மிஸ்டர் மியாவ்

‘மெட்ரோ’ ஆனந்த கிருஷ்ணன் அடுத்தாக அரசியல் பின்னணிகொண்ட கதையைப் படமாக்கவிருக்கிறார். விஜய் ஆண்டனி ஹீரோவாக நடிக்கவிருக்கும் இந்தப் படத்தின் படப்பிடிப்பு விரைவில் தொடங்குகிறது.

‘வணக்கம் சென்னை’க்குப் பிறகு ‘சுமோ’ திரைப்படத்தில் மிர்ச்சி சிவா, ப்ரியா ஆனந்த் இருவரும் மீண்டும் ஜோடி சேர்ந்திருக்கின்றனர். ஹோசிமின் இயக்கும் இந்தப் படத்துக்கு ராஜீவ் மேனன் ஒளிப்பதிவு செய்கிறார். பெரும்பாலான காட்சிகள் ஜப்பானில் படமாகின்றன.

சூர்யா, மோகன்லால், ஆர்யா, சாயிஷா நடித்திருக்கும் படம், ‘காப்பான்’. இந்தப் படத்தின் ஃபர்ஸ்ட் லுக் போஸ்டர் மற்றும் டீஸர் வெளியான நிலையில், படத்தின் இசை வெளியீட்டு விழாவைப் பிரமாண்டமாக நடத்தத் திட்டமிட்டிருக்கிறது, படக்குழு. இந்த நிகழ்ச்சியின் சிறப்பு விருந்தினர்களாக ரஜினி, ஷங்கர் கலந்து கொள்ளவிருக்கிறார்கள்.

‘பேட்ட’ படத்துக்குப் பிறகு கார்த்திக் சுப்பராஜ் இயக்கவிருக்கும் படத்தில் தனுஷ் நடிக்கிறார். இந்தப் படத்தின் ஷூட்டிங் வெளிநாடுகளில் நடைபெறவிருக்கிறது. தனுஷுக்கு ஜோடியாக மலையாள நடிகை ஐஸ்வர்ய லட்சுமி கமிட் ஆகியிருக்கிறார். இவர் விஷால் - சுந்தர்.சி கூட்டணியில் உருவாகவிருக்கும் படத்திலும் ஹீரோயினாக ஒப்பந்தமாகியிருக்கிறார்.

மம்மூட்டி நடிக்கும் ‘ஷைலாக்’ படத்தில் முக்கியக் கதாபாத்திரத்தில் நடிக்கிறார் ராஜ்கிரண். மலையாளத்தில் ராஜ்கிரண் நடிக்கும் முதல் படமான இதில், மம்மூட்டிக்கு ஜோடியாக மீனா நடிக்கிறார்.

‘கோடி ரூபாய் கொடுத்தாலும் இனி முத்தக் காட்சிகளில் நடிப்ப தில்லை’ என்று முடிவு எடுத்திருக்கிறார், மில்க் நடிகை. இந்த முடிவுக்குப் பின்னால் முக்கியமான காரணம் இருப்பதாகப் பேசிக்கொள்கிறார்கள், சக முன்னணி நடிகைகள்.

பலதரப்பட்ட பணிகளுக்கு மத்தியிலும் தன்னுடைய அடுத்தப் படத்துக்கான அறிவிப்பை வெளியிட்டிருக்கிறார், அரசியல் நடிகர். காரணம், ஈழத்துப் பெருநிறுவனத்திடம் ஏற்கெனவே இவர் வாங்கிக் குவித்த கடன்கள்தானாம். சம்பளம் பெறாமல் இந்தப் படத்தை முடித்துக்கொடுக்க வேண்டிய கட்டாயத்தில் இருக்கிறார் நடிகர்.

முன்னணி நடிகரின் புதுப்படப் பாடல் ஒன்று இணையத்தில் வெளியானதால், அதிர்ச்சியில் இருக்கிறது படக்குழு. இது, பப்ளிசிட்டிக்காகத் திட்டமிட்டே செய்யப்பட்ட வேலைதான் என்கிறார்கள் ஒரு தரப்பினர்.