Published:Updated:

அயோக்யா - சினிமா விமர்சனம்

விகடன் விமர்சனக்குழு

அயோக்யா - சினிமா விமர்சனம்

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி

யோக்கியர்களை அழிக்க வேண்டிய போலீஸே அயோக்கியனாக இருந்தால்... ஒருநாள் அந்த அயோக்கிய போலீஸ் திருந்தினால்....

கலெக்‌ஷன், கரப்ஷன் என வாழும் இன்ஸ்பெக்டர் விஷால். பார்த்திபனின் ‘அண்டர் கிரவுண்டு’ வேலைகளுக்கு ‘அண்டர்ஸ்டாண்டி ங்’காக இருந்து ‘வசதியாய்’ வாழ்கிறார். நிறைய பணமும் கொஞ்சம் சரக்குமாய் `மாமூலாய்’ போய்க்கொண்டிருக்கும் விஷாலின் வாழ்க்கையில் பூஜா தேவரயா மூலம் திருப்பம் ஏற்படுகிறது. பார்த்திபனோடு முட்டல் மோதல் ஆரம்பமாகிறது. விஷாலுக்கும் பூஜாதேவரயாவுக்கும் என்ன சம்பந்தம், அவரைக் காப்பாற்றினாரா, நல்ல போலீஸாக விஷால் மாறினாரா இல்லையா... என்பதுதான் அயோக்யாவின் க்ளைமாக்ஸ்.

அயோக்யா - சினிமா விமர்சனம்

விஷாலுக்கு அவர் உயரத்துக்கேற்ற தெனாவெட்டு போலீஸ் ரோல். தெலுங்கில் ஜூனியர் என்.டி.ஆர் செய்ததை காஷ்ட்யூம் முதற்கொண்டு டிட்டோ அடித்திருக்கிறார். வில்லத்தனம் காட்டும் கெட்ட போலீஸ் ரோல் என்பதால் திமிர்த்தனம் வித்தியாசமாய் ஈர்க்கிறது.

தமிழ்சினிமா வரலாற்றில் லட்சத்து ஒன்றாவது முறையாக அனிமல் லவ்வர் ஹீரோயினாக ராஷி கன்னா. ‘உங்களுக்கு என் கை சல்யூட் அடிக்காது சார்’ என நேர்மையான ஹெட் கான்ஸ்டபிள் பாத்திரத்தில் கே.எஸ்.ரவிக்குமார் கவனிக்க வைக்கிறார். வில்லனாக பார்த்திபன். அவரின் வழக்கமான நக்கல் ஏனோ மிஸ்ஸிங். கொஞ்ச நேரமே வந்தாலும் யோகிபாபு அட்ராசிட்டி பண்ணுகிறார்.

அயோக்யா - சினிமா விமர்சனம்

கெட்ட போலீஸ் கடைசியில் திருந்தி, தீயவர்களை அழிக்கும் நல்ல போலீஸாக மாறும் கதையை ஏற்கெனவே பலமுறை பார்த்ததால் காட்சிகள் சலிப்பூட்டுகின்றன. ட்விஸ்டுகள் எல்லாமே தெரிந்தும்விடுகின்றன. இத்தனையையும் தாண்டி, கடைசிப் பத்து நிமிடங்களில் கனமான விஷயம் பேசி கவனிக்க வைக்கிறார் டைரக்டர் வெங்கட் மோகன்.

சாம் சி.எஸ்ஸின் இசையில் பாடல்களும் பின்னணியும் இன்னும் மெனக்கெட்டிருக்கலாம் ரகம். வி.ஐ.கார்த்திக்கின் கேமராவும் ஸ்ரீகர் பிரசாத்தின் எடிட்டிங்கும் ஆக்‌ஷன் காட்சிகளில் எக்ஸ்ட்ராவாய் உழைத்திருக்கின்றன.

க்ளைமாக்ஸில் என்னதான் கருத்து சொல்லியிருந்தாலும், சாட்சிகள், விசாரணை என எதைப்பற்றியும் கவலையில்லாமல் நீதிபதிகளைப் பேசியே கவிழ்த்து மரணதண்டனைத் தீர்ப்பு வாங்கி அதை 24 மணிநேரத்தில் நிறைவேற்றுவதெல்லாம் உலக லாஜிக்கில் பிளாக் ஹோலைவிடப் பெரிய ஹோல்.

படம் சொல்லும் கருத்து ஓகே... கருத்து மட்டும்தான் ஓகே!

- விகடன் விமர்சனக் குழு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு