Published:Updated:

பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?
பிரீமியம் ஸ்டோரி
News
பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

ஸ்திரேலியாவைச் சேர்ந்தவர்கள் இங்கியாம்பா (Ngiyaampaa) என்ற பழங்குடியின மக்கள். அவர்களின் கதைகள்படி பல்லாயிரம் ஆண்டுகளுக்குமுன் காக்கையும் கழுகும் இங்கியாம்பா மக்களோடு மனிதர்களாகவே வாழ்ந்துகொண்டிருந்தன.

ஒரு பெண் கழுகு தன் குழந்தை மற்றும் கணவர் கழுகோடு வாழ்ந்துகொண்டிருந்தது. அவர்களுக்கு அருகேதான் ஒரு காக்கையின் குடிசையும் இருந்தது. அது கழுகு வேட்டைக்குச் செல்லவேண்டிய நேரம். வேட்டைக்குத் தன் குழந்தையைக் கொண்டுசெல்ல முடியாது. அதனால் பெண் கழுகு காக்கையிடம் சென்று உதவி கேட்டது.

பெண் கழுகு: காக்கையே! நான் வேட்டைக்குச் செல்லவேண்டும். இப்போது இரை கிடைப்பது மிகவும் கடினமாக இருக்கிறது. வெகுதூரம் செல்லவேண்டும். நான் போய் வரும்வரை என் குழந்தைக் கழுகை நீ பார்த்துக்கொள்வாயா?

பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

காக்கை: இல்லை இல்லை... என்னால் உன் குழந்தையைப் பார்த்துக்கொள்ள முடியாது. அது ரொம்ப அழுகிறது. என்னால் அதைச் சமாளிக்க முடியாது.

பெண் கழுகு: என் குழந்தை இனிமேல் அழாது. தயவுசெய்து பார்த்துக்கொள் காக்கையே! நீ அவனை தனியாகக் கொண்டு சென்று அமைதியான இடத்தில் வைத்துக்கொள். அதோடு அவனுக்குப் பாடினால் பிடிக்கும். நீ பாடிக்கொண்டிருந்தால் அவன் அமைதியாகத் தூங்கிவிடுவான்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

காக்கை மிகவும் பிடிவாதமாக மறுத்தது. அதற்குக் குழந்தையைப் பராமரிப்பதில் துளியும் விருப்பமில்லை.

காக்கை: இல்லை. என்னால் முடியவே முடியாது. உன் குழந்தையை உன்னுடனே கொண்டுசெல்.

பெண் கழுகுக்கோ வேறு வழிதெரியவில்லை. காக்கைதான் அருகே இருக்கிறது. அதனால் அதைச் சம்மதிக்க வைக்க முயன்றது.

பெண் கழுகு: இந்த ஒருமுறை நீ என் குழந்தையைப் பார்த்துக்கொள். நான் வேட்டை முடிந்து கொண்டுவரும் உணவில் பாதியை உனக்கு பகிர்ந்து தருகிறேன்.

சொல்லிக்கொண்டே காக்கையின் கையில் குழந்தையைக் கொடுத்துவிட்டுப் புறப்பட்டது. இதற்குமேலும் மறுக்கமுடியாமல் காக்கையும் குழந்தையை வாங்கிக்கொண்டது. பெண் கழுகு கணவரோடு வேட்டைக்குப் புறப்பட்டது.

பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

குழந்தையைப் பெற்றுக்கொண்டு அதன் குடிசைக்குள் சென்ற காக்கை குழந்தையோடு பேசியது, பாடியது. கதைகளும் சொல்லிப் பார்த்தது. ஆனால், குழந்தை அழுகையை நிறுத்தவில்லை.

அழுதது, அழுதது... அழுதுகொண்டேயிருந்தது.

கழுகின் குழந்தை அழுதுகொண்டே இருந்ததில் எரிச்சலடைந்தது காக்கை. அதனால் வெளியே வாசலில் கிடந்த தடியை எடுத்துவந்து குழந்தையை பலமாக அடித்தது. காக்கை அடித்த அடியில் குழந்தை இறந்தேவிட்டது. இறந்த குழந்தையை அதன் குடிசைக்குப் பின்னால் கொண்டுசென்று போட்டு அதற்குமேல் இலைகளால் மூடி, கங்காரு தோலைப் போட்டு மறைத்துவிட்டது. பிறகு மீண்டும் பழையபடி அமைதியாகக் காக்கை தன் வேலைகளைச் செய்துகொண்டிருந்தது.

மதியத்துக்குமேல் கழுகு திரும்பிவந்தது. அதுவருவதைத் தூரத்திலேயே பார்த்துவிட்ட காக்கை குடிசைக்குள் ஓடிச்சென்று குழந்தைக்குப் பாடுவதைப் போல் பாசாங்கு செய்தது. கதவுக்குப் பின்னால் அமர்ந்து பாடிக்கொண்டிருந்த காக்கையிடம் சென்றது கழுகு.

பெண் கழுகு: காக்கையே! குழந்தை நன்றாகத் தூங்கிவிட்டதா!

காக்கை: ஆம் நன்றாகத் தூங்குகிறான். குடிசைக்குப் பின்னால் படுக்க வைத்துள்ளேன். நல்ல தூக்கத்தில் இருக்கிறான். அவனை எழுப்பித் தூக்கத்தைக் கலைத்துவிடாதே.

பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

பெண் கழுகு: இல்லை நான் எழுப்பி என் வீட்டுக்குக் கொண்டு போகிறேன். உங்களுக்குச் சிரமம் கொடுத்தது போதும். இனி நான் பார்த்துக் கொள்கிறேன்.

குழந்தையை எடுக்க குடிசைக்குப் பின்னால் சென்ற கழுகு அங்கு கங்காரு தோல் கிடப்பதைப் பார்க்கிறது.

பெண் கழுகு: ஓ என் குழந்தைக்குக் கங்காரு தோலால் போர்த்தி இருக்கிறதா இந்தக் காக்கை...

சந்தோசப்பட்டுக் கொண்டே தோலை எடுத்த கழுகுக்கு அதிர்ச்சி காத்திருந்தது. அங்கிருந்த இலைகளை அகற்றி விட்டுப் பார்த்து வீறிட்டுக் கத்தியது.

பெண் கழுகு: குழந்தை! என் குழந்தை..! காக்கை என் குழந்தையைக் கொன்றுவிட்டது.

கழுகின் கதறல் கேட்டு மற்றவர்கள் ஓடிவருவதற்குள் காக்கை குடியிருப்புக்கு அருகிருந்த புதர்க்காட்டுக்குள் ஓடிவிட்டது. குழந்தையின் உடலைத் தூக்கிக்கொண்டு கழுகும், மற்றவர்களும் காக்கையைத் தொடர்ந்து புதருக்குள் ஓடினார்கள். எவ்வளவு தேடியும் அதைக் கண்டுபிடிக்க முடியவில்லை. கழுகு அனைவரிடமும் கத்தியது.

பெண் கழுகு: அதைத் தொடர்ந்து சென்று துரத்திப் பிடியுங்கள். அது என் குழந்தையைக் கொன்றுவிட்டது.

அனைத்து வேட்டைக் காரர்களும் வெட்டுக்கத்திகளோடு காக்கையைத் தேடினார்கள். அடர்ந்த புதரை ஆங்காங்கே வெட்டிக்கொண்டு ஊடுருவிய யார் கைகளுக்கும் காக்கை அகப்படவில்லை. அது புதர்க்காட்டின் நடுப்பகுதியில் ஒளிந்து கொண்டிருந்தது. இவர்களோ காட்டின் ஓரங்களிலேயே தேடிக் கொண்டிருந்தார்கள். எவ்வளவு தேடியும் கிடைக்காததால் கழுகு ஒரு முடிவுக்கு வந்தது.

பழங்குடியினர் கதைகள் - 5 - கழுகுக்கும் காக்கைக்கும் ஏன் சண்டை?

பெண் கழுகு: நாம் காட்டுக்குத் தீ வைத்துவிடுவோம். அதுதான் என் குழந்தையைக் கொன்றதற்குத் தண்டனை. இப்படியொரு பாவத்தைச் செய்ததற்கு அதைத் தண்டித்தே ஆகவேண்டும். காட்டுக்குத் தீ வைக்கப்பட்டது. காடு பற்றியெரிந்தது. எறிந்துகொண்டிருந்த நெருப்பு தணியும்வரை காத்திருந்தார்கள்.

நெருப்பும் அது அணைந்தபிறகு உண்டான அனல்புகையும் தணிந்தது. அனைத்துக் கண்களும் காட்டை ஊடுருவி உற்றுநோக்கிக் கொண்டிருந்தன. புகை தணிந்ததும் ஒரு கறுப்புப் பறவை அதிலிருந்து பறந்துசென்றது. அதைப் பெண் கழுகு பார்த்தது.

பெண் கழுகு: அதோ பாருங்கள், அங்கு போகிறது. அதுதான் காக்கை. அது தண்டிக்கப்பட்டுவிட்டது. அதன் ஆன்மா ஒரு கறுப்புப் பறவையாகப் பறந்துசெல்கிறது.

காலப்போக்கில் காக்கையைத் தண்டித்த பாவத்துக்காகக் கழுகும் பறவையாக மாறுமாறு சபிக்கப்பட்டுவிட்டது. குற்றம் செய்வதும் தவறு அதற்குப் பழிவாங்குவதும் தவறு. வன்முறைக்கு வன்முறையே தண்டனையில்லை என்பதை அன்றிலிருந்து இங்கியாம்பா பழங்குடிகளும் உணர்ந்துகொண்டு அமைதியாக வாழ்ந்துவருகிறார்கள்.

அதை உணராமல் கழுகும் காக்கையும் மட்டும் இன்னும் சண்டையிட்டுக் கொண்டேயிருக்கின்றன. காக்கை இன்னும் கழுகின் கூட்டுக்குள் புகுந்து அதன் குஞ்சுகளைத் திருடுகிறது. வேட்டையாடிய இரையோடு, வானில் பறந்துகொண்டிருக்கும் கழுகிடம் சென்று சண்டையிட்டு இரையைப் பிடுங்க முயல்கிறது காக்கை. எத்தனை ஆண்டுகள் கடந்தாலும் இரண்டுக்குமான பகைமட்டும் மாறவேயில்லை. ஆனால், இங்கியாம்பா மக்கள் அவற்றிடமிருந்து பெற்றுக்கொண்ட பாடத்தால் தங்கள் கலாசாரத்தைச் சிறப்பாக அமைத்துக்கொண்டார்கள்.

- கே.சுபகுணம்

ஓவியங்கள்: ரமணன்