்தை எழுதியபோது, அச்சு ஊடகம் மிக முக்கியமானது. ரேடியோ பரவலான தகவல் தொடர்பு ஊடகமாக ஏற்றுக்கொள்ளப்பட்டு இருந்தது. தொலைக்காட்சி பிரபலமாக ஆரம்பித்திருந்தது. இணையம் என்பது எவரின் கனவிலும் இல்லை.

மேக்லூகன் கோடிட்டுக் காட்டும் சில அடிப்படைகள், இணையமும் அலைபேசித் தொழில்நுட்பமும் முக்கிய ஊடகங்களாக மாறி வரும் இந்த நாட்களில், எவ்வளவு உண்மை என்பதைப் புரிந்துகொள்ள முடியும்.

'மனிதன் கருவியை முதலில் வடிவமைக்கிறான்; அந்தக் கருவி வெற்றி பெற்றுவிட்டால், அது அவனை வடிவமைக்கிறது' என்கிறார் மேக்லூகன். இந்த அடிப்படைத் தத்துவத்தை விளக்க, சக்கரத்தை எளிய உதாரணமாகச் சொல்லலாம். சக்கரத்தை வடிவமைக்கும் வரை மனிதன் பொருட்களையும் தன்னையும் ஓர் இடத்தில் இருந்து மற்ற இடத்துக்கு நகர்த்த ரொம்பவும் கடினப்பட்டான். சக்கரம் கண்டுபிடிக்கப்பட்டதும், அவனது இயல்பே மாறிவிட்டது.

சுத்தியல் என்பது கைகளின் நீட்சி; சக்கரம் என்பது கால்களின் நீட்சி என்று உருவகப்படுத்திக்கொண்டால், இதை இன்னும் எளிமைப்படுத்தலாம். சொல்லப்போனால், ஊடகம் - மனிதர்களின் தகவல் தொடர்புக்குத் தேவையான அத்தகைய நீட்சியே. தொழில்நுட்ப வளர்ச்சிகளும், கண்டறியப்படும் புதுமைகளும் ஊடகத்தின் வலிமையை மாற்றிக்கொண்டே வருவதால், மனிதர்களின் தன்மையும் மாறிக்கொண்டே வருவது தெளிவாகத் தெரிகிறது.

அச்சு ஊடகத்தில் தொடங்கி, இணையம் வரை ஒவ்வொரு காலகட்டத்தில் புதிதாகக் கண்டறியப்பட்ட, அறிமுகப்படுத்தப்பட்ட ஒவ்வோர் ஊடகமும் மனித வாழ்வை வித்தியாசமாக வடிவமைப்பதைக் கண்கூடாகப் பார்க்கிறோம்.

இதில் இணையத்தின் தாக்கம் மலைக்கவைக்கிறது. ஒப்பீட்டுக்கு, இப்படிப் பார்க்கலாம்.

50 மில்லியன் பயனீட்டாளர்களை அடைய, கீழ்க்கண்ட ஊடகங்களுக்கு எத்தனை வருடங்கள் ஆகின?

ரேடியோ 38 வருடங்கள், தொலைக்காட்சி 13 வருடங்கள், இன்டர்நெட் 4 வருடங்கள், ஐ-பாட் 3 வருடங்கள் (ஆம், ஐ-பாட் இசை கேட்கப் பயன்படும் சாதனம் மட்டுமே அல்ல; அது ஓர் ஊடகமும்கூட; இதைப் பயன்படுத்திச் செய்யப்படும் பாட் காஸ்ட் (Podcast) பற்றி இன்னொரு வாரத்தில் பார்க்கலாம்)

சமூக ஊடகம்? மூச்சைப் பிடித்துக்கொள்ளுங்கள்...! ஒன்பது மாதங்களுக்குள் ஃபேஸ்புக் 100 மில்லியன் பயனீட்டாளர்களை ஒன்றிணைத்து இருக்கிறது.

புதிதாக வரும் ஒரு மக்கள் தகவல் தொடர்பு ஊடகம் ஏற்கெனவே இருக்கும் தொடர்பு ஊடகங்களையும், அவற்றை அடிப்படையாகக்கொண்ட வியாபார உள்கட்டமைப்புகளையும் எப்படிப் பாதிக்கிறது என்பதை முக்கியமாகக் கவனிக்க வேண்டும். சில ஊடகங்கள் மற்றவற்றைப் பாதிக்கலாம்; அல்லது பாதிக்காமலும் இருக்கலாம்.

உதாரணத்துக்கு, தொலைக்காட்சி பரவலாக ஏற்றுக்கொள்ளப்பட்ட பின்னரும், ரேடியோவின் முக்கியத்துவத்தை முழுதும் நீக்கிவிட முடியவில்லை. அதே நேரத்தில், ஒரு காலத்தில் மிக முக்கியத் தொடர்பு ஊடகமான தந்தி என்பதை அலைபேசி ஊடகம் பயனற்றதாகச் செய்துவிட்டது.

ஆனால், இணையம் மட்டுமே இதுவரை பயன்பாட்டில் இருக்கும் ஒவ்வொரு ஊடகத்தின் தன்மையையும், அந்த ஊடகத்தைச் சார்ந்து கட்டப்பட்டு இருக்கும் வியாபாரத்தின் பிசினஸ் மாடல்களையும் ஆணி வேரில் இருந்து அசைக்கிறது. காரணம், இணையத்தின் ஊடகங்களை உள்ளிணைக்கும் (Convergence) வலிமை.

இதை இப்படிப் பார்க்கலாம்.

நாளிதழை அச்சு வடிவத்தில் படித்து, செய்திகளை தொலைக்காட்சியில் பார்த்துவிட்டு, காரில் செல்லும்போது ரேடியோவில் பாடல்களைக் கேட்டுக்கொண்டு, வார இறுதி என்றால் தியேட்டருக்குச் சென்று படம் பார்த்துவிட்டு, உறவினர்களிடம் தொடர்புகொள்ள பேப்பரில் கடிதம் எழுதி, தபாலில் போட்டு என்று ஒவ்வொரு தகவல்

தொடர்புக்கும் ஒரு குறிப்பிட்ட ஊடகம் என்று வைத்திருந்த நியதிகளில், இணையத்தால் தலைகீழ் மாற்றம் வந்துவிட்டது.

ஆப்பிள் இரண்டு வாரங்களுக்கு முன்பு வெளியிட்ட Apple TV சாதனம் மற்றும் உங்கள் அலைபேசி இந்த இரண்டும் இருந்து ஆன்லைன் செல்லும் வசதியும் இருந்துவிட்டால், மேற்கண்ட அனைத்தையும் ஒரே இடத்தில் இருந்து செய்துகொள்ள முடியும்.

Digital Convergence நாம் நினைப்பதைவிட வேகமாக வந்துகொண்டு இருக்கிறது. இதை இன்னும் விரிவாகப் பார்க்கலாம்!