Published:Updated:

இது இயற்கையோடு நிகழும் உரையாடல்!

ஒட்டுமொத்த விகடனுக்கும் ஒரே ஷார்ட்கட்

Use App
இது இயற்கையோடு நிகழும் உரையாடல்!
இது இயற்கையோடு நிகழும் உரையாடல்!

இது இயற்கையோடு நிகழும் உரையாடல்!

பிரீமியம் ஸ்டோரி

‘பேரன்பு’ ரிலீஸுக்கான வேலைகளில் பரபரப்பாக இருக்கிறது இயக்குநர் ராமின் அலுவலகம். ‘கொஞ்சம் பிளாக் டீ கிடைக்குமா?’ உதவியாளர்களிடம் கேட்டபடி வந்து அமர்கிறார் ராம். பக்கத்து அறையில் யுவன் ஷங்கர் ராஜா பின்னணி இசையின் தந்தியொலி மென்மையாக ஒலிக்கிறது.

இது இயற்கையோடு நிகழும் உரையாடல்!

பேரன்பின் முன்னோட்டங்களைப் பார்க்கும்போது, சராசரி வாழ்க்கையும்கூட வாய்க்கப் பெறாத ஒரு மகளுக்கும் தந்தைக்குமான கதையாகப் புரிந்துகொள்ள முடிகிறது. பேரன்பு எந்த வகையில் தமிழுக்குப் புதிது?

“இந்த வாழ்க்கையில் எவ்வளவு சிக்கல்கள், சங்கடங்கள் இருந்தாலும் அதைத் தாண்டியும் வாழ்வதற்கு, சந்தோஷப்படுவதற்கு நிறைய விஷயங்கள் இருக்கின்றன. முரண்களை, வருத்தங்களை, கோபங்களை, வன்மங்களைக் கடந்தும் சக மனிதர்களை நேசிக்க முடியும்போதுதான் நாம் பேரன்புடையவர்களாக மாறுகிறோம். உங்கள் வாழ்க்கை ஆசிர்வதிக்கப்பட்ட ஒரு வாழ்க்கையாகத்தான் இருக்கிறது. ஆனால், அது உங்களுக்கு இன்னும் புரியவில்லை. அதை உணர்ந்துகொள்ளுங்கள் என்று சொல்வதுதான் ‘பேரன்பு’. மிக எளிமையான ஒரு படம்.”

இது இயற்கையோடு நிகழும் உரையாடல்!

உச்ச நட்சத்திரங்களைத் தேடிப் போகாத இயக்குநர் நீங்கள். மம்மூட்டி ஏன் இந்தப் படத்துக்குத் தேவைப்பட்டார்?

“அவர் உச்ச நட்சத்திரம்தான். அதோடு மிகச் சிறந்த நடிகரும்கூட. நடிப்பிற்காக மூன்று முறை தேசிய விருதுகள் பெற்றவர். நாற்பது ஆண்டுக்கால பெரும் நடிப்பனுபவம் கொண்டவர். ‘தங்கமீன்கள்’ மாதிரியான படத்தை யார் வேண்டுமானாலும் நடிக்கலாம். ஆனால், இந்தப் படத்தில் உண்மையாகவே மிகச் சிறப்பாக நடிக்கத் தெரிந்த ஒருவர்தான் நடிக்க முடியும். நான் அவருடைய பெரும்பாலான படங்களைப் பார்த்திருக்கிறேன். அவரின் முகமும் உடல்மொழியும் இந்தக் கதையின் நாயகனுக்கு மிகப் பொருத்தமாக இருக்குமென்று தோன்றியது.”

உங்கள் எதிர்பார்ப்பை மம்மூட்டியும் சாதனாவும் எந்த அளவிற்கு சாத்தியப்படுத்தியிருக்கிறார்கள்?


“மம்மூட்டி சாரிடம் கேட்டால், ‘இந்தப் படத்தில் நான் நடிக்கவே இல்லை’ என்று சொல்வார். அப்படிச் சொல்லக்கூடியவராக அவர் இருப்பதுதான் இந்தப் படத்துக்குப் பெரிய பலம். ‘பேரன்பு’ மாதிரியான படங்களுக்கு வேறு மாதிரியான ஒரு நடிப்பு தேவைப்படும். அதாவது, அந்தப் பாத்திரம்போல் நடித்துவிடக் கூடாது. பாத்திரமாக இயல்பாக இருக்க வேண்டும். மிகச் சிறப்பாக நடிக்கத் தெரிந்தவர்களுக்குத்தான் ஒரு காட்சியில் எப்படி நடிக்காமலிருப்பது என்பது தெரியும். அது மம்மூட்டி சாருக்குத் தெரியும். பேரன்புகொண்ட அமுதவனாக வாழ்ந்திருக்கிறார் அவர்.

