சினிமா
Published:Updated:

“இப்போதுதான் உரத்துப் பேச வேண்டும்!”

“இப்போதுதான் உரத்துப் பேச வேண்டும்!”
பிரீமியம் ஸ்டோரி
News
“இப்போதுதான் உரத்துப் பேச வேண்டும்!”

கவிதா முரளிதரன்

ந்தித் திரைப்படங்களுக்குத் திரைக்கதையும் பாடல்களும் வசனங்களும் எழுதிப் புகழ்பெற்றவர் ஜாவேத் அக்தர்.  சலீம் கானோடு சேர்ந்து ஜாவேத் அக்தர் திரைக்கதை எழுதிய திரைப்படங்களின் வெற்றி, சினிமாவில் எழுத்தாளர்களுக்கென்று தனித்த அந்தஸ்தைப் பெற்றுத்தந்தது. 1980களில் இந்தக் கூட்டணி பிரிந்த பிறகும் பாடலாசிரியராக மிளிர்ந்தார் ஜாவேத். சமீபத்தில் தமிழ்நாடு முற்போக்கு எழுத்தாளர்கள் கலைஞர்கள் சங்க மாநாட்டில் கலந்துகொள்வதற்காகப் புதுவை வந்தவரைச் சந்தித்தேன்.

“இப்போதுதான் உரத்துப் பேச வேண்டும்!”

“இப்போது உலகில் உயிரோடிருக்கும் மொழிகளில் மூத்த மொழி தமிழ். இந்தி என்கிற ஒரு மொழி உருவாகி வெறும் 200 ஆண்டுகள்தான் ஆகின்றன. தில்லியிலும் மேற்கு உத்தரப்பிரதேசத்திலும் பேசப்பட்ட கடிபோலி மொழியின் தேவநாகரி எழுத்து வடிவம்தான் இந்தி. ஆங்கிலேய ஆட்சிக்காலத்தில்தான் இந்தி உருவானது” என்று சொல்லும் ஜாவேத், தன்னை ‘இந்திக் கவிஞர்’ என்று அழைப்பதை விடவும் ‘உருதுக் கவிஞர்’ என்று அழைப்பதையே விரும்புகிறார்.

“எங்கள் குடும்பம்   சுதந்திரப் போராட்டத்தில் கலந்து கொண்ட பெருமை வாய்ந்தது. 1857-ல் நடந்த முதல் இந்திய சுதந்திரப் போரில் பங்கு கொண்ட ஃபைசல்-இ-அக்-கைத்ராபாதி, என் கொள்ளுத் தாத்தா. அந்தமான் சிறையில் அடைக்கப்பட்டிருந்த அவர் 1861-ல் இறந்தார். இப்போதும் அவரது சமாதி அந்தமானில் இருக்கிறது. என் பெற்றோர் இருவரும் எழுத்தாளர்கள். அப்பா ஜான் கவிஞராகவும் திரைப்படப் பாடலாசிரி யராகவும் இருந்தார். அம்மா சாபியா அக்தர் பாடகராகவும் எழுத்தாளராகவும் இருந்தார்” என்று தன் குடும்பப் பின்னணி குறித்துப் பகிர்ந்துகொள்கிறார்.

“இப்போதுதான் உரத்துப் பேச வேண்டும்!”

“முற்போக்கு எழுத்தாளர் சங்க மாநாட்டில் கலந்துகொள்ள வந்திருக்கிறீர்கள். உங்களுக்கு இடதுசாரி சிந்தனைகள் மீது ஈர்ப்பு உண்டா?”

`` ஏப்ரல் 13, 1936-ல் முற்போக்கு எழுத்தாளர்களின் முதல் மாநாடு லக்னோவில் நடைபெற்றது. அதை ஏற்பாடு செய்ததும் கலந்து கொண்டதும் கம்யூனிஸ்டுகள் என்று பரவலாகச் சொல்லப்பட்டது. ஆனால்அ து உண்மையில்லை. அந்த மாநாட்டில் ஜவஹர்லால் நேருவுக்குப் பங்கு இருந்தது. எந்த அரசியல் சட்டகத்துக்குள்ளும் அடங்காத ரவீந்திரநாத் தாகூர் அந்த மாநாட்டுக்கு எழுதிய வாழ்த்துச் செய்தி, இன்றைய காலகட்டத்துக்கும் பொருந்தக்கூடிய ஒன்று. தமிழ், தெலுங்கு, மலையாளம், கன்னடம் என்று பல மொழிகளிலிருந்து கம்யூனிஸ்டுகள் அல்லாதவர்களும் மாநாட்டில் கலந்துகொண்டார்கள். கம்யூனிஸ்டுகளும் கலந்து கொண்டார்கள். உண்மையில் முற்போக்காக இருப்பதற்கு கம்யூனிஸ்டாக இருக்க வேண்டும் என்கிற அவசியம் இல்லை, ஆனால் எல்லா கம்யூனிஸ்டுகளுமே நிச்சயம் முற்போக்காக இருக்க வேண்டும்.”

