Published:Updated:

இமைக்கா நொடிகள் - சினிமா விமர்சனம்

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
இமைக்கா நொடிகள் - சினிமா விமர்சனம்
இமைக்கா நொடிகள் - சினிமா விமர்சனம்

இமைக்கா நொடிகள் - சினிமா விமர்சனம்

பிரீமியம் ஸ்டோரி

சீரியல் கில்லருக்கும் சி.பி.ஐ அதிகாரிக்குமான ஆடுபுலி ஆட்டமே ‘இமைக்கா நொடிகள்!’

இமைக்கா நொடிகள் - சினிமா விமர்சனம்

பெங்களூரையே உலுக்கிய ருத்ரா எனும் சீரியல் கில்லரை சி.பி.ஐ போலீஸ் அதிகாரி நயன்தாரா கொன்று வழக்கை முடிக்கிறார். ஐந்து வருடங்களுக்குப் பின்பும் அதே ஸ்டைலில் ‘ருத்ரா’ என்ற பெயரிலேயே கொலைகள் அரங்கேறுகின்றன. அந்த சைக்கோ சீரியல் கில்லர் யாரென நயன் கண்டுபிடிப்பதை, பரபர திரைக்கதையில் சொல்லியிருக்கிறார் இயக்குநர் அஜய் ஞானமுத்து.

இமைக்கா நொடிகள் - சினிமா விமர்சனம்



சி.பி.ஐ அதிகாரி அஞ்சலி விக்ரமாதித்யன் பாத்திரத்தில் நயன்தாரா. கோபம், ஆக்ரோஷம், பாசம் எல்லாவற்றிற்கும் ஈடுகொடுக்கிறார். அதர்வா - ராஷி கண்ணாவின் சுவாரஸ்யமற்ற காதல் காட்சிகள், படத்தின் நீளத்துக்கு மட்டுமே உதவியிருக்கிறது. ‘ருத்ரா’ தாண்டவ நடிப்பில் பாலிவுட் இயக்குநர் அனுராக் காஷ்யப். `பொடிப்பயலே கைய கிய்ய கிழிச்சிக்கப்போற’  என அதர்வாவை டீல் செய்வதில் தெறிக்கிறது அனுராக்கின் மெர்சல். இயக்குநர் மகிழ் திருமேனியின் குரலுதவி, அவர் உருவத்துக்குப் பொருந்தினாலும் பல இடங்களில் உதட்டோடு பொருந்தவில்லை.  படத்தில் இனிய ஆச்சர்யமாக விஜய் சேதுபதி. ‘ஆர் யூ ஓ.கே பேபி?’ என அவர் நயனிடம் கேட்கும்போது அரங்கம் குலுங்கி அதிர்கிறது. நடிப்பில் கலக்கவும், கலங்கவும் வைக்கிறார்.

ஆக்‌ஷன் - த்ரில்லர் - ரொமான்ஸ் என மூன்று ஏரியாக்களிலும் புகுந்து புழுதி கிளப்புகிறது ஆர்.டி.ராஜசேகரின் ஒளிப்பதிவு.  `ஹிப் ஹாப்’ தமிழாவின் இசையில் ‘நீயும் நானும் அன்பே’ பாடல் மட்டும் வசீகரிக்கிறது. 

இமைக்கா நொடிகள் - சினிமா விமர்சனம்

சி.சி.டி.வி கேமரா, செல்போன் நெட்வொர்க் என்று ‘ருத்ரா’ எதிலும் சிக்காதது, அதேநேரத்தில் பாப்கார்ன் பொட்டலம் பாதி காலியாகும் இடைவெளியில் அதர்வா, சி.பி.ஐயாலேயே கண்டுபிடிக்க முடியாத குற்றவாளியைக் கண்டுபிடிப்பது,    மருத்துவ மனையில் இருந்து அதர்வா தப்பித்து குற்றவாளியைக் கண்டுபிடித்து மீண்டும் சைக்கிளிலேயே அதே மருத்துவமனைக்கு வந்து மீண்டும் தப்பித்து...மறுபடி அதே மருத்துவமனைக்கு வந்து ஆம்புலன்ஸ் ஓட்டி... முடியலப்பா! அதேமாதிரி வீட்டுக்காவலில் இருக்கும் நயன் நினைத்த நேரமெல்லாம் யாருக்கு வேண்டுமானாலும் போன் போட்டுப் பேசுகிறார். ஒரு கொத்துப் புரோட்டாவும் குடல் குழம்பும் மட்டும்தான் ‘ஸ்விக்கி’யில் ஆர்டர் செய்து வரவழைக்க வில்லை.

`நொடிகள்’ என டைட்டிலில் வைத்து விட்டு `மணிக்கணக்காய்’ கதை நீள்வது மைனஸ். தியேட்டரை விட்டு வெளியே வரும்போது இரண்டு, மூன்று படங்கள் பார்த்த உணர்வு.

கொஞ்சம் கத்தரி போட்டு கச்சிதமாக எடுத்திருந்தால், இமைக்காமல் பார்த்திருக்கலாம்.

- விகடன் விமர்சனக் குழு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு