அத்தனை அதிகாலையில் டி-ஷர்ட், ஷார்ட்ஸோடு டீன் ஏஜ் பையன்களும் பெண்களும் 50 கிலோ போட்டைத் தோளில் சுமந்துகொண்டு ஆற்றுக்குள் இறங்கும் அழகு... அசத்தல்! தமிழகத்தின் மிக காஸ்ட்லி ஏரியாவான அடையாறு போட் கிளப்பின் லேண்ட்மார்க், இந்த போட் கிளப்தான். இந்த ஏரியாவில் இடம் கிடைத்தால், வீடு வாங்கப் பதிவு செய்து காத்திருக்கும் வி.வி.ஐ.பி-க்கள் - நடிகர் சூர்யா உட்பட - 150 பேருக்கும் மேல். ஒரு கிரவுண்டு, கிட்டத்தட்ட 7 கோடி ரூபாய்க்கு மேல் என்கிறார்கள்.
மேட்டருக்கு வாருங்கள். ஒலிம்பிக்கில் எந்த விளையாட்டுக்கும் இல்லாத தனிச்சிறப்பு படகுப் போட்டிக்கு உண்டு. பின்பக்கமாகத் திரும்பி வெற்றிக்கோட்டைத் தொடும் ஒரே விளையாட்டு இது மட்டும்தான்!
படகைத் தண்ணீரில் பதித்து துடுப்புகளைச் சுழற்றிய சில நொடிகளிலேயே 200 மீட்டர் தூரத்தைத் தாண்டுகிறார் தேசிய கோல்டு மெடலிஸ்ட் சங்கவி. ''ரெண்டு கிலோ மீட்டர் தூரத்தை மிகக் குறைந்த விநாடிகளில் தாண்டுவதுதான் ரேஸ். ஸ்பெஷல் கார்பன் ஃபைபரால் செய்யப்பட்ட துடுப்புகளைப் பயன்படுத்துவோம். ஒரு போட் ப்ளஸ் துடுப்புகளின் விலை 2 லட்சம் ரூபாய். ஓட்டுறப்போ சரியான திசையில் போறோமான்னு தெரியாது. சரியான திசையில்தான் படகைச் செலுத்துறோமான்னு தெரிஞ்சுக்க 'ரெடர்'னு ஒரு கருவியை ஷூவில் இணைச்சிருப்பாங்க. அது வழிகாட்டுறபடி படகைச் செலுத்துவோம். இந்த ரேஸ்ல கஷ்டமான சவாலே படகை பேலன்ஸ் செய்வதில்தான் இருக்கு!'' என்கிறார் சங்கவி.
'கந்தசாமி' படத்தில் படகு ஓட்டும் காட்சிகளில் நடிப்பதற்கு இங்குதான் பயிற்சி பெற்றாராம் விக்ரம்.
நதியில் படகில் மிதப்பவர்களை கரையில் நின்றபடியே 'ஸ்பீட்', 'ரொட்டேட்' என்று வழிமுறைகள் மூலம் செலுத்திக்கொண்டு இருந்தார் கோச் கஜேந்திரன். ஆசிய விளையாட்டுப் போட்டியில் வெண்கலம் வென்றவர். இந்திய அணியின் பயிற்சியாளராக இருந்தவரை மெட்ராஸ் போட் கிளப் பலத்த போராட்டங்களுக்குப் பிறகு இங்கு அழைத்து வந்திருக்கிறது.
| 