“கலையும் இலக்கியமும் மக்களை மையப்படுத்தியதாக இருக்க வேண்டும் என்று நினைக்கிறீர்களா?”

``தனிமனிதத் துயரங்களையும் வலியையும் வாழ்க்கையையும் பேசுவதே சிறந்த இலக்கியம் என்று சொன்னார்கள், சமூகப் பிரச்னைகளைப் பேசினால் அதைப் பிரசாரம் என்று நிராகரித்த ஒரு காலகட்டமும் இருந்தது. சினிமா மட்டும் அப்படிப்பட்ட தாக்கங்களிலிருந்து தப்பித்தது. காரணம், சினிமா எடுத்த தொழிலதிபர்களுக்கு சமத்துவ எண்ணமெல்லாம் இல்லை. ஆனால் சினிமாவைப் பார்ப்பவர்கள், அடித்தட்டு மக்கள். அதனால் அடித்தட்டு மக்களின் பிரதிநிதிகளே பெரும்பாலும் கதாநாயகர்களாக இருந்தார்கள். சினிமாக் கொட்டகைகளிலிருந்து மல்டிபிளக்ஸ்களுக்குத் திரை மாறும்போது இந்த நிலையும் மாறியது.

“இப்போதுதான் உரத்துப் பேச வேண்டும்!”

கடந்த 20 ஆண்டுகளில் வந்த திரைப்படங்களில் உழைக்கும் வர்க்க ஹீரோக்கள் மிக அரிதாகவே இருந்தார்கள். இப்போது அந்த நிலை மாறிக்கொண்டிருக்கிறது. ஆனால் இப்போதைய காலகட்டத்தில் முற்போக்கு எழுத்தாளர்கள் இன்னும் தீவிரமாகச் செயல்பட வேண்டிய, எழுத வேண்டிய தேவை இருக்கிறது. கருத்துச் சுதந்திரம், அரசியல் சாசனம் எல்லாமே சவால்களை எதிர்கொள்ளும் ஒரு காலகட்டத்தில் கலை மூலமாகவும் இலக்கியம் மூலமாகவும் அந்த சவாலை எதிர்கொள்ள வேண்டும்.

அரசியல் சாசனம் எல்லோரும் சமமானவர்கள் என்று சொல்கிறது. யாரை வேண்டுமானாலும் திருமணம் செய்துகொள்ளும் உரிமையைத் தருகிறது. ஆனால், நம் ஆட்சியாளர்களுக்கு அவற்றிலெல்லாம் நம்பிக்கை இல்லை. அரசியல் சாசனம் மக்களுக்கான அடிப்படைத் தேவைகள் உறுதி செய்யப்பட வேண்டும் என்கிறது. ஆனால், நம் ஆட்சியாளர்கள் மக்களைக் கொன்றாவது தொழிற்சாலைகளை நடத்த வேண்டும் என்று நினைக்கிறார்கள். அரசியல் சாசனம் நமக்குத் தந்திருக்கும் உரிமைகளை வலியுறுத்தும் நாம் எல்லாம் தேச விரோதிகள் என்கிற ஆட்சியாளர்களுக்கு இந்த அரசியல் சாசனம் எப்படி உகந்ததாக இருக்க முடியும்?”

பாலிவுட்டில் கலகக்குரலாக அடையாளப்படுத்தப்பட்டிருக்கும் ஜாவேத் அக்தரின் பிள்ளைகளும் அவரைப் போலவேதான் இருக்கிறார்கள். சித்தாந்தரீதியாக கடவுள் நம்பிக்கையற்றவர்களான ஃபர்ஹன் அக்தரும் ஜோயா அக்தரும் பாலிவுட்டின் நம்பிக்கை நட்சத்திரங்கள். இயக்குநரும் நடிகருமான ஃபர்ஹன் அக்தர், 2013-ல் ‘பாலியல் வன்முறை மற்றும் பாலினப் பாகுபாட்டிற்கு எதிரான ஆண்கள்’ என்கிற அமைப்பை நிறுவி, தொடர்ந்து செயல்பட்டுவருகிறார். ஜாவேத் அக்தரின் மகள் ஜோயா அக்தர், பாலிவுட்டில் குறிப்பிடத்தகுந்த ஓர் இயக்குநர். சமீபத்தில் நெட்ஃபிளிக்ஸில் வெளியான ‘லஸ்ட் ஸ்டோரீஸ்’ என்னும் திரைப்படத்தில் ஒரு பகுதியை இயக்கியிருக்கிறார். படம் பல விவாதங்களைக் கிளப்பியிருக்கிறது.

ஒரு வெகுஜனக் கலைஞன் அரசியல் உணர்வுள்ளவராகவும் இருக்கவேண்டும் என்பதற்கான சமகால உதாரணம் ஜாவேத் அக்தர்.