சினிமா
கட்டுரைகள்
Published:Updated:

ஹீரோயின்களிடம் கேட்கக்கூடாத கேள்வி!

ராஷிகண்ணா
பிரீமியம் ஸ்டோரி
News
ராஷிகண்ணா

சென்னையில `லீலா’ன்னு ஒரு மேடம்தான் எனக்குத் தமிழ் க்ளாஸ் எடுக்குறாங்க.

ரு செமத்தியான வாய்ப்புக்காகக் காத்திருக்கிறார் ராஷிகண்ணா. ப்ரிட்ஜில் வைத்த பிளம்ஸ் பழம்போல் ப்ரெஷ்ஷான புன்னகையும் அழகுமாக இருப்பவர் தமிழில் ‘இமைக்கா நொடிகள்’, ‘அடங்கமறு’, ‘அயோக்யா’, ‘சங்கத்தமிழன்’ என்று நான்கு படங்களை நடித்து முடித்துவிட்டாலும் இன்னும் தனக்கான பிரேக் கிடைக்க வேண்டும் என்ற ஆர்வத்திலிருக்கிறார்.

ஹீரோயின்களிடம் கேட்கக்கூடாத கேள்வி!

“லாக்டெளன் ஆரம்பத்துல ரொம்பக் கடுப்பா இருந்தது. ரெண்டாவது மாசத்துல இருந்து ஆன்லைன் கிளாஸ் சேர்ந்து தமிழ் படிக்க ஆரம்பிச்சுட்டேன். சென்னையில `லீலா’ன்னு ஒரு மேடம்தான் எனக்குத் தமிழ் க்ளாஸ் எடுக்குறாங்க. இப்போ நீங்க பேசுறதைப் புரிஞ்சுக்கிட்டு பதில் சொல்ல ஆரம்பிச்சிருக்கேன். கொஞ்சம் அட்ஜஸ்ட் பண்ணிக்கோங்க. தவிர, எனக்கு மியூசிக் மேல பெரிய ஆர்வமுண்டு. ஆன்லைன்ல கிட்டாரும் கத்துக்கிட்டு ப்ராக்டீஸ் பண்ணிட்டிருக்கேன்” என்றவர், கையில் ஒரு நோட் வைத்திருந்தார். என்னவென்று கேட்டால், “இது என் தமிழ் க்ளாஸ் நோட். உங்ககிட்ட தமிழில் பேசணும்ல. அதனால, நீங்க வர்ற வரைக்கும் இதைப் பார்த்து ரிவிஷன் பண்ணிட்டிருந்தேன்” என்று ஆசை ஆசையாக நமக்கு அந்த நோட்டின் பக்கங்களைப் புரட்டிக் காட்டுகிறார். ரசித்துக்கொண்டே (நோட்டைத்தான் பாஸ்) கேள்விகளை முன்வைத்தேன்.

ஹீரோயின்களிடம் கேட்கக்கூடாத கேள்வி!

``உங்களைப் பற்றி வெளியான செய்தியைப் பார்த்து டென்ஷனான மொமன்ட்?’’

“நான் உடல் எடையைக் குறைக்கணும்னு லைபோசக்‌ஷன் ஆப்ரேஷன் பண்ணிருக்கேன்னு எழுதியிருந்தாங்க. கோபம் வராதா பின்ன?”

``உங்களுக்கு பியூட்டி டிப்ஸ் கொடுக்கும் நடிகை?’’

“ `பெங்கால் டைகர்’ படத்தில் நடிக்கும்போது தமன்னா நிறைய பியூட்டி டிப்ஸ் கொடுப்பாங்க. அதைத்தான் பாலோ பண்ணுறேன்.”

ஹீரோயின்களிடம் கேட்கக்கூடாத கேள்வி!

``வித்தியாசமான பிட்னெஸ் சீக்ரெட்?’’

“கொழுப்பைக் குறைக்கணும்னா, முதல்ல கொழுப்பைச் சேர்த்துக்கணும். அதனால, காலையில கண்டிப்பா ஒரு டீ ஸ்பூன் நெய் சேர்த்துக்குவேன்.”

``தமிழில் எந்த இயக்குநர் இயக்கத்தில் நடிக்க ஆசை?’’

“ஆல்வேஸ் மணிரத்னம் சார், அப்புறம் வெற்றிமாறன் சார்.”

ஹீரோயின்களிடம் கேட்கக்கூடாத கேள்வி!

``இளம் இயக்குநர்கள்?’’

“அட்லி. பாலிவுட்ல ஷாருக் கானுக்குப் படம் பண்ணுறார்னு கேள்விப்பட்டேன்.”

``அடுத்து என்ன கேட்பேன்னு உங்களுக்கே தெரியும். பதில் சொல்லிடுங்க.’’

“விஜய் சார்கூட நடிக்கணும்.”

``எந்த மாதிரி கேரக்டர்களில் நடிக்கணும்னு நினைக்கிறீங்க?’’

“எனக்கு கிராமத்துப் பொண்ணா நடிக்கணும்னு அவ்ளோ ஆசை. இதுவரை எனக்கு அப்படியான கேரக்டர்கள் வரவேயில்லை.”

``கடுப்பேத்துற கேள்வி?’’

“ஹீரோயின்கள்கிட்ட எப்போ கல்யாணம் பண்ணிக்கப் போறீங்கன்னும் கல்யாணம் பண்ணிக்கிட்டா எப்போ குழந்தை பெத்துக்கப் போறீங்கன்னும் கேட்கிறது.”

``சினிமாவுக்கு வருவதற்கு முன் தமிழ்நாட்டுக்கு வந்திருக்கீங்களா?’’

“சின்ன வயசுல வந்திருக்கேன். மதுரைக்கெல்லாம் போயிருக்கேன். இன்னொன்னு சொல்லவா, எனக்கு ‘சென்னை’ என்று சொல்வதைவிட ‘மெட்ராஸ்’ என்று சொல்றதுதான் பிடிச்சிருக்கு. அது ஒரு எமோஷன். இப்போ நானும் மெட்ராஸ் பொண்ணாகிட்டேன்.”

``இப்போ நடிச்சிட்டிருக்கிற படங்கள்?’’

“அரண்மனை 3, மேதாவி.”

``ஒரு எக்ஸ்க்ளூவ் நியூஸ்?’’

“ `சங்கத்தமிழன்’ படத்துக்குப் பிறகு மறுபடியும் விஜய்சேதுபதிகூட ‘துக்ளக் தர்பார்’ படத்தில் நடிக்கிறேன்.”