Published:Updated:

அவருக்கு இருந்தது ஒரே ஆசை... அது நிறைவேறாமலேயே போயிட்டார்!-நடிகர் ராஜசேகரின் இறப்பால் கலங்கும் மனைவி

‘சரவணன் மீனாட்சி’ உள்ளிட்ட சீரியல்களில் நடித்த ராஜசேகர், உடல்நலக் குறைவால் காலமானார்.

actor rajasekar
actor rajasekar

’மனசுக்குள் மத்தாப்பு’, ‘சின்னப்பூவே மெல்லப்பேசு’ உள்ளிட்ட படங்களின் இயக்குநர்கள், ‘ராபர்ட்- ராஜசேகர். இரட்டை இயக்குநர்களான இவர்களில், ராபர்ட் கடந்த ஆண்டு இறந்து விட்டார். ராஜசேகருக்கு மாரடைப்பு ஏற்பட்டு, இன்று சென்னை தனியார் மருத்துவமனையில் உயிரிழந்தார்.

actor rajasekar
actor rajasekar

ஏழு படங்கள் வரை இயக்கியிருக்கும் ராஜசேகர், ராபர்ட்டுடன் இணைந்தே ஒளிப்பதிவாளராக திரைப் பயணத்தைத் தொடங்கியவர். ‘நிழல்கள்’ உள்ளிட்ட சில படங்களில் நடிக்கவும் செய்திருக்கிறார். சினிமாவிலிருந்து ஒதுங்கிய பின், சில சீரியல்களை இயக்கினார். ‘சரவணன் மீனாட்சி’, ‘மாப்பிள்ளை’ சீரியல்களில் நடித்தார். தற்போது ஒளிபரப்பாகிக் கொண்டிருக்கும் ‘சத்யா’ சீரியலிலும் நடித்துக்கொண்டிருந்தார்.

’மனசுக்குள் மத்தாப்பு’ படத்தை இயக்கியபோது நடிகை சரண்யாவைத் திருமணம் செய்தார். பிறகு, கருத்து வேறுபாடு காரணமாக சரண்யாவுடனான திருமணம் விவாகரத்தில் முடிய, இரண்டாவதாக தாரா என்பவரைத் திருமணம் செய்துகொண்டார்.

தாராவிடம் பேசினோம். ‘மூச்சுத் திணறல் இருக்குன்னு ஆஸ்பத்திரியில அட்மிட் பண்ணினேன். தனி மனுஷியா இருந்து கவனிச்சிட்டிருந்தேன். எங்களுக்கு குழந்தைகள் இல்லை. மருத்துவமனையில பணம் கட்ட முடியலங்கிறதுக்காக, ரெண்டு நாள் ட்ரீட்மென்டே தராம போட்டுட்டாங்க. எம்.ஜி.ஆரால் சம்பாதிச்சவங்களால் நடத்தப்பட அந்த ஆஸ்பத்திரி, ஒரு நடிகன்ங்கிறதுக்காகவாவது கொஞ்சம் இரக்கம் காட்டி நடந்திருக்கலாம்.

actor rajasekar
actor rajasekar

கடைசி நேரத்துல, ரத்த சம்பந்தம் இல்லாத சீரியல் இயக்குநர் விக்ரமாதித்யன் வந்து பணம் கட்டின பிறகு சிகிச்சை தந்தாங்க. வேதனையான இன்னொரு விஷயமும் இருக்கு. இவர், எம்.ஜி.ஆரோட வளர்ப்பு மகளான ராதாம்மாவுக்கு சம்பந்தி முறை வேணும். இவரோட சொந்தத் தங்கச்சியை அந்த வீட்டுல கொடுத்திருக்காங்க.

படம் எடுத்தார், சினிமாவுல நடிச்சார்னு என்ன பெருமை இருந்தாலும் சம்பாதிக்கலை. இவரைக் கட்டிக்கிட்டதுல இருந்து வாடகை வீட்டுலதான் இருந்தோம். இப்பத்தான் சின்னதா ஒரு ஃபிளாட் வாங்கினார். அதுல கிரஹப்பிரவேசம் நடத்தி இன்னும் குடியேறக்கூட இல்லை. சாகறதுக்குள் சொந்த வீட்டுல ஒரு நாள் வசிச்சிட்டுப் போயிடணும்கிறதுதான் அவரோட ஒரே ஆசையா இருந்தது. அது நிறைவேறலை.

ஆனா, முப்பது வருஷமா அவரோட நான் வாழ்ந்த வாழ்க்கையைக் குறை சொல்லவே மாட்டேன். என்னை 100 சதவிகிதம் சந்தோஷமாவே வச்சிருந்தார். இன்னும் மிச்சமிருக்கிற என்னோட காலத்தை நினைச்சாத்தான் எப்படி நகருமோனு பயமா இருக்கு’ - என்றபடி கலங்குகிறார் தாரா.

actor rajasekar
actor rajasekar

ராஜசேகரின் உயிர் பிரிகிற கடைசித் தருணத்தில், அவர் அனுமதிக்கப்பட்டிருந்த அதே மருத்துவமனையில் நடிகை சரண்யாவும் அனுமதிக்கப்பட்டிருந்தார் என்பது குறிப்பிடத்தக்கது. வயிறு சம்பந்தப்பட்ட பிரச்னைக்குச் சிகிச்சை எடுக்க அனுமதிக்கப்பட்டிருந்தார் அவர்.