“சிறப்பான அண்ணன்... பொறுப்பான பையன்... சிவகார்த்திகேயன்!”

“உ தவி இயக்குநர் ஆகுறதே ரொம்ப கஷ்டம். தனியா ஒரு படம் கிடைக்கிறதெல்லாம் பெரிய போராட்டமா இருக்கும். ஒருகாலத்துல இயக்குநர்னு என் பெயர் ஸ்கிரீன்ல வந்துட்டா போதும், மத்தபடி கிடைக்கிறது எல்லாமே போனஸ்னு நினைச்சேன். அப்படிப் பண்ணுனதுதான் ‘பசங்க.’ இப்போ ஒன்பதாவது படமா ‘நம்ம வீட்டுப் பிள்ளை’ எடுத்து முடிச்சிருக்கேன். ஒவ்வொரு படத்தையும் ரசிச்சுப் பண்ணிக்கிட்டிருக்கேன். அதுல பத்து வருடங்கள் போனதே தெரியலை. சந்தோஷமா இருக்கு” - உற்சாகமாகப் பேசத் தொடங்குகிறார் இயக்குநர் பாண்டிராஜ்.

. `` ‘மெரினா’ படத்துல நீங்க அறிமுகப்படுத்தின சிவகார்த்திகேயன், இப்போ முன்னணி ஹீரோவா இருக்கார். அவர் வளர்ச்சியை எப்படிப் பார்க்கிறீங்க?’’

. “விழா மேடைகள்ல சிவா, ‘பாண்டிராஜ் சாருக்கு நன்றி’ன்னு சொல்லும்போது மனசுக்குள்ள ஏற்படுற ஆனந்தத்துக்கு அளவே இருக்காது. ஆறேழு வருடங்கள்ல சிவகார்த்திகேயனுடைய வளர்ச்சி ரொம்ப அபாரமானது. இப்போ தயாரிப்பாளரா கிட்டார். ஒவ்வொரு ஊர்ல இருந்தும் விநியோகஸ்தர்கள் சிவா படங்களின் வசூல் பத்திச் சொல்லும்போது ரொம்ப சந்தோஷமா இருக்கும்.”

. ``சிவகார்த்திகேயனுக்குத் தங்கையாக நடிக்க ஐஷ்வர்யா ராஜேஷ்தான் உங்க முதல் சாய்ஸா?’’

. “இந்தக் கதையைத் தீர்மானிக்கும்போதே இந்தக் கேரக்டருக்கு ஐஷ்வர்யா ராஜேஷ் மாதிரி ஒரு பொண்ணுன்னு சொல்லிதான் பேசினோம். அவங்களுக்கும் இந்த கேரக்டர் ரொம்பப் பிடிச்சிருந்தது. ‘எங்க அண்ணே’ பாடலுக்கு நல்ல வரவேற்பு கிடைச்சிருக்கு. வழக்கமான ஓப்பனிங் பாடலா இல்லாமல் அண்ணன் - தங்கச்சிப் பாடலை பிளான் பண்ணினோம். படத்துல முக்கியமா அண்ணன் - தங்கச்சி உறவுதான் பேசப்பட்டிருக்கும். டிக்டாக்ல அண்ணன், தங்கச்சியைக் கலாய்க்கிறது, தங்கச்சி, அண்ணனைக் கலாய்க்கிறதுன்னு நிறைய வீடியோ பண்ணியிருந்தாங்க. அவங்களுக்காகக் கலகலப்பா ஒரு பாடல் பண்ணணும்னு ரெடி பண்ணுனதுதான் இது. ஓப்பனிங் பாடல்ங்கிறதனால ரொம்ப ஜாலியா இந்தப் பாட்டைக் கொண்டு போகணும். அதுக்குத் தகுந்த மாதிரி ஒருத்தரை எழுத வைக்கணும்னு யோசிக்கும்போது விக்னேஷ் சிவன் ஞாபகம் வந்தார். அவருக்கும் தங்கச்சி இருக்கிறதால நிறைய விஷயங்கள் கனெக்ட் பண்ணி எழுதியிருந்தார். நல்ல ரெஸ்பான்ஸ் கிடைச்சிருக்கு.”

. ``படத்துல சிவகார்த்திகேயன் கேரக்டர் என்ன?’’

