Published:Updated:

துப்பாக்கி முனை - சினிமா விமர்சனம்

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
துப்பாக்கி முனை - சினிமா விமர்சனம்
துப்பாக்கி முனை - சினிமா விமர்சனம்

துப்பாக்கி முனை - சினிமா விமர்சனம்

பிரீமியம் ஸ்டோரி

குற்றங்களுக்குத் தோட்டாக்கள்  தீர்வல்ல என்று போதிக்கிறது ‘துப்பாக்கி முனை.’

சட்டத்தைத் துளியும் மதிக்காமல் தன்பாட்டுக்குக் குற்றவாளிகளைச் சுட்டுத்தள்ளும் மும்பை போலீஸ் அதிகாரி விக்ரம்பிரபு. ஒரு பாலியல் வன்முறை வழக்கின் குற்றவாளியைப் போட்டுத்தள்ளும் அசைன்மென்ட் அவரிடம் வருகிறது. அதில் சம்பந்தப்பட்டவர் நிரபராதி எனத் தெரியவர,  நிஜக் குற்றவாளிகளைத் தேடிப் போகிறார். அந்தத் தேடல் அவர் அதுவரை வைத்திருந்த என்கவுன்ட்டர் நம்பிக்கைகளை எல்லாம் சிதறடிக்கிறது என்பதே துப்பாக்கிமுனை சொல்லும் கதை. 

துப்பாக்கி முனை - சினிமா விமர்சனம்

தன் முதல் படத்திலேயே என்கவுன்ட்டர்களால் குற்றங்களைக் குறைக்க முடியாது, வடநாட்டிலிருந்து பிழைக்க வருபவர்களுக்கு இங்கே நிலவும் பாதுகாப்பின்மை, பாலியல் குற்றங்களை நாம் அணுகும் முறை என சமூகத்துக்கு அவசியமான விஷயங்களைப் பேசியிருக்கும் இயக்குநர் தினேஷ் செல்வராஜை நிச்சயம் பாராட்டலாம். ஆனால், இத்தனை கருத்துகளையும் தாங்குகிற வலுவான திரைக்கதையை உருவாக்கத் தவறியிருக்கிறார். 

துப்பாக்கி முனை - சினிமா விமர்சனம்

சில தடுமாற்றங்களுக்குப் பிறகு தனக்குப் பொருத்தமான கதாபாத்திரம் ஒன்றில் லேண்ட் ஆகியிருக்கிறார் விக்ரம் பிரபு. என்கவுன்ட்டர் ஸ்பெஷலிஸ்ட்டாக ‘நச்’ பொருத்தம். நாயகியாக ஹன்சிகா, நடிக்க அதிக வாய்ப்புகளின்றி வந்துபோகிறார். 

துப்பாக்கி முனை - சினிமா விமர்சனம்

எம்.எஸ்.பாஸ்கர் மகளை இழந்த அப்பாவித்தந்தையின் பரிதவிப்பை நன்றாகவே வெளிப்படுத்தியிருக்கிறார். வேல.ராம மூர்த்தி அதே முரட்டு வில்லன் தோற்றத்தில் அவ்வப்போது மிரட்டுகிறார். மிர்ச்சி ஷாவுக்கு முதல் படம். போகவேண்டிய தூரம் நிறைய இருக்கிறது ஷா. படம் முழுக்க நடிகர்கள் பலரும் மிகைநடிப்பை இறைத்திருப்பதால் ஒருவித பிளாஸ்டிக்தன்மை வந்துவிடுகிறது.
 
விறுவிறுப்பைக் குறைக்கும் பாடல்காட்சிகள் இல்லாதது ப்ளஸ். ஆனால், வரிசையாக வரும் பிளாஷ்பேக்குகள் அந்த வேலையைச் செய்துவிடுகின்றன. மிக எளிதாக யூகித்து விடக்கூடிய கதையின் போக்கு படத்தின் பெரிய மைனஸ்.

ராசாமதியின் ஒளிப்பதிவில் ராமேஸ்வரம் கொள்ளை அழகோடு மிளிர்கிறது. பின்னணி இசையில் திக்திக் தன்மையை ஓரளவுக்குத் தக்கவைத்திருக்கிறார் இசையமைப்பாளர் முத்து கணேஷ்.

நல்ல கருத்துகளை இன்னும் தெளிவான திரைக்கதையோடு சொல்லியிருந்தால் துப்பாக்கி முனை மிரட்டியிருக்கும்.

- விகடன் விமர்சனக் குழு 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு