சினிமா
Published:Updated:

“சிலுக்கு கண்களுடன் ஹீரோயின் தேவை!”

சித்ரா லட்சுமணன்
பிரீமியம் ஸ்டோரி
News
சித்ரா லட்சுமணன்

சினிமா பி.ஆர்.ஓ., இயக்குநர், தயாரிப்பாளர், நடிகர் எனப் பலமுகங்கள் கொண்ட சித்ரா லட்சுமணன், தன் சினிமாவுக்கு முந்தைய நாள்களையும் அப்படியே நினைவில் வைத்திருக்கிறார்.

``தம்பி விஜய் ஒரு வசனம் பேசியிருப்பாரே, ‘வாழ்க்கை ஒரு வட்டம்’னு... என் விஷயத்துல அது சரியா பொருந்தியிருக்கு. ஆரணி பக்கமிருந்து லட்சுமணனா வந்து இறங்கினப்ப சென்னையில எனக்கு அடைக்கலம் தந்தது ஒரு பத்திரிகை ஆபீஸ். `விடிவெள்ளி’ங்கிற அந்தப் பத்திரிகையில உதவி ஆசிரியரும் நானே, ஆபீஸ் பையனும் நானே. இதோ இன்னைக்குத் திரும்பவும் பேட்டி எடுக்க வந்துட்டேனே! என்ன அப்ப பேப்பரும் பேனாவும். இன்னைக்கு யூ ட்யூப் சேனலுக்காக சட்டையில மைக்கை மாட்டிட்டு உட்கார்ந்திருக்கேன், அவ்ளோதான்’’

-90ஸ் கிட்ஸுக்கு நயன்தாராவின் அப்பாவாக மட்டுமே தெரிகிற, சினிமா பி.ஆர்.ஓ., இயக்குநர், தயாரிப்பாளர், நடிகர் எனப் பலமுகங்கள் கொண்ட சித்ரா லட்சுமணன், தன் சினிமாவுக்கு முந்தைய நாள்களையும் அப்படியே நினைவில் வைத்திருக்கிறார்.

‘எப்படி தம்பி மறக்கும்? அந்தப் பத்திரிகையை நடத்தியவர் எங்க ஊர்க்கார நண்பர். என்னை சென்னைக்குக் கூட்டி வந்ததும் அவர்தான். அடிப்படையில அவர் ஒரு விவசாயி. அதனால விவசாயம் சார்ந்த கட்டுரைகளுக்கு முக்கியத்துவம் தர விரும்பினார். அரசியல் கட்டுரைகள் அதிகமா இருந்தா மட்டுமே பத்திரிகை பரபரப்பா போகும்கிறது என் கருத்து. அவர் ஊருக்குப் போயிருந்த ஒரு வாரம், விவசாயம் தொடர்பான கட்டுரைகளைத் தூக்கிட்டு என் போக்குல அச்சுக்கு அனுப்பிட்டேன். வந்தவருக்கு ஆத்திரம்னா ஆத்திரம். மறுவாரம் பழையபடி அவர் விரும்பிய கட்டுரைகளே வந்தன. ஒருவழியா பத்திரிகை மூடுவிழா கண்டது. தொடர்ந்து இன்னொரு சினிமாப் பத்திரிகையில ரெண்டு மூணு வருஷம் இருந்துட்டு, அப்படியே சினிமா பி.ஆர்.ஓ ஆனேன். ‘சிநேகிதி’ங்கிற படத்துல முதன்முதலா பேரு டைட்டில் கார்டுல வந்தது. அந்தப்படம் வெளியாகி சரியா 50 வருஷமாகுது.

பிறகு சித்ரா லட்சுமணன் ஆனது, படம் இயக்கியது, தயாரிச்சது, நடிச்சதுன்னு எல்லாம் ஊரறிஞ்ச விஷயம். ஆனா ஒண்ணு நிஜம். ‘பாஸ் என்கிற பாஸ்கரன்’ல மட்டும் நடிக்கலைன்னா, இந்தத் தலைமுறைக்கு நான் தியாகராஜ பாகவதராகவோ, பி.யு.சின்னப்பாவாகவோதான் தெரிவேன்’’ என்றவரிடம்...

சித்ரா லட்சுமணன்
சித்ரா லட்சுமணன்

`` `டூரிங் டாக்கிஸ்’ சேனலுக்கு எடுத்த நேர்காணல்களில் மறக்க முடியாததுன்னு எதுவும் இருக்கா?’’

“யூடியூப் சேனல்ங்கிறது என்னுடைய தனிப்பட்ட சந்தோஷத்துக்காக ஆரம்பிச்ச ஒரு விஷயம். ஏவி.எம். சரவணன்ல இருந்து ராஜேஷ் வரைக்கும் சினிமாவின் முக்கியமான பலரையும் பேட்டி எடுத்திருக்கேன். அதுல இயக்குநர் ஆர்.கே.செல்வமணி பேட்டி ரொம்பவே ஸ்பெஷல். ஏன்னா, பொதுவா பேட்டியில எல்லாரும் தாங்கள் சந்திச்ச போராட்டங்களை விவரிச்சா, அதுல மத்தவங்க தந்த தொல்லைகளைப் பேசுவாங்க. தங்கள் பக்கத் தப்பை வெளிப்படையாப் பேசறதில்லை. ஆனா செல்வமணி முதல் படம் வெளியாகறதுக்கு முன்னாடி பட்ட கஷ்டங்களைச் சொன்னப்ப, தான் என்ன மாதிரியான தவறுகளைச் செஞ்சேன்னும் ஒளிவுமறைவில்லாமப் பேசினார். அந்தப் பேட்டிக்கு அமோகமா வரவேற்பும் கிடைச்சது.”

சித்ரா லட்சுமணன்
சித்ரா லட்சுமணன்

``நகைச்சுவை நடிகராகத் தொடர்ந்து உங்களைத் தமிழ் சினிமாவில் பார்க்கலாமில்லையா?’’

“நடிக்க வேண்டியதுதான். ‘பாஸ் என்கிற பாஸ்கரன்’ வந்தப்ப சிலர், `ஏன் சார் டைரக்டர், புரொடியூசர்னு இருந்துட்டு, சந்தானம் உங்களைக் கலாய்க்கிற சீன்லெல்லாம் நடிக்கணுமா’ன்னு கேட்டாங்க. ‘நீங்க அந்த இடத்துல என்னை நயன்தாரா அப்பாவாகவும் சந்தானத்தை ஆர்யா நண்பனா மட்டும்தான் பார்க்கணும்’னு சொன்னேன். நடிப்புன்னு வந்துட்டா கேரக்டர் பிடிச்சிருந்தா நடிக்க வேண்டியதுதான். ஆனா நடிக்க வர்றேனோ இல்லையோ, நீண்ட இடைவெளிக்குப் பிறகு மறுபடியும் தயாரிப்பாளராகறதுன்னு இறங்கிட்டேன். அதுவும் சில்க் ஸ்மிதா கதை. நானும் ‘அவ்வை சண்முகி’யைத் தயாரிச்ச ஹெச்.முரளியும் சேர்ந்து எடுக்கலாம்னு இருக்கோம். ‘கண்ணா லட்டு தின்ன ஆசையா’ படத்தை இயக்கிய மணிகண்டன் இயக்குறார். படத்தின் பெயர் `அவள் அப்படித்தான்.’

சில்க் ஸ்மிதாவுக்குக் கண்கள்தான் ஸ்பெஷல். அதனால அதே மாதிரிக் கண்களுடைய ஒரு ஹீரோயினைத் தேடிட்டிருக்கோம். கிடைச்சதும் ஷூட்டிங் தொடங்க வேண்டியதுதான்.’’