. “ஊர்ல சொந்தமா மரச்செக்கு எண்ணெய்த் தொழில் பண்ணிட்டிருக்கிற பையன், அரும்பொன். இந்தக் கேரக்டரை எல்லோரும் கடந்து வந்திருப்போம். ‘வேலைக்காரன்’ படத்தைத் தவிர எல்லாப் படத்துலயும் பொறுப்பில்லாம இருக்கிற பையனாதான் சிவாவைப் பார்த்திருப்போம். இந்தப் படத்துல குடும்பச் சுமைகளை ஏத்துக்கிட்டு உழைக்கும் பொறுப்பான பையனா நடிச்சிருக்கார்.

‘நம்ம வீட்டுப் பிள்ளை’ன்னு தலைப்பு வெச்சதுக்கு இதுதான் காரணம். அவருக்கு ஜோடியா ‘மாங்கனி’ங்கிற கேரக்டர்ல அனு இமானுவேல் நடிச்சிருக்காங்க. இந்தப் புது ஜோடி மக்களுக்கு நிச்சயமா பிடிக்கும்.”

. `` ‘கடைக்குட்டி சிங்கம்’ மாதிரியே இந்தப் படத்துலயும் ஏகப்பட்ட கேரக்டர்கள் இருக்காங்களே?’’

. “அந்தப் படத்துல அஞ்சு அக்காக்களுக்கும் தம்பிக்கும் நடக்கிற கதை. இருந்தாலும் அக்காக்களுடைய கணவர்கள், அக்கா பொண்ணுங்கன்னு நிறைய விஷயங்கள் பேசியிருப்போம். ஆனா, இதுல சித்தப்பா, பெரியப்பா, அத்தை, மாமா, தங்கச்சி, தம்பி, தாத்தா, பாட்டின்னு எல்லா உறவுகளுக்குள்ளேயும் இருக்கிற பாசத்தைப் பேசியிருக்கோம். அந்தப் படத்துல ஹீரோதான் குடும்பத்துல கடைக்குட்டி. இதுல ஹீரோதான் குடும்பத்துல மூத்த பிள்ளை. அண்ணன் தங்கச்சி பாசம் இருக்கிறவங்களுக்கு ரொம்பப் பிடிக்கும். அதேபோல, அப்பாவை இழந்த பசங்களுக்கு எமோஷனலா கனெக்ட் ஆகும். நிறைய காட்சிகளை எடுக்கும்போது அழுதுகிட்டே எடுத்தேன். எமோஷன் நிறைய இருந்தாலும் வழக்கமா சிவாவிடமிருந்து வரும் கலகலப்பான விஷயங்களும் படத்துல இருக்கும். ‘கடைக்குட்டி சிங்கம்’ பிடிச்சவங்களுக்கு ‘நம்ம வீட்டுப் பிள்ளை’ ரொம்பப் பிடிக்கும்.”

. “பாரதிராஜாவை இயக்கிய அனுபவம்?”

. “என்னை மாதிரி நிறைய பேர் இயக்குநராகணும்னு சினிமாவுக்கு வந்ததே அவரைப் பார்த்துதான். அவரை இயக்கணும்னு எனக்கு ரொம்ப நாள் ஆசை. அவர் ஒரு குழந்தை மாதிரி. என் பிள்ளைகள் சேட்டை பண்ற மாதிரி அந்தக் குழந்தையும் சேட்டை பண்ணும். ஆனா, நான் விடமாட்டேன். நாட்டு வைத்தியரா நடிச்சிருக்கார். அவர்கிட்ட ஒரு வசனத்தைக் கொடுத்து ‘இப்படி சொல்லுங்கப்பா’ன்னு சொன்னா, ‘ஏன் இப்படிச் சொல்லக்கூடாதா? எப்படி வேணாலும் சொல்றவன்தான் கலைஞன்’னு சொல்லுவார். ‘இல்லை, இந்தக் கலைஞன் இப்படித்தான் சொல்லணும்’னு சொல்லிடுவேன். அவர் கடுப்பாகிடுவார். ஒருகட்டத்துல ‘இவனைத் திருத்தவே முடியாது’ன்னு, நான் சொல்ற மாதிரியே சொல்ல ஆரம்பிச்சுட்டார். 80 வயதானாலும் மத்தவங்களை நம்பாமல் தன்னுடைய உழைப்புலேயே சம்பாதிச்சு சாப்பிட்டுக்கிட்டு வாழ்ந்துகிட்டிருக்கிற தனித்துவமான கேரக்டர் அவருக்கு. இதைச் சொன்னவுடன் அவருக்குப் பிடிச்சிருந்தது. உடனே ஏத்துக்கிட்டார்.’’

