ஒரு பயணத்தில் அந்நியர்களாக அறிமுகமானாலும், ஒரு சில காட்சிகளிலேயே கார்த்திக் ஆர்யனுக்கும், கியாரா அத்வானிக்கும் ஒரு பிணைப்பு ஏற்படுகிறது. ஒரு பொய்யை மறைப்பதற்காகவும், வீட்டில் நல்லது நடப்பதற்காகவும், பூட்டப்பட்ட புராதன அரண்மனை ஒன்றில் சென்று தங்குகிறது இந்த ஜோடி. அந்த அரண்மனையின் ஓர் அறையில்தான் மஞ்சுலிகாவின் ஆவியை (பாலிவுட் சந்திரமுகி) மந்திர தாந்திரிகங்களின் உதவியுடன் அடைத்து வைத்திருக்கின்றனர்.

சமய, சந்தர்ப்பங்களால் கியாராவின் குடும்பம் உட்பட, கிராமம் முழுவதற்கும் 'ரூ பாபா' என்னும் சாமியாராகிறார் கார்த்திக் ஆர்யன். தன்னால் இறந்தவர்களுடன் பேச முடியும் என்றும் நம்ப வைக்கிறார். பின்னர் என்ன, ஒரு சுபயோக சுப தினத்தில், அதே சமய சந்தர்ப்பங்களால் கார்த்திக் ஆர்யன் மஞ்சுலிகாவின் அறையைத் திறந்துவிட, வெளிவரும் மஞ்சுலிகா, பல்வேறு ரகசியங்களையும் வெளிக்கொண்டு வருகிறாள். இறுதியில் கியாராவின் பெரிய குடும்பம், கார்த்திக் ஆர்யன் உதவியுடன் மஞ்சுலிகாவை சமாளித்ததா இல்லையா என்பதுதான் கதை.

தமிழ் சினிமாவில் எப்படி 'சந்திரமுகி' ஒரு கிளாசிக் படமோ, அதேபோல்தான் பாலிவுட்டில் 'Bhool Bhulaiyaa'. அக்ஷய் குமார், வித்யா பாலன் நடிப்பில் பிரியதர்ஷன் இயக்கத்தில் சூப்பர்ஹிட்டான படம். தற்போது இயக்குநர் அனீஸ் பாஸ்மீ, ஆகாஷ் கௌசிக்கின் கதையை 'Bhool Bhulaiyaa 2'-வாக மாற்றியிருக்கிறார். டெம்ப்ளேட் அதேதான் என்றாலும், 'அரண்மனை', 'காஞ்சனா' படங்களின் சீக்குவல்கள் போலவே இதையும் தனிப்படமாகத் தாராளமாகப் பார்க்கலாம்.

படத்தின் சீக்குவல் அறிவிக்கப்பட்டபோதே கார்த்திக் ஆர்யன், பழைய அக்ஷய் குமாரின் மேஜிக்கை மீட்டுருவாக்கம் செய்வாரா என்பதாகச் சந்தேகங்கள் எழுந்தன. அப்படியெல்லாம் சந்தேகப்பட்டதே தவறுதான் என்று என்னும் வகையில் ஒவ்வொரு காட்சியையும் தன் நடிப்பால் கட்டி ஆள்கிறார் கார்த்திக் ஆர்யன். பயத்தால் மிரளும் உடல்மொழி, காமெடி டைமிங், சமாளிப்புகள் சக்சஸாகும்போது வெளிப்படும் துள்ளல் என எல்லா எமோஷன்களிலும் பாஸாகிறார். பொய், பித்தலாட்டம் செய்யும் ஜோசியக்காரத் தம்பதிகளை அவர் டீல் செய்யும் காட்சி, பேய் உள்ளே புகுந்ததாகப் பெண்மை கலந்த நளினத்தில் நடனமாடுவது எனப் பல காட்சிகளில் ஒரு நடிகனாக மிளிர்கிறார்.

நாயகி கியாரா அத்வானிக்கு நல்லவேளையாகக் கதையில் முக்கிய வேடம்தான். சிறப்பாகச் செய்திருக்கிறார். காமெடிக்கு என ராஜ்பால் யாதவ் (முதல் பாகத்திலும் வந்தவர்), சஞ்சய் மிஸ்ரா, அஸ்வினி கல்சேகர் உள்ளிட்டோர் கிச்சு கிச்சு மூட்டுகின்றனர். ராஜ்பால் யாதவ் தன் கெட்டப்புடன் வந்து நின்றாலே திரையரங்கம் குலுங்குகிறது.

முதல் பாகத்திலிருந்து தீம் மியூசிக்குடன் கூடிய அந்த டைட்டில் சாங் மற்றும் 'மேரே தோல்னா' (ரா... ரா...) பாடல்களை இப்போதைய டிரெண்டுக்கு ரீமிக்ஸ் செய்திருக்கிறார்கள். 'மேரே தோல்னா' பாடலுக்கு தபு, கார்த்திக் ஆர்யன், கியாரா அத்வானி என ஒவ்வொருவரும் தனித்தனியே அவரவர் வெர்ஷனில் நடனமாடி இருக்கிறார்கள். அதுவே ஒரு நாஸ்டால்ஜியா உணர்வைக் கொடுத்து 90ஸ் கிட்ஸை கட்டிப் போடுகிறது.

அதே சமயம், பார்த்தவுடன் காதல், குடும்ப விவகாரங்களுக்கு அந்நியரிடம் உதவி கேட்பது என முதல் 20 நிமிடங்கள் பார்த்துப் பழகி எக்ஸ்பையரியான பாலிவுட் ஸ்க்ரிப்ட். பெரிய அரண்மனை, அதனால் பெரிய குடும்பம், நிறையக் கதாபாத்திரங்கள் என எல்லாம் சரிதான். ஆனால், யாருக்கு யார் என்ன உறவுமுறை என்பது புரியவே இன்னுமொரு 20 நிமிடங்கள் தேவைப்படுகின்றன. காமெடி படங்களில் லாஜிக் பார்க்கக்கூடாதுதான் என்றாலும் ஒரு கிராமமே முட்டாளாக இருப்பது என்ன லாஜிக்கோ!

வழக்கமான ஹாரர் காமெடிகளில் இருப்பதுபோலவே இதிலும் காமெடி தூக்கல், ஹாரர் குறைவு. கிளாசிக் படத்தின் பேயைக் கொண்டு வருவது என்று முடிவான பிறகு ஹாரராக இன்னமுமே விளையாடியிருக்கலாமே! அதேபோல் VFX காட்சிகளுக்கும் கொஞ்சம் கூடுதலாக மெனக்கெட்டிருக்கலாம்.

ஆனால், மொத்தமாக 140 நிமிடங்கள் எங்கும் தேங்கி நிற்காமல் படம் என்டர்டெயின் செய்வது ஆறுதலான விஷயம். முதல் பாகத்தின் கொண்டாட்ட உணர்வு இதில் கொஞ்சம் மிஸ்ஸிங் என்றாலும் கார்த்திக் ஆர்யனின் காமெடி கலாட்டாக்கள் படத்தைக் காக்கின்றன. தபுவின் நடிப்பும் மிரட்டல் ரகம் என்பதால், பேய் போர்ஷன்களும் பாஸ் மார்க் பெறுகின்றன.