கூவத்தை மாற்ற சீனா போனேன்

வெள்ளை வேட்டி - சட்டை தவிர, பிற நிற உடைகளை தமிழக பொது மேடைகளில்

பயன்படுத்தாத ஸ்டாலின், கலக்கல் உடைகளில் சீனாவில் வலம் வந்தார். எப்போதுமே பாரம்பரிய சேலை, நெற்றி நிறையக் குங்குமம் எனக் காட்சி அளிக்கும் துர்கா ஸ்டாலினும் கலர்ஃபுல் சுடிதாரில் வலம் வந்தது தம்பதிகளுக்கு இளமை திரும்பிவிட்டதோ என்று எண்ணத் தோன்றியது! துணை முதல்வர் ஸ்டாலினிடம், "இது என்ன சார் ஹனிமூன் பயணமா?" என்றால், வெட்கப்பட்டு சிரிக்கிறார்!

"அதெல்லாம் திருமணம் ஆனதுமே ஊட்டிக்குப் போயிட்டு வந்துட்டோம். கல்யாணத் தம்பதியினர் ஒருவருக்கு ஒருவர் புரிந்துகொண்டு, குடும்ப வளர்ச்சியை மேம்படுத்த தேனிலவுப் பயணங்கள் உதவும். அதைப்போல, சீன, கொரியத் தொழில் அதிபர்களுடன் புரிந்துணர்வு ஏற்படுத்தி, தமிழ்நாட்டில் தொழில் வளர்ச்சிக்கு வித்திட, நிர்வாகரீதியான இந்தப் பயணம் பயன்பட்டது!" என்று துணை முதல்வராகப் பதில் அளிக்கிறார்.

" 'சீனாவில் பாம்பு சூப், பல்லி மீல்ஸ், பன்றி வறுவல்தான் கிடைக்கும்'னு என் பசங்க துர்காவை ஏகத்துக்கும் பயமுறுத்திட்டாங்க. சளைக்கிறவங்களா அவங்க? ரெடிமேட் சப்பாத்தி, ரெடிமேட் மாவு, இட்லிப் பொடின்னு ஒரு வாரத்துக்குத் தேவையான உணவுப் பொருட்களை எடுத்துவெச்சுட்டாங்க. ஆனா, அங்கே போன பிறகுதான், இந்திய உணவு வகைகள் சீனாவில் தாராளமா கிடைக்குதுன்னு தெரிஞ்சுது. துர்கா கொண்டுவந்த பொருள் எல்லாத்தையும் அங்கே இருந்த தமிழ் ஹோட்டல் உரிமையாளர் ஒருத்தருக்குத் தானம் பண்ணிட்டாங்க!" என்று கிண்டலாகச் சொன்ன ஸ்டாலின், சீனப் பயண சுவாரஸ்யங்களைப் பகிர்ந்துகொள்கிறார்.

"சீனர்கள், மதிய உணவை மிகச் சரியாக 12 மணிக்கும், இரவு உணவை 6 மணிக்கும் சாப்பிடுறாங்க. சாப்பிட்டு நாலு மணி நேரம் கழிச்சுதான் தூங்கப் போறாங்க. எவ்வளவு தூரம்னாலும் நடந்தே போறதை, ஒரு பயிற்சியாவே வெச்சிருக்காங்க. அதனால, அங்கே ஒருத்தரைக்கூட தொந்தி, தொப்பையுடன் பார்க்க முடியலை. பல இடங்களைச் சுத்திப் பார்த்தாலும், சீனப் பெருஞ்சுவர்தான் அதிசயப்படுத்தியது. ஒரு நிர்வாகப் பொறுப்பில் இருக்கும் எனக்கு, ஒரு காரியத்தைச் செய்ய எவ்வளவு முயற்சிகள் தேவைப்படும், எவ்வளவு சிரமங்களை எதிர்கொள்ள வேண்டி இருக்கும்னு அனுபவபூர்வமாவே தெரியும். ஆனால், சுமார் 200 ஆண்டுகளுக்கு முன்னால், இப்படி ஒரு சுவரை நிர்மாணித்து இருக்கும் அந்தத் திறமை என்னை ரொம்பவே ஆச்சர்யப் படுத்தியது!" என்று அனுபவித்துச் சொல்கிறார்.

"சரி... பேரன், பேத்திகளுக்கு என்ன வாங்கி வந்தீர்கள்?"

"சீனப் பொம்மைகளும், ஜிகுஜிகு உடைகளும் துர்கா வாங்கினார்!"

"தமிழ் நாட்டுக்கு..?"

"ஏராளமான தொழில் முதலீடுகளுக்கான உத்தரவாதங்களை வாங்கி வந்திருக்கிறேன். சியோல் நகரின் மையப் பகுதியான சியோஜ்ஜியான் ஆற்றைப்போலவே நம் கூவத்தை மாற்றியாக வேண்டும். ஒரு காலத்தில் கூவத்தைப்போலவே மோசமாக இருந்ததாம் அந்த ஆறு. ஆனால், இன்று இரு கரையிலும் அழகிய பூங்காக்கள் செழித்திருக்க, சுழித்துக்கொண்டு ஓடுகிறது ஆறு. அதைப்போலவே கூவத்தை அழகுபடுத்திவிட வேண்டும் என்ற ஆசையைக் கொண்டுவந்து இருக்கிறேன்!"-வாக்குறுதி தருகிறார் மு.க.ஸ்டாலின்!