Vikatan.com

www.vikatan.com would like to send you push notifications.

Notifications can be turned off anytime from browser settings.

ஆனந்த விகடன் விருதுகள்

விகடன் விருதுகள்

சிறந்த கலை இயக்கம் 

சாபு சிரில் - `பாகுபலி’

விகடன் விருதுகள்

வரலாற்றுப் படங்கள், கலை இயக்குநர்களுக்கான ஃப்ரீ ஹிட். வாய்ப்புகள் அதிகம்; அதேசமயம் ஸ்கோர் செய்தாகவேண்டிய நெருக்கடி. `பாகுபலி'யில் சாபு சிரில் அடித்ததோ ஸ்டேடியம் தாண்டிய சிக்ஸர். கையில் தாங்கும் வாளில் இருந்து அரண்மனையின் ஒரு மூலையில் இருக்கும் மேஜை வரை பார்த்துப் பார்த்து இழைத்ததில் இருந்த நேர்த்தி உலகத் தரம். பாதி உண்மை, பாதி கிராஃபிக்ஸ் என பல இடங்களில் பொருட்கள் இருப்பதாக நினைத்தே உருவாக்கவேண்டிய நிர்பந்தம். எந்தக் குறையும் இல்லாமல் உழைத்து முடித்த சாபு சிரிலின் கைகளுக்கு ராஜ வளையமே அணிவிக்கலாம்!

சிறந்த ஒப்பனை

நல்லா ஸ்ரீனு, சேனாபதி நாயுடு 

`பாகுபலி’

விகடன் விருதுகள்

`பாகுபலி’யில் ஒவ்வொரு மனுஷனுக்கும் ஒவ்வொரு மேக்கப். படத்தில் இருக்கும் எல்லோருமே வழக்கத்துக்கு மாறான தோற்றம். ஒவ்வொரு பாத்திரத்துக்கும் எக்ஸ்ட்ரா டீட்டெய்லிங் என `பாகுபலி’ எதிர்கொண்ட சவால் மிக மிகப் பெரியது. அதை சாதனையாக்கியது நல்லா ஸ்ரீனு, சேனாபதி நாயுடு கூட்டணி. கட்டப்பா முதல் காளகேயர்கள் வரை, வயதான அனுஷ்கா முதல் ராணி ரம்யாகிருஷ்ணன் வரை அனைவரின் ஒப்பனையும் கச்சித நேர்த்தி. ஒவ்வொரு பாத்திரமும் நெற்றிப்பொட்டில் தொடங்கி புருவநரை வரை அத்தனை துல்லியமான மேக்கப் கொடுத்தது ஹிஸ்டாரிக்கல் டச். மகிழ்மதியின் மனிதர்களை எல்லாம் அச்சு அசலாக மாற்றியதில் ஒப்பனைக் காரர்களின் உழைப்பு ஒப்பற்றது!

சிறந்த நடன இயக்கம் 

பாபா பாஸ்கர் - தர லோக்கல் `மாரி’

விகடன் விருதுகள்

அரை விநாடிகூட ஓயாத ராக் ஸ்டார் அனிருத்தின் தரலோக்கல் இசைவெடிக்கு நடனம் வடிவமைப்பது நாட் ஈஸி. தனுஷ் மாதிரி ஒரு தாறுமாறு ஆட்டக்காரனை ஆட்டுவிப்பதற்கு ஸ்பெஷல் கவனம் தேவை. பாபா பாஸ்கர் இசையையும் தனுஷையும் ஸிங்க் செய்துபோட்ட தெறி டான்ஸுக்கு தமிழ்நாடே ஆடியது. ஒரே ஷாட்டில் வீட்டுக்குள் இருந்து கிளம்பி ரோட்டுக்கு வந்து கார்களின் டாப்பில் ஏறி எகிறி, ஜீப்பில் குதித்து, ஆட்டோவில் மிதந்து ஆடி கெட்ட ஆட்டம் போட்டார் தனுஷ். `மாரி' பட டீஸரிலேயே பாபா பாஸ்கர் அமைத்த 37 செகண்ட் நான்-ஸ்டாப் குத்து... கொண்டாட்டத்தின் கொலைவெறி!

சிறந்த சண்டைப் பயிற்சி 

மிராக்கிள் மைக்கேல், லார்னெல் ஸ்டோவெல் ஜூனியர் 

`பூலோகம்’

விகடன் விருதுகள்

தமிழில் முதன்முதலாக ஒரு புரொஃபஷனல் பாக்ஸிங் படம். இதில் மிராக்கிள் மைக்கேல், லார்னெஸ் ஸ்டோவெல் ஜூனியர் ஆகிய இருவரும் உருவாக்கியது வழக்கமான சண்டைகள் அல்ல... உண்மையான குத்துச்சண்டைப் போட்டிகள். ஏழு அடி அரக்கன் ‘நேதன் ஜோன்ஸை’ ஆறு அடி ஜெயம் ரவி இடுப்பில் குத்தியே வீழ்த்துவது, வெறிகொண்ட பன்ச்சில் மாட்டாமல் எஸ்கேப் ஆவது என ரிங்குக்குள் நடக்கும் சர்க்கஸ், சுவாரஸ்யம். பாக்ஸிங்கில் இருக்கிற சொற்பமான முரட்டுக் குத்துகளுக்கு நடுவில் புத்திசாலித் தனத்தையும் சேர்த்து ஸ்கோர் செய்த இருவருக்கும் ஒரு நாக்அவுட் பூங்கொத்து!

சிறந்த ஆடை வடிவமைப்பு

ரமா ராஜமௌலி, பிரசாந்தி திப்ரினேனி  `பாகுபலி’

விகடன் விருதுகள்

சரித்திரக் கதைக்கு உடை வடிமைக்கும் சவால் பணியில் சபாஷ் வாங்கியது, ரமா ராஜமௌலி, பிரசாந்தி திப்ரினேனி அடங்கிய `பாகுபலி’ இருவர் அணி. தெலுங்கு, தமிழ், இந்தி என பல மொழிகளில் பயணிக்கும் கதைக்கு, ஆடை வடிவமைப்பில் இவர்கள் கையாண்டது புதுமை டெக்னிக். குட்டீஸுக்கு மிகப் பிடித்த அமர்சித்ரகதா காமிக்ஸில் வரும் உடை அலங்காரம்தான் இவர்களின் ரெஃபரென்ஸ். அதனால்தான் வல்லாள தேவனும் பாகுபலியும் பார்க்க அர்ஜுனனையும் துரியோதனனையும் நினைவூட்டினார்கள். எத்தனை ஆயிரம் பேருக்கு எத்தனை விதமான ஆடைகள், அணிகலன்கள்?! உறுதியான விசுவாசம் நிரம்பிய அடிமையான கட்டப்பாவுக்கான உடை முதல், நாடோடி அரக்கர் குல காகதீயர்களுக்கான கரிய ஆடைகள் வரை ஒவ்வொன்றும் ஓஹோ ரகம். பிரமாண்ட ஆராய்ச்சியும் உழைப்பும் நிரம்பிய இந்த டிசைன்கள், `பாகுபலி’ வெற்றியின் அசத்தல் அணிகலன்கள்!

 

 

உங்கள் கருத்தைப் பதிவு செய்யுங்கள்

Advertisement
Advertisement
Advertisement

MUST READ

Advertisement

எடிட்டர் சாய்ஸ்