. “சமுத்திரக்கனி, நட்ராஜ், ஆர்.கே.சுரேஷ், ‘ஆடுகளம்’ நரேன்... இந்த மாதிரி நிறைய முக்கிய நட்சத்திரங்கள் இருக்காங்க. எல்லோரையும் எப்படிச் சமாளிச்சீங்க?”

. “படத்துல மொத்தம் 32 கேரக்டர்கள். எல்லோரையும் சமாளிக்கிறது ரொம்பக் கஷ்டம்தான். 32 பேருக்கும் கதை சொல்ல முடியாது. சமுத்திரக்கனி அண்ணனுக்கே நான் கதை சொல்லலை. ‘கிளம்பி வந்துடு’ன்னு சொன்னவுடன் ஓகே சொல்லிட்டார். ஸ்பாட்டுக்கு வந்து ஜெகன் அண்ணன்கிட்ட கேட்டுத் தெரிஞ்சுகிட்டார். இவராவது கேட்டுத் தெரிஞ்சுகிட்டார்.

ஆர்.கே.சுரேஷுக்கு என்ன கதைன்னே தெரியாது. ஏழெட்டு நாள் ஸ்பாட்ல சும்மாவே உட்கார்ந்திருந்தார், நட்டி சார். ‘உங்களுக்கான போர்ஷன் எடுக்கலை. நீங்க ஊருக்கு வேணா போயிட்டு வாங்க’ன்னு சொன்னால், ‘இல்லை. நான் இங்கேயே இருக்கேன். நான் ஊருக்குப் போன சமயத்துல எதாவது எடுத்துட்டீங்கன்னா’ன்னு எங்களோடு ஸ்பாட்ல இருந்தார். எல்லோருடைய நம்பிக்கையையும் நான் காப்பாத்தியாகணும். ரொம்ப சவாலான படம்தான் இது.”

. ``சூரி, யோகிபாபுன்னு ரெண்டு பெரிய காமெடி நடிகர்கள் இருக்காங்க. இவங்களுக்கான இடத்தை எப்படி சரியா பிரிச்சுக்கொடுத்தீங்க?’’

. “உண்மையைச் சொன்னால், சூரிக்குத்தான் நிறைய போர்ஷன் இருக்கு. சூரி கேரக்டர் ஹீரோவோடு பயணிக்கும். யோகிபாபு வில்லன்கள்கூட வருவார். ஆனா, கொஞ்ச நேரம் வந்தாலும் செம ரகளையா இருக்கும். படத்துல சிவா ஒரு பக்கம் காமெடி பண்ணுவார். பாராதிராஜா சாருக்கும் கொஞ்சம் ஹியூமர் போர்ஷன் இருக்கு. படம் முழுக்கக் கலகலப்பா இருந்துகிட்டே இருக்கும்.’’

. “டெக்னிக்கல் டீம்?”

. “இமான் சார்கூட ரெண்டாவது முறை. இந்தப் படத்துலயும் பாடல்கள் கவனிக்கப்படும். ஏற்கெனவே ‘எங்க அண்ணே’ பாட்டுக்கு செம வரவேற்பு. நீரவ் ஷா சார்கூட வொர்க் பண்ணணும்னு ரொம்ப நாள் ஆசை. ரூபனோட எடிட்டிங், வீரசமருடைய கலை இயக்கம்னு செம டீம் கிடைச்சிருக்கு.”

. “ ‘கேடி பில்லா கில்லாடி ரங்கா’ படத்துல நடிச்ச உங்க மகனை இந்தப் படத்துல மீண்டும் நடிக்க வெச்சிருக்கீங்க. என்ன ஸ்பெஷல்?”

. “ஒரு நாள் `அவன் ஸ்கூல்ல நடக்கிற விழாவுல மைம் பண்றான். வாங்க போய்ட்டு வரலாம்’னு என் மனைவி சொன்னாங்க. ஆனா, அவன் என்கிட்ட சொல்லவேயில்லை. ஒரு அப்பாவா என் பையனை மேடையில பார்க்க ஆசைப்பட்டுப் போனேன். பதினைஞ்சு பசங்க வந்து மைம் பண்ணிட்டிருந்தாங்க. அதுல அன்பு எங்கே இருக்கான்னு கண்டுபிடிக்கவே முடியலை. அப்புறம் பார்த்தா ஒரு ஓரமா கீழ குனிஞ்சு நின்னுட்டிருந்தான். அப்படி நிக்கிறதுதான் மைம்ல அவனோட கேரக்டர். அவனோட கேரக்டரை அவன் சரியா பண்ணுனான். ஆனா, அங்கே மத்த பசங்க நடிச்சுக்கிட்டிருக்காங்க; என் பையன் குனிஞ்சுகிட்டிருந்தது எனக்கு அப்செட்டாகிடுச்சு. எவ்ளோ குழந்தைகளை நான் நடிக்க வெச்சிருக்கேன். தேசிய விருதெல்லாம் வாங்கியிருக்காங்க. ஆனா, என் மகன் இப்படி யாரோ மாதிரி நிக்கிறானேன்னு ஒரு மாதிரியாகிடுச்சு. அவனைக் கைத்தட்டல் வாங்க வெச்சிடணும்னு நினைச்சு ஒரு கேரக்டரை எழுதினேன். இதுல சூரி பையனா நடிச்சிருக்கான்.”

. “கமர்ஷியல் படங்கள் நிறைய வந்துகிட்டிருந்த காலத்துல ‘பசங்க’ மாதிரியான படத்தைக் கொடுத்தீங்க. இப்போ மாற்று சினிமாக்கள் நிறைய வர ஆரம்பிக்கிற சமயத்துல கமர்ஷியலா படம் எடுத்துக்கிட்டிருக்கீங்க. ஏன்?”

. “இங்கே கமர்ஷியல், ஆர்ட் ஃபார்ம்னு ரெண்டு வகை சினிமா இருக்கு. இயக்குநர்களும் அவங்கவங்க ஜானருக்குள்ளேயே இருப்பாங்க. ஆனா, நான் ஒரு வட்டத்துக்குள்ள சிக்கிக்கக் கூடாதுன்னு நினைக்கிறேன். கமர்ஷியல் படங்கள் பண்ணினாலும் என்னால மறுபடியும் ‘பசங்க’ மாதிரி இன்னொரு படம் பண்ண முடியும்; நான் கமர்ஷியல் படங்கள் பண்ணுவேன்னு நினைச்சதே இல்லை. பெரிய ஹீரோக்களை வெச்சுப் படம் பண்ணணும்னு ஆசையே இருந்ததில்லை. ஆனா இப்போ எல்லா ஹீரோக்களோடும் படம் பண்ணணும்னு ஆசை வந்திருக்கு. ‘கடைக்குட்டி சிங்கம்’, ‘நம்ம வீட்டு பிள்ளை’ படங்களை கமர்ஷியல் படங்கள் வரிசையிலே சேர்க்கவே முடியாது. காரணம், அவ்வளவு சமூகக் கருத்துகளைப் படத்துல சொல்லியிருக்கேன்.”

. “அடுத்து..?”

. “ஒரு ஹீரோ நாலஞ்சு ஃப்ளாப் படங்கள் கொடுக்கலாம். அவங்களுக்குப் படம் கிடைக்கும். ஆனா, இயக்குநர் ஒரு ஃப்ளாப் கொடுத்தாலே ‘சரக்கு தீர்ந்திடுச்சு’ன்னு சொல்லிடுவாங்க. அதனால நம்மளை நம்பினவங்களுக்காக இந்தப் படத்தை நல்லபடியா முடிச்சுக்கொடுக்கணும். இதுக்குப் பிறகு, இதைவிடப் பெரிய பட வாய்ப்பு வந்தாலும் சரி, இரண்டு கோடியில ஒரு சின்ன படம் பண்ணச் சொன்னாலும் சரி, நான் தயார். வெப் சீரிஸுக்கும் பேசிக்கிட்டிருக்காங்க. ‘சீரியல் பண்றீங்களா?’ன்னுகூடக் கேட்டாங்க. சின்னத்திரை, இணையத்திரை, வெள்ளித்திரை என்னவா இருந்தாலும் நான் ரெடி. ஆனா, அவ்வளவு சீக்கிரம் என்னை வெள்ளித்திரை கைவிடாதுன்னு நம்பிக்கை இருக்கு, பார்ப்போம்.”

“சிறப்பான அண்ணன்... பொறுப்பான பையன்... சிவகார்த்திகேயன்!”

உ. சுதர்சன் காந்தி