மிஸ்டர் மியாவ்: ரிலையன்ஸ் ரிவர்ஸ்!

'எந்திரன்' படம் வெளியாவதற்கு முன்னரே, 'சுல்தான் தி வாரியர்' அனிமேஷன் படத்தை வெளியிட்டுவிடலாம் என குஷியில் இருந்தார், ரஜினி மகள் சௌந்தர்யா. ஆனால், அவர் சந்தோஷம் தொலைந்து போனதுதான் மிச்சம்! 'சுல்தான் தி வாரியர்' படத்தை பெரும் விலைக்கு வாங்க ஒப்புக்கொண்டிருந்த ரிலையன்ஸ் நிறுவனம், பணப் பற்றாக்குறை எனச் சொல்லி தெளிவாகப் பின்வாங்கிவிட்டதாம். மணிரத்னத்தின் 'ராவணன்' படத்துக்கு ஏற்கெனவே 'ஸாரி' சொன்ன ரிலையன்ஸின் இரண்டாவது ரிவர்ஸ் கியர்... அடுத்தடுத்து சில பரபரப்புகளையும் உண்டாக்குமாம்!

டைரக்டர்கள் ஹீரோவாகும் சீஸனோ என்னவோ... உடம்பை ஜம்மென வைத்துக்கொள்ள இப்போது எல்லா இயக்குநர்களும் 'ஜிம்'முக்குப் படையெடுக்க

ஆரம்பித்து விட்டார்கள். சென்னை வளசரவாக்கம் பகுதியில் இருக்கும் 'கேசவர்த்தினி இன்சாப் ஜிம்'மில் வேலுபிரபாகரன், ஏ.ஆர்.முருகதாஸ், ஹரி, கரு.பழனியப்பன் என இயக்குநர் பட்டாளமே தினசரி காலையில் ஆஜராகி விடுகிறது. உதவி டைரக்டர் வாய்ப்பு தேடும் எதிர்கால டைரக் டர்கள் ஆபீஸ் ஆபீஸாக ஏறிஇறங்குவதைவிட, நேராக இந்த ஜிம் வளாகத்துக்கே போய்விடலாம். டைரக்டர்கள் மட்டுமல்ல, என்.ஆர்.ஐ. கம்பெனி ஒன்றின் புதுப் படத்தில் ஹீரோ அவதாரம் எடுத்திருக்கும் கவிஞர் சிநேகன் மற்றும் முன்னாள் சில்வர் ஜூப்ளி ஹீரோ மைக் மோகன் ஆகியோரும்கூட சீரியஸாக 'ஜிம்'மிக் கொண்டிருக்கிறார்கள்.

அசுர வேகத்தில் வளர்ந்து வந்த பிரமிட் சாய்மீரா நிறுவனத்துக்கு அடுத்தடுத்து அடி! சென்னை தி.நகர் ஜி.என்.செட்டித் தெருவில் ஒரு பெரும் தொகைக்கு வாடகைக்கு பில்டிங்கை பிடித்திருந்த பிரமிட், திடீரென ஆபீஸை காலி செய்ய முடிவெடுத்திருக்கிறது. 'இப்படி திடுதிப்புன்னு சொன்னா எப்படி? நீங்க கொடுத்த அட்வான்ஸ் கழிகிறவரைக்கும் தங்கிட்டுப் போங்க!' என்று பில்டிங் ஓனர் கறாராகச் சொல்லி விட்டாராம்.

மலையாளப் படம் ஒன்றில் குதிரையேற்ற நடிகரும், பெல் நடிகையும் ஜோடியாக நடித்து வருகிறார்கள். அவுட்டோரில் படப்பிடிப்பு நடக்கும்போது ஹீரோவும், ஹீரோயினும் ஒரே அறையில் தங்குமளவுக்கு நெக்குருகி நெருக்கம் காட்டுகிறார்களாம். இத்தனைக்கும் நடிகர் நேற்று வரை லவ் நடிகையுடன் கொஞ்சிக் குலாவிக் கிடந்தவர்தான்.

'எம்.ஜி.ஆர்.' பட செல்வ இயக்குநர் இயக்கும் படத்திலிருந்து தீப நடிகர் திடீர் பிரேக் எடுத்துக்கொண்டு இணைப்புக் கடவுள் இயக்குநர் படத்தில் நடிக்கப் போய் விட்டாராம். செல்வ இயக்குநர் படப்பிடிப்பை நைல் நதி மாதிரி நீட்டிக்கொண்டே செல்வதுதான் இதற்குக் காரணம்.