Published:Updated:

ஒரே மேடையில் இளையராஜா-வைரமுத்து! - பி.சுசீலா நிகழ்ச்சியில் சுவாரஸ்யம்

கு.ஆனந்தராஜ்

இளையராஜா வருகைதந்தபோது, அரங்கில் அமர்ந்திருந்தார் வைரமுத்து.

சுசீலாவை வாழ்த்தும் இளையராஜா
சுசீலாவை வாழ்த்தும் இளையராஜா

பிரபல பின்னணிப் பாடகி பி.சுசீலா, திரையிசைக்கு வந்து 65 ஆண்டுகள் நிறைவடைந்துள்ளது. எனவே, `லயா மீடியா' நிறுவனம் சார்பில் பி.சுசீலாவுக்குப் பாராட்டுவிழா சென்னையில் நேற்று நடந்தது. தமிழ் சினிமா உலகின் இரு துருவங்களான இளையராஜா-வைரமுத்து இருவரும், நீண்ட வருடங்களுக்குப் பிறகு ஒரு நிகழ்ச்சியில் கலந்துகொண்டதுதான் இந்நிகழ்ச்சியின் முத்தாய்ப்பு. நிகழ்ச்சியில் நடந்த சுவாரஸ்யமான நிகழ்வுகள்....

வைரமுத்துவை வரவேற்ற சுசீலா
வைரமுத்துவை வரவேற்ற சுசீலா

* இசைக்கலைஞர்கள், இயக்குநர்கள், தயாரிப்பாளர்கள், நடிகர்கள், நடிகைகள் என ஏராளமானோர் இந்நிகழ்ச்சியில் கலந்துகொண்டுள்ளனர். ஆனால், இளையராஜா, கே.ஜே.யேசுதாஸ், வைரமுத்து ஆகியோர் கலந்துகொண்டது நிகழ்ச்சிக்குக் கூடுதல் முக்கியத்துவத்தைக் கூட்டியது. இளையராஜா - வைரமுத்து இருவரும் ஒரு நிகழ்ச்சியில் கலந்துகொண்டