Published:Updated:

தீனா! #VikatanReview

தீனா! #VikatanReview
பிரீமியம் ஸ்டோரி
News
தீனா! #VikatanReview

அஜித்திற்கு 'தல'னு பேரு வாங்கி கொடுத்த படமாச்சே இது..!

'நாயகன்', 'தளபதி' படங்களின் வரிசையில் 'தீனா'!

சுரேஷ் கோபியின் உடன்பிறவா சகோதரன் அஜீத். கோபி ஆர்டர் போட்டால் பார்ட்டிகளைத் தேடிப்பிடித்து  'விஷ்க்' என்று சீவிவிடுவது அஜீத்தின் வேலை. உப வேலையாக லைலாவைக் காதலிக்கிறார். அதே சமயத்தில் சுரேஷ்கோபியின் தங்கை  திவ்யாஶ்ரீயை லைலாவின் அண்ணன் ஷ்யாம் காதலிக்க, அஜீத் அதற்குப் பச்சைக்கொடி காட்டுகிறார். ஷ்யாம் கணேஷும் திவ்யாஶ்ரீயும் காரில் செல்லும்போது விபத்து ஏற்படுகிறது. திவ்யாஶ்ரீ இறந்துவிடுகிறார். தங்கை சாவுக்கு ஸ்யாம்கணேஷ்தான் காரணம் என்று நினைத்து அவரைப் பழிவாங்கத் துடிக்கும் சுரேஷ்கோபி ஒரு பக்கமும் ஷ்யாம் கணேஷை காப்பாற்றத் துடிக்கும் அஜீத் ஒரு பக்கமுமாக எதிரும் புதிருமாகத் திரும்ப கதை சூடு பிடிக்கிறது. சுரேஷ்கோபி மனம் மாறுவதும் அஜீத்தின் காதல் நிறைவேறுவதும் மீதி கதை. 

முதுகுக்குப் பின்னால் திருப்பாச்சேத்தி அரிவாள், வயிற்றைச் சுற்றி சைக்கிள் செயின் இடுப்பில் கத்தி,  கையில் காப்பு பேண்ட் பாக்கெட்டில் கை வளையம்.. என முழு இரும்பு மனிதராக அஜீத்.! ("ஐயோ. அவன் எப்பவும் நாலு கிலோ இரும்போடுதான் அலையறான்!").

தீனா! #VikatanReview
தீனா! #VikatanReview

"நான் கைய வெச்சா கை இருக்கும்... கால் இருக்கும்... மூக்கு இருக்கும், முழி இருக்கும். ஆனா, உயிர் மட்டும் இருக்காது". என்று 'பஞ்ச்' டயலாக்  பேசி, `பாட்ஷா' ஸ்டைலில் 'தினக்கு..தினக்கு..  தீனா' என்று அதிரடி நடை நடக்கிறார் அஜீத். உடம்பைக் கொஞ்சம் கவனியுங்க அஜீத்... யாராவது போலீஸ் ரோல் கொடுத்திடப் போறாங்க... அவ்ளோ தொப்பை!

சுரேஷ்கோபி நிஜ தாதாவாகவே மாறி உணர்ச்சிகளைக் காட்டி சபாஷ் பெறுகிறார். லைலா சிரித்தால் அழகுதான், அதற்காக, 'போயிட்டு வரேன்', 'பயம்மா இருக்கு' என்று, எதற்கெடுத்தாலும் சிரிக்கிறார். ஹி.. ஹி.. டூமச்!

தீனா! #VikatanReview
தீனா! #VikatanReview

முஸ்திபுகள் பலமாக இருக்கிறதே தவிர. ஆக்ஷனில் வேகம் குறைவு என்ன செய்வதென்று புரியாமல் அரிவாளால் தலையைச் சொறிந்திருக்கிறார்கள்! 'வத்திக்குச்சி பத்திக்காதுடா..'பாட்டும் அதற்கு கனிந்த பழமாக நக்மா பிராட்டியார் போடும் ஆட்டமும் தூள்!

ஆக்ஷன் படம் என்ற முத்திரையோடு கொடுத்திருக்கிறார்கள். ஆனால், காதல் காட்சிகள்தான் சுவாரஸ்யம். காதல் கதை பண்ணியிருந்தால் கலக்கி இருப்பார் இயக்குநர்!

- விகடன் விமர்சனக்குழு

(11.02.2001 தேதியிட்ட ஆனந்த விகடன் இதழிலிருந்து...)