மிஸ்டர் மியாவ்

தமிழ்த் திரையுலகில் நாயகியாக ஜொலித்துவரும் ‘மில்க் பியூட்டி’ தமன்னா, ஒரு வைர வியாபாரியின் மகள். மும்பைவாசி. மும்பைக்கும் சென்னைக்கு பறந்துகொண்டிருக்கும் தமன்னா பற்றிய சுவாரஸ்யத் தகவல்கள் இதோ...

. ‘கண்ணே கலைமானே’ படம் வரையிலும் ரூ.1 கோடியே 40 லட்சம் சம்பளம் வாங்கிக்கொண்டிருந்தார், தமன்னா. ‘தேவி-2’ படத்திலிருந்து சம்பளத்தை ரூ.2 கோடியாக மாற்றியிருக்கிறாராம்.

. ‘கேடி’ படம் மூலம் தமிழில் அறிமுகமான தமன்னா, த்ரிஷா ஹீரோயினாக நடித்த ‘எனக்கு 20 உனக்கு 18’ படத்தில் ஒரு சிறிய ரோலில் நடித்திருக்கிறார். அதில் இவருக்குச் சம்பளம் எதுவும் கொடுக்கப்படவில்லை.

. ‘ராஜ்மஹால்’ ஜவுளி விளம்பரத்தில் முதன்முதலில் நடித்தபோது, தமன்னாவுக்கு 14 வயது. அதில் இவருக்கு ஜோடியாக சாயா சிங்கின் கணவர் கிருஷ்ணா நடித்திருந்தார்.

. அனுஷ்கா, சமந்தா, காஜல் அகர்வால் ஆகிய மூவரிடமும் நெருங்கிப் பழகுகிறார், தமன்னா. இவர் சினிமாவுக்கு வந்தபோது, தனியாக காஸ்ட்யூம் டிசைனர் வைத்துக்கொள்ள வேண்டும் என்பதே இவருக்குத் தெரியாதாம். அதை அவருக்குச் சொல்லிக்கொடுத்தவர், அனுஷ்கா.

. தமிழ், ஆங்கிலம், இந்தி, தெலுங்கு, மலையாளம், சிந்தி, உருது, மராத்தி ஆகிய மொழிகள் பரிச்சயமாக இருப்பது, தமன்னாவின் ப்ளஸ்.

. ‘சாந்த் சா ரோஷன் சேரா’ என்ற இந்தி படம் மூலம் தமன்னா அறிமுகமாகியிருந்தாலும், தமிழ் படங்களில் நடிக்கவே அவர் விரும்பினார். 2013-ல், அஜய் தேவ்கனுடன் நடித்து வெளியான ‘ஹிம்மத்வாலா’ திரைப்படம், 1983-ல் அதே டைட்டிலில் வெளிவந்த படத்தின் ரீமேக். அதில் ஸ்ரீதேவி நடித்த ரோலில் இவரை நடிக்கும்படிக் கேட்டதால், தனது சம்பளத்தில் மூன்றில் ஒரு பங்கை மட்டும் பெற்றுக்கொண்டு நடித்துக்கொடுத்தாராம் தமன்னா.

. கமர்ஷியல் படங்களில் அதிகம் நடித்துவிட்ட தமன்னாவுக்கு, கதை சார்ந்த படங்களில்தான் தற்போது அதிக நாட்டம் இருக்கிறதாம். ராதாமோகன், சசிகுமார், கெளதம் மேனன் ஆகிய இயக்குநர்களின் படங்களில் நடிக்க தமன்னா விருப்பப்படுகிறாராம்.

. யோகா, நடனம் இரண்டிலும் அதிக நாட்டம் கொண்டவர், தமன்னா. தினமும் காலையில் யோகா செய்வதும், மாலையில் நடனம் ஆடுவதும்தான் இவரது அழகின் ரகசியம்.

. போயஸ் கார்டன் பக்கமாகச் சென்ற ‘வெற்றி’ நாயகனுக்கு, அங்குள்ள ஒரு வீட்டைப் பார்த்ததும் பிடித்துப்போய்விட்டது. அது ஒரு தயாரிப்பாளரின் வீடாம். உடனே, அந்தத் தயாரிப்பாளரைத் தொடர்புகொண்ட நாயகன், மூன்று படங்கள் நடித்துக்கொடுப்பதாகவும், அவற்றுக்குச் சம்பளத்துக்குப் பதிலாக அந்த வீட்டைத் தருமாறும் கேட்டிருக்கிறார்.

. பசுமைத் தயாரிப்பிடம் கதை சொல்ல வருபவர்கள், அந்த மொத்தக் குடும்பத்தினருக்கும் கதை சொல்ல வேண்டுமாம். அப்படியொரு நிபந்தனை இதுவரை சகோதரர்களின் படங்களுக்கு மட்டுமே இருந்தது. இதனால், பசுமையிடம் கதை சொல்வதற்குப் போகவே இயக்குநர்கள் யோசிக்கிறார்கள்.

. வெற்றி நடிகருடன் ஜோடி சேர்ந்த நாயகியை, வம்பு நடிகரின் அடுத்த படத்தில் கமிட் செய்யலாம் என்றது, இயக்குநர் தரப்பு. வம்பு நடிகரோ, மூன்றெழுத்து மூத்த நாயகிக்கு மவுசு அதிகரித்திருப்பதால், அவரையே கமிட் செய்ய விரும்புகிறாராம்.

. அரசியல் நாயகனின் அடுத்தப் படம் தாமதமாவது, பிரமாண்ட இயக்குநருக்குக் கவலையை அதிகரித்துள்ளது. வேறு நாயகனை நாடலாமா என்று படக்குழு யோசித்துவருகிறதாம்.

. சொந்தத் தயாரிப்பில் லாபம் வருவதில்லை என்று கவலையில் இருக்கும் ஒல்லி நாயகன், இனி சொந்தப் படங்களைத் தயாரிக்கப்போ வதில்லை என்ற முடிவுக்கு வந்துவிட்டாராம்.