ஆசை : ஜாஸ் பரத்... ஜாலி பிருந்தா!

அலுவல் நேரம் முடிந்த ஐந்து மணிக்கு மேல் அலறியது அலுவலகத் தொலைபேசி.

எடுத்துப் பேசினால், " 'சார்... வணக்கம்.என் பேர் பிருந்தா. நான் மூணு வருஷமா டான்ஸ் கத்துக்கிட்டு இருக்கேன். 'பாய்ஸ்' படத்தில் இருந்தே பரத் டான்ஸ் எனக்குப் பிடிக்கும். துறு துறுன்னு பம்பரமா ஆடுற அவரை மாதிரியே நானும் ஆடிப் பழகணும்னுதான் டான்ஸ் கத்துக்கவே சேர்ந்தேன். ஆனா, ஒவ்வொரு டான்ஸ் ஸ்டெப்பும் பெண்ட் எடுக்குது. இப்பதான் பரத் எவ்வளவு கஷ்டப்பட்டு ஆடுவார்னு புரிஞ் சுது. அவரை ஒரு தடவை நேர்ல பார்த்து வாழ்த்தணும்னு ஆசை... ப்ளீஸ்!"

தகவல் உடனே பரத் மொபைலுக்கு எஸ்.எம்.எஸ்ஸாக... உடனே 'யெஸ்!' என்று வந்தது பதில். பிருந்தா நடனம் பயிலும் 'ஃபேர் போன்ஸ்' டான்ஸ் ஸ்டுடியோவுக்கே கிளம்பி வந்தார் பரத். வியர்க்க விறுவிறுக்கப் பயிற்சியில் இருந்த பிருந்தாவுக்கு ஆச்சர்யம். "சும்மாதான் விசாரிக்கிறீங்கன்னு நினைச்சேன். 'வர்றேன்... வர்றேன்னு' சொல்லிட்டு கடைசியில, 'ஷூட்டிங்ல பிரேக் கிடைக்கலை'ன்னு சொல்லிடுவீங் கன்னு நினைச்சேன். திடுதிப்னு வந்து நிக்கிறீங்களே!" என்று உற்சாக அதிர்ச்சி அடைந்தவருக்குப் பேச்சே வரவில்லை.

மென் புன்னகையுடன் வந்து அமர்ந்த பரத், "சொல்லுங்க... உங்களுக்கு எப்படி டான்ஸ் ஆர்வம் வந்தது?" என்ற கேள்விக்குப் பதில் சொல்லாமல் வெட்கப்பட்டுக்கொண்டே இருந்தார் பிருந்தா. "பதில் சொல்ல மாட்டீங்களா... சரி விடுங்க. நான் என்னைப்பத்தி சொல்றேன். சின்ன வயசுல இருந்தே டான்ஸ் மேல எனக்கு வெறி. ஸ்கூல், காலேஜ் கல்ச்சுரல்ஸ்ல இருந்து நியூ இயர் பார்ட்டி வரை நம்ம டான்ஸ் இல்லாம ஒரு விழா நடக்காது. அந்த டான்ஸ் ஆர்வமும் திறமையும் தான் 'பாய்ஸ்' பட வாய்ப்பு கொடுத்தது. டான்ஸ்தான் என்னை ஹீரோவாக்கி இப்போ உங்க முன்னாடி உக்கார வெச்சிருக்கு. ஓ.கே. இப்போ உங்களைப்பத்திச் சொல்லுங்க?" என்று பிருந்தாவை ஈஸியாக்கினார்.

"நான் ப்ளஸ் டூ படிக்கிறேன். டிஸ்கோ டான்ஸ், பரதநாட் டியம் ரெண்டு மட்டும்தான் இருக்கும்னு நினைச்சுதான் நான் டான்ஸ் கத்துக்க வந்தேன். ஆனா, ஜாஸ், ஹிப் ஹாப், பாலே, சல்சானு ஏகப்பட்ட வெரைட்டி இருக்கு. நீங்க ஹிப் ஹாப் நல்லா ஆடுறீங்க. அது எனக்குப் பிடிக்கும். எப்படி அவ்வளவு ஈஸியா ஆடுறீங்க?" என்று சின்ன வெட்கத்துடனேயே கேட்டார் பிருந்தா.

"இப்போ டிரெண்டுக்கு சினிமாவில் நிறைய ஹிப் ஹாப்தான் யூஸ் பண்றாங்க. ஆனா, எனக்குப் பிடிச்சது ஜாஸ். அது ஆடுறப்போ, மழை நேரத்தில் ரயில் ஜன்னலோரம் உக்காந்து போற மாதிரி இருக்கும். எந்த டான்ஸும் ஈஸியா ஆட முடியாதுங்க. நாங்களும் நிறைய பிராக்டீஸ் பண்ணிதான் ஆடுவோம். சினிமாவில் பார்க் கும்போது, ஈஸியா இருக்கும். இப்போ எந்த டான்ஸ்ல உங்களுக்கு என்ன சந்தேகம்னு சொல்லுங்க. பிராக்டிக்கலா க்ளியர் பண்ணிருவோம்!" என்று பிருந்தா நோக்கிக் கை நீட்டினார் பரத். கொஞ்சம் தயக்கத்துடனேயே, ஆனால் இறுகப் பற்றி எழுந்தார் பிருந்தா.

கால்களை அடியெடுத்து வைத்துப் பின்னிப் பின்னி நடக்கும் ஆட்டத்தில், தன் வேகத்துக்கு ஈடுகொடுத்த பிருந்தாவை ஆச்சர் யமாகப் பார்த்தார் பரத். சுற்றிச் சுற்றி ஆடிக்கொண்டு இருந்த போது, பிருந்தாவை அலேக் என்று தலைக்கு மேல் தூக்கி விட்டார். அதை எதிர்பார்க்காத பிருந்தா, அதிர்ச்சியில் வீல் என்று அலறிச் சிரித்தார்.

அப்படியே ரிலாக்ஸ் ஆனார்கள் இருவரும். "தமிழ் சினிமாவின் டாப் ஹீரோக்களில் உங்களுக்கு எந்த இடம்னு நினைக்கிறீங்க?" என்று பிருந்தா கேட்க, இரண்டே நொடிகள் மட்டும் யோசித்த பரத், "நான் செகண்ட் கிளாஸ். இன்னும் இன்னும் மேலே போவ தற்கான முயற்சிகளில்தான் இப்போ தீவிரமா இருக்கேன். என் ப்ளஸ், மைனஸ் எனக்கு நல் லாவே தெரியும். 'டான்ஸ்ல நாம கில்லி'ன்னு நினைக்கவே முடி யாது.

சிம்பு அவ்வளவு பிரமாத மான டான்ஸர். இப்படி 'நாம தான் ராஜா'ன்னு எந்த ஒரு அம் சத்திலும் நினைச்சு திருப்தி அடைய முடியாது. இன்னும் மூணு வருஷத்தில் நிச்சயம் டாப் டென்ல என் ரேங்க் நிச்சயம் உயர்ந்திருக்கும்!"

"வாழ்த்துக்கள்... சரி எப்போ கல்யாணம்?" என்று விழிகளில் குறும்புமின்னக் கேட்டார் பிருந்தா.

"கல்யாணம் பண்ணிட்டா, சார்ம் போயிடுமா என்ன? இருந்தாலும், இப்போ எதுக்கு அவசரம் மச்சி? வீட்ல சிஸ்டர் இருக்காங்க. அவங்க படிச்சு முடிச்சதும்,அவங் களுக்குக் கல்யாணம்முடிச் சுட்டு, 2020-ல பண்ணிக்கலாம்" என்று அதைக் காட்டிலும் குறும் பாகச் சிரிக்கிறார் பரத்!