Published:Updated:

செக்கச்சிவந்த வானம் - சினிமா விமர்சனம்

செக்கச்சிவந்த வானம் - சினிமா விமர்சனம்
பிரீமியம் ஸ்டோரி
News
செக்கச்சிவந்த வானம் - சினிமா விமர்சனம்

செக்கச்சிவந்த வானம் - சினிமா விமர்சனம்

`டான் அப்பாவின் அரியாசனத்துக்கு அடுத்த வாரிசு யார்?’ என மகன்களுக்குள் நடக்கும் யுத்தத்தில் சிவந்த வானம் இது.

செக்கச்சிவந்த வானம் - சினிமா விமர்சனம்

படத்தின் பலமே வானத்து ஜன்னலில் எட்டிப்பார்க்கும் நட்சத்திரப் பட்டாளம்தான்.முரட்டுத்தனமும் வேகமும் கொண்ட மூத்த மகன் வரதனாக அர்விந்த் சுவாமி, அப்பாவின் சோபாவில் ஸ்டைலாகத் தாவி அமரும் தியாகுவாக செம ஃபிட் அருண் விஜய், எதற்கும் அலட்டிக்கொள்ளாத `கள்ளக் களவாணி’ எத்திராஜாக சிம்பு என்று மூன்று மகன்களும் பக்கா.  இவர்கள் மூவருக்கும் நடுவே மாட்டிக் கொண்ட தாதா தகப்பனாக பிரகாஷ் ராஜ். அதே வழக்கமான நடிப்பு. மற்ற கதாபாத்திரங்கள் மணிரத்னத்தின் வழக்கமான வார்ப்புகளாய் விளங்க, தன் அசால்ட்டான ஒன்லைனர்களாலும் அழகான நடிப்பாலும், சிவக்கும் வானத்திலும் தனித்துத் தெரியும் ஒற்றை நட்சத்திரமாய் ஜொலிக்கிறார் விஜய் சேதுபதி. 

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
செக்கச்சிவந்த வானம் - சினிமா விமர்சனம்



 ஜோதிகா, ஐஸ்வர்யா ராஜேஷ், டயானா எரப்பா, அதிதி ராவ், ஜெயசுதா,  தியாகராஜன், சிவா ஆனந்த் ஆகியோர் கிடைத்த இடங்களில் ஸ்கோர் செய்திருக்கிறார்கள்.

‘இறைவன் கொடுத்த வரமே’ என்று அருண்விஜய், ஐஸ்வர்யா ராஜேஷை அழைப்பது, ஜோதிகாவும் அதிதியும் சந்திக்கும் இடம் என்று பல காட்சிகளில் செயற்கையான வசனங் களும் பாத்திரங்களின் போலியான உடல்மொழிகளும் சலிப்பூட்டுகின்றன.

சென்னையில் ஏது ‘டுமீல் டுமீல்’ துப்பாக்கி தாதாக்கள், புதுச்சேரியில் ஏது இப்படிப்பட்ட பாலியல் கூடம் என்று பல கேள்விகள். ‘சேனாதிபதி அரசியல்வாதிகளின் பினாமி’ என்று வசனம் வருகிறது. ஆனால் பிரகாஷ்ராஜ் இடத்தைப் பிடிப்பதற்கு நடக்கும் வாரிசு யுத்தத்தில் அரசியல் வாதிகளோ அதிகார வர்க்கமோ குறுக்கிடாதது எந்த ஊர் லாஜிக்? நியாயமாகப் பார்த்தால் ‘அடுத்த சேனாதிபதி யார்?’ என்று தீர்மானிப்பவர்களே அரசியல்வாதிகளாகத்தானே இருப்பார்கள்!

செக்கச்சிவந்த வானம் - சினிமா விமர்சனம்

உள்துறை அமைச்சரோடு நெருங்கிய உறவு கொண்ட அர்விந்த் சுவாமி, தம்பிகளுக்கு பயந்து, குடும்பத்துடன் ஷேர் ஆட்டோவில் ஏறித் தப்பிப்பது, ‘விவேகானந்தர் தெரு, துபாய்’ கதையை அருண்விஜய் சொன்னதும் அத்தனை ரவுடிகளும் அவர்பக்கம் சாய்வது என்று நம் காதில் ஏக்கர் கணக்கில் பூந்தோட்டம்.

பின்னணி இசையில் டெம்போ ஏற்றியிருக்கிறார் ஏ.ஆர்.ரஹ்மான். சந்தோஷ் சிவனின் ஒளிப்பதிவு சர்வதேசத் தரம். ஸ்ரீகர் பிரசாத்தின் எடிட்டிங் கச்சிதம்.

ஓஸோன் ஓட்டையைவிட லாஜிக் ஓட்டைகள் அதிகம் என்றாலும் விறுவிறுப் பான திரைக்கதை, போட்டி போடும் நடிப்பால் கூடும் சுவாரஸ்யம் ஆகியவை, அண்ணாந்து வானத்தை ரசிக்கவைக்கிறது.

- விகடன் விமர்சனக் குழு