ஆசை

'ஹாய், நான் த்ரிஷாவின் ரசிகன். ஈ.சி.ஆரில் ஒரு லாங் டிரைவ் த்ரிஷாவுடன் போக

ஆசை!', 'என்னிடம் நாலைந்து கதைகள் இருக்கின்றன. அது, ரஜினி, கமலுக்கு நிச்சயம் பொருத்தமாக இருக்கும். ஒரு அப்பாயின்மென்ட் ஏற்பாடு செய்யுங்கள். படம் கமிட் ஆனதும் முதல் பேட்டி விகடனுக்குத்தான். பி.கு: ஒருவேளை ரஜினி, கமல், ஓ.கே. சொல்லாவிட்டால்... விஜய், சூர்யா, விக்ரம், அஜீத், சிம்பு, தனுஷ் என்று வரிசையாக முயற்சிக்-கலாம். அதற்கான முழு உரிமையையும் ஆசிரிய-ருக்கு அளிக்கிறேன்!', 'நான் மேலவை உறுப்பினர் ஆக வேண்டும். முதல்வர் கருணாநிதியிடம் என்னைப்பற்றி எடுத்துச் சொல்லி சீட்டு வாங்கிக் கொடுங்கள்!'

இன்னதுதான் என்றில்லை... இன்னும் என்னென்னவோ விதவிதமான ஆசைகள், அபிலாஷைகள் விகடன் அலு-வலகம் வந்து குவியும். கடந்த வாரம் வந்த ஒன்று... 'ஐ யம் ஸ்ரீனிவாசன். ஃபுட்பாலின் வெறித்தனமான ரசிகன். சினிமாவில் ஆர்யா பிடிக்கும். ஆர்யாவும் ஒரு ஃபுட்பால் பிளேயர் என்று கேள்விப்பட்டேன். இந்த உலகக் கோப்பை ஃபுட்பால் சமயம், ஆர்யாவுடன் சேர்ந்து ஃபுட்பால் விளையாட ஆசை. ப்ளீஸ், நிறைவேற்றிவைப்பீர்களா?'

'அட, டைமிங் ஆசை!' என்று ஆர்யாவின் மொபைல் எண்களைத் தட்டினோம். உடனே, உற்சாக-மாகிவிட்டார் கடவுள். "பச்சையப்பன் காலேஜ் கிரவுண்டு வரச் சொல்லுங்க நண்பா. கெட்ட ஆட்டம் ஆடிரலாம்!" என்று நமக்கு முன் தடதடத்து வந்துவிட்டார்.

பச்சையப்பன் கல்லூரி மைதானத்தின் ஒரு ஞாயிறு மதியம். உலகக் கோப்பைக் கால்பந்து ஃபீவரில், கிரிக்கெட் பந்துகளுக்கு நடுவே ஆங்காங்கே பறந்துகொண்டு இருந்தன கால்பந்துகள். ஃப்ளோரசென்ட் பச்சை நிற ஜெர்சியில் கால்களால் பந்துடன் கபடி ஆடிகொண்டு இருந்த ஆர்யாவிடம், "சார், நான் ஸ்ரீனிவாசன்!" என்று அறிமுகம் ஆனார் ஸ்ரீனி. "ஹாய் பாஸ்... நான் ஆர்யா. இது என் ஃபுட்பால்!" என்று ஜாலியாகக் கை குலுக்கினார் ஆர்யா.

"நீங்க ஃபுட்பால் பிளேயரா?" என்று ஸ்ரீனியிடம் கேட்டார். "ஆமா சார், நான் 12 வருஷமா ஃபுட் பால் விளையாடுறேன். ஸ்கூல் டீம்ல இருந்தேன். அப்புறம், 'எவர் ஃப்ரேம்ஸ்'னு ஒரு கிளப்புக்காக ஆடினேன். இப்போ, உலகக் கோப்பை போட்டி களைப் பார்க்க ஆரம்பிச்சதில் இருந்து கால் உதறிட்டே இருக்கு. இங்கே படிச்ச என் ஃப்ரெண்ட், நீங்க இங்கே அடிக்கடி ஃபுட்பால் விளையாடுவீங்கன்னு சொன்னான். உங்களோட மேட்ச் ஆடணும்னு ஒரு ஆசை. அதான் விகடனுக்கு சும்மா ஒரு மெயில் தட்டிவிட்டேன். நம்பவே முடியலை... இப்போ ஃபுட்பால் வித் ஆர்யா!" என்று பூரித்தார் ஸ்ரீனி.

வார்ம் அப் பண்ணிக்கொண்டே பேச ஆரம்பித்தார் ஆர்யா. "நான் கேரளா கண்ணூரில் பிறந்தேன் பாஸ். என் அப்பா ஒரு ஃபுட்பால் பிளேயர். மாவட்ட அளவில் நிறையப் போட்டிகளில் விளையாடி இருக்கார். அவர்தான் எனக்கு ஃபுட்பால் சொல்லித் தந்தார். இங்கே பசங்க கிரிக்கெட் விளையாடுற மாதிரி, அங்கே தெருவுக்கு தெரு ஃபுட்பால் விளையாடிட்டு இருப்பாங்க. ஸ்கூல் படிக்கும்போதே மாவட்ட அளவில் பல போட்டிகளில் ஜெயிச்சிருக்கோம். சென்னை கல்லூரி வாழ்க்கையிலும் பல்கலைக் கழக அளவில் நிறைய போட்டிகளில் விளையாடினேன். கிட்டத்தட்ட 20 வருஷமா நானும் ஃபுட்பாலும் ரொம்ப ரொம்ப தோஸ்த்!" என்றபடியே பந்தை காலில் இருந்து முட்டிக்குக் கொண்டுவந்து, மெள்ள தட்டித் தட்டி, தலைக்குக் கொண்டுவந்தார் ஆர்யா.

தலையால் முட்டி ஸ்ரீனிவாசனிடம் பந்தை அனுப்-பியவர், "தொப்பி போட்டு ஃபுட்பால் விளையாடக் கூடாது. 'அவன் இவன்' படத்துக்காக என் தலை-முடியை கலரிங் பண்ணியிருக்கேன்... அதான் தொப்பி. நான் தொப்பியை எடுத்தா, பாலா என் தலையை எடுத்திருவார்!" என்று சிரித்தார்.

"யார் உங்களுக்குப் பிடிச்ச பிளேயர்?" என்று ஆர்யா கேட்க, "பிரேசில் காகா... என் ஃபேவரைட். ஆளும் அழகு. ஆட்டமும் அழகு!" என்று ஸ்ரீனிவாசன் சொல்ல, "அர்ஜென்டினாவின் லயோனல் மெஸ்ஸிதான் நம்ம ஆளு. பாதி கிரவுண்ட்ல இருந்து எதிரணி கோல் போஸ்ட் வரைக்கும் மெஸ்ஸி பாலைக் கடத்திட்டுப் போற ஸ்டைலே தனி. நாலு பேர் சுத்தி வளைச்சாலும் தண்ணி காட்டிருவான் தலைவன். மெஸ்ஸியின் கால்ல பால் பட்டாலே கோல்தான். ஆனா, இந்த வேர்ல்டு கப் நம்ம ரெண்டு பேருக்குமே ஷாக்கிங்காதான் இருக்கும். காகாவால் பிரேசிலைக் காப்பாத்த முடியலை. மெஸ்ஸியால் அர்ஜென்டினாவுக்கு 'கால்' கொடுக்க முடியலை. அர்ஜென்டினா தோத்த அன்னிக்கு ராத்திரி எனக்குத் தூக்கமே வரலை!" என்ற படியே ஆர்யா ரிவர்ஸில் திரும்பிப் பந்தை உதைக்க, மிகச் சரியாக ஸ்ரீனிவாசனிடம் வந்து சேர்ந்தது பந்து.

"இவ்ளோ நல்லா விளையாடுறீங்க... ஏதாவது கிளப்புக்காக ஆடலாமே" என்று கேட்டார் ஸ்ரீனிவாசன். "உடம்பு ஃபிட்டா இருக்கணும்னுதான் விளையாடுறேன். கிளப்புக்கு விளையாடப் போனா, தினமும் நிறையப் பயிற்சி எடுக் கணும். நுணுக்கங்கள் கத்துக்கணும். உடம்போட எனர்ஜி எப்பவும் குறையாமப் பார்த்துக்கணும். உணவுப் பழக்கத்தை மாத்தணும். அதெல்லாம் சாதாரண விஷயம் இல்லை. இதுல எங்கேயாவது சொதப்பிட்டா, கிரவுண்டில் காமெடி பீஸ் ஆகிருவோம். அதனால, அந்த ரிஸ்க்கே வேண்டாம்னு விட்டுட்டேன்!" என்று ஆர்யா முடிக்கவும், அவரது நண்பர்கள் இரண்டு அணிகளாகப் பிரிந்து விளையாடத் தயாராக இருந்தார்கள்.

"வாங்க!" என்று ஆர்யா அழைக்க, சந்தோஷமாக மைதானத்தில் இறங்கினார் ஸ்ரீனிவாசன். அணிக்கு ஆறு பேர், 20 நிமிடம் போட்டி என்கிற விதியோடு களம் இறங்கினார்கள் ஆர்யா அண்ட் கோ. பரபரப்பான 20 நிமிட சேஸிங்கில் ஆர்யா அணி 1-0 என்கிற கோல் கணக்கில் வெற்றிபெற்றது.

ஸ்ரீனிவாசனைக் கட்டிப்பிடித்து ஆர்யா வெற்றியைக் கொண்டாட, அவரது முகத்தில் பரவச நவரசம். "ரொம்ப நாள் கனவு சார். ஒரு நல்ல மேட்ச்சை ஆர்யாவோடு ஆடினதை வாழ்க்கையில் மறக்கவே முடியாது. விகடனுக்கு நன்றி!" என்று நெகிழ்ச்சியான குரலில் விடைபெற்றார் ஸ்ரீனிவாசன்.

"ஊர்ல இருந்தா, ஃபுட்பால் ஃபைனல்ஸ் சேர்ந்து பார்க்கலாம் பாஸ்!" என அடுத்த சர்ப்ரைஸ் ஷாக் தந்து அனுப்பினார் அசத்தல் ஆர்யா!