ரோலிங் சார்

`ராக்கெட்டரி : தி நம்பி எஃபெக்ட்’ படத்தில் நடிப்பதற்காக இரண்டு ஆண்டுகளாக வளர்த்துவந்த தாடியை எடுத்து க்ளீன் ஷேவ் கெட்டப்புக்கு மாறியிருக்கிறார் மாதவன். இளம் நம்பிநாராயணனாக நடிக்க இந்தப் புது கெட்டப்!

. ராணா டகுபதி 50 வயது முதியவராக நடிக்கும் படத்தை இயக்கிக் கொண்டிருக்கிறார் பிரபுசாலமன். ‘காடன்’ எனப் பெயரிடப்பட்டுள்ள இப்படம் இந்தி. தமிழ், தெலுங்கு என மும்மொழிகளில் தயாராகிறது. விஷ்ணு விஷாலும் முக்கிய வேடத்தில் நடிக்கிறார்.

. தமிழில் வெற்றிபெற்ற `காஞ்சனா’வை இந்தியில் இயக்கிக்கொண்டிருந்தார் ராகவா லாரன்ஸ். ‘LAXMMI BOMB’ எனப் பெயரிடப்பட்டிருந்த இப்படத்திலிருந்து தயாரிப்பாளருடனான மோதலால் விலகியுள்ளார் லாரன்ஸ்.

. விஜய் இப்போது அட்லி இயக்கும் ஃபுட்பால் படத்தை முடித்துவிட்டு அடுத்து `மாநகரம்’ லோகேஷ் இயக்கத்தில் கேங்ஸ்டர் படத்தில் நடிக்கவிருக்கிறார்.

. தமிழில் முக்கிய நாயகர்களுக்கு வில்லியாக நடித்த வரலட்சுமி, முதல்முறையாகத் தெலுங்கில் பாலகிருஷ்ணாவின் ‘ரூலர்’ படத்தில் வில்லியாகிறார்.

. பேய்வேகத்தில் நடக்கிறது ரஜினி நடிக்கும் `தர்பார்’ ஷூட்டிங். மும்பையில் முதல் ஷெட்யூலை முடித்துவிட்டு, சென்னையில் அடுத்த ஷெட்யூலுக்குத் தயாராகிவிட்டார்கள்.

. விக்னேஷ் சிவன், பாண்டிராஜ், மித்ரன் என மூன்று இயக்குநர்களோடு அடுத்தடுத்து நடிக்கவிருக்கிறார் சிவகார்த்திகேயன். ஒவ்வொன்றும் ஒவ்வொரு ஜானராம்!

. ‘பாக்ஸர்’ படத்திற்காக அருண்விஜய் மிக்ஸ்ட் மார்ஷியல் ஆர்ட்ஸ் கற்றுக்கொள்கிறார். இதற்காக வியட்நாமில் இருக்கும் லியன்பாங்கில் தீவிர பயிற்சி மேற்கொண்டுள்ளார்.

. தயாரிப்பாளரோடு லடாய் என `உயர்ந்த மனிதன்’ படத்திலிருந்து அமிதாப் விலகிக்கொண்டதாக தகவல்கள் வெளியாக, ``பேச்சுவார்த்தை நடக்கிறது, அமிதாப் நடிக்கிறார்’’ என்கிறது தயாரிப்பாளர் தரப்பு.

. விக்ரம் பிரபு அடுத்து நடிக்கும் ‘அசுரகுரு’ படத்தில் முக்கியமான வேடத்தில் நடிக்கிறார் மஹிமா நம்பியார். இந்தப் படத்திற்காக மூன்று மாதங்கள் விற்பயிற்சியெல்லாம் எடுத்திருக்கிறார்!

ரோலிங் சார்

Vikatan Correspondent