இது இயற்கையோடு நிகழும் உரையாடல்!

சாதனா, ‘தங்கமீன்களி’ல் செல்லம்மாவாக நடித்தவர். ஒரு நொடிக் காட்சிக்காக எவ்வளவு கஷ்டப்படவும் தயாராக இருப்பவர். சிறுமி உருவத்திலிருக்கும் ஒரு ராட்சசி. படத்தில் நடிக்கவைப்பது என்று முடிவுசெய்வதற்கு முன்பே எனக்கு சாதனா மேல் பெரிய நம்பிக்கை இருந்தது. அந்த நம்பிக்கையை இன்னும் பெருகச் செய்திருக்கிறார் சாதனா. என்னுடைய முந்தைய படங்களைவிட இந்தப் படத்தில் ‘டிராமா’ குறைவாக இருப்பதாக நீங்கள் உணர்ந்தால் அதற்குக் காரணம், இவர்கள் இரண்டு பேரின் நடிப்புதான்.”

ராம் - யுவன் ஒரு வெற்றிக்கூட்டணி. யுவனுடனான பயணம் எப்படி இருக்கிறது?  


“யுவன் இந்தப் படத்தின் இன்னொரு ஹீரோ. கிரேட் கம்போஸர். அதை பேரன்பின் பின்னணி இசையைக் கேட்கும்போது நீங்களும் உணர்வீர்கள். மனிதர்களின் மனங்களுக்குள்ளும் திரைக்கதையின் நுட்பங்களுக்குள்ளும் நுழைந்து பயணிக்கின்ற கலைநுட்பம் அறிந்தவர். யுவனின் பின்னணி இசை அவ்வளவு அழகாக, உணர்வுபூர்வமாக வருவதன் காரணம் அதுதான். சினிமாவில் மட்டுமல்ல, வாழ்க்கையிலும் யுவன் எனக்கு மிகப்பெரிய பலம்.”

இது இயற்கையோடு நிகழும் உரையாடல்!

ஒரு காட்சியை இதமானதாக, ஆழமானதாக, உக்கிரமானதாக மாற்றுவதில் காட்சி நிகழும் ‘இயற்கை வெளி’க்கு ஒரு முக்கியப் பங்கு உண்டு. பேரன்பில் உங்கள் காட்சிகளுக்குச் செறிவூட்டிய இயற்கையைப் பற்றி சொல்லுங்கள்...

“இந்தப் படத்தில் மட்டுமல்ல. எல்லாப் படங்களிலும் இயற்கை ஓர் ஆதாரமான பாத்திரம்தான். நமது வாழ்க்கையைத் தீர்மானிக்கிற ஒன்றாகவும்தானே இயற்கை இருக்கிறது! மனிதர்களாகப் பிறந்தவர்கள் மனிதர்களாக மட்டும்தான் வாழமுடியுமே தவிர, ஒரு பூச்செடியாக வாழ முடியாது. இயற்கையின் விதி அது. அப்படி இயற்கையின் ஒரு சிக்கலான விதிக்குட்பட்ட சிறுமியும் அச்சிறுமியின் தந்தையும் இயற்கையோடு கொள்ளும் உரையாடல்தான் ‘பேரன்பு’. மனிதர்கள் இல்லாத இடமாக, குருவிகள் சாகாத இடமாக வேண்டுமெனக் கேட்கும் ஒருவன் அதைத் தேடிப் போகிற பயணத்தில் இயற்கைதான் வழியாகவும் இருக்கிறது; சக பயணியாகவும் இருக்கிறது. இயற்கை, பேரன்பின் அர்த்தத்தை மேலும் விரித்திருக்கிறது.”

தேனி ஈஸ்வருடன் இரண்டாவது முறை இணைந்திருக்கிறீர்கள்...

“தேனி ஈஸ்வர், சினிமாவுக்கு வருவதற்கு முன்பாகவே என் நீண்ட கால நண்பர்; ஒரு மிகச்சிறந்த போட்டோகிராபர். இயற்கையான வெளிச்சத்தை மட்டுமே கொண்டு காட்சிகளை ஓவியமாக்கும் தேர்ந்த வல்லுநர். ‘நான் ஒரு பெரிய கேமராமேன். எப்படி எடுக்குறேன் பாருங்க’ என்று எதுவும் செய்யமாட்டார். கதைக்கு என்ன தேவையோ அதை மட்டும் பதிவுசெய்பவர். இயற்கையைப் பதிவுசெய்வது அவருக்கு இனிப்பு சாப்பிடுவது மாதிரி. பேரன்பில் நீங்கள் அதை உணரலாம்.”

இது இயற்கையோடு நிகழும் உரையாடல்!

உங்களின் நான்கு படங்களின் பிரதான பாத்திரங்களான பிரபாகர், செல்லம்மா, பிரபு, பாப்பா நால்வருமே பொதுச்சமூகத்தின் ஓட்டத்தில் பங்குபெற இயலாதவர்கள் அல்லது மறுப்பவர்கள். இந்தப் பாத்திரங்களுக்கான கதைக்களத்தை நீங்கள் திட்டமிட்டுதான் உருவாக்குகிறீர்களா?

“பொதுச்சமூகம் ஏற்றுக்கொள்ளாத, பொதுச்சமூகம் புறக்கணித்த, பொதுச்சமூகத்தால் புரிந்துகொள்ள முடியாத ஏராளமான மனிதர்கள் இந்தப் பூமியில் இருக்கிறார்கள். நம்மிடம் சொல்வதற்கான நிறைய விஷயங்கள் அவர்களிடம் இருக்கின்றன.அந்த விஷயங்கள் சொல்லப்படுவதுதான் மிக முக்கியமான விஷயம் என்று நினைக்கிறேன். பிறகு, ஒரு கலைஞனின் வேலைதான் என்ன?”

“மீண்டும் உங்கள் படத்தில் அஞ்சலி. பேரன்பில் அவரின் பங்களிப்பு குறித்துச் சொல்லுங்கள்...”

“அஞ்சலியின் களங்கமற்ற குரல் தமிழ் சினிமாவில் ஒரு தனித்த அடையாளம். ‘எங்கேயும் எப்போதும்’, ‘கலகலப்பு’ படங்கள்ல ஹ்யூமர் சார்ந்த நடிப்பை வெளிப்படுத்தி யிருப்பாங்க. ஒரு ஹீரோயின் ஹ்யூமர்ல ஜெயிப்பது பெரிய விஷயம். ‘கற்றது தமிழ்’, ‘தரமணி’, ‘பேரன்பு’ என என்னுடைய மூன்று படங்களிலும் நடித்திருக்கிறார். ஒப்பீட்டளவில் பேரன்பில் அஞ்சலியின் நடிப்பு எனக்கு மிகவும் பிடித்தது. ஏனென்றால், அதுவொரு சவாலான கேரக்டர். மம்மூட்டி சாருக்கு படத்தில் என்ன சவாலோ அதே சவால் அஞ்சலிக்கும் இந்தப் படத்தில் இருந்தது. அதைச் சிறப்பாக எதிர்கொண்டிருக்கிறார்.”

இது இயற்கையோடு நிகழும் உரையாடல்!

‘பேரன்பு’ பல்வேறு நாடுகளில், திரைப்பட விழாக்களில் திரையிடப்பட்டிருக்கிறது. என்ன மாதிரியான வரவேற்பு, எதிர்வினைகள் இருந்தன?

“எங்கள் எதிர்பார்ப்பிற்கும் மேலாகவே வரவேற்பு கிடைத்திருக்கிறது. தமிழகத்தில் கிடைக்கும் வரவேற்புக்கு இணையான வரவேற்பு சீனாவில் கிடைத்தது. படம் பார்த்தவர்களின் கைகுலுக்கலும் அணைப்பும் கண்ணீரும் பெரிய நம்பிக்கையை அளித்திருக்கிறது. மொழி கடந்து, இனம்  கடந்து,  கலாசாரம் கடந்து எல்லோராலும் மனித ஆதார உணர்வுகளைப் புரிந்துகொள்ள முடிகிறது; கொண்டாட முடிகிறது. அயல்மொழிகளில் ‘பேரன்பு’ குறித்து பல முக்கியமான கட்டுரைகள் எழுதப்பட்டிருக்கிறன. எங்கோ வாழ்கிற மனிதர்களே இவ்வளவு உணர்வுபூர்வமாக படத்தோடு ஒன்ற முடிகிறது என்றால், தமிழில் ‘பேரன்பு’ பல மடங்கு ஆழமாக உணரப்படும் என்ற நம்பிக்கையும் எதிர்பார்ப்புமாகக் காத்திருக்கிறோம். இயற்கை பேரன்பானது!”

வெய்யில், மா.பாண்டியராஜன்   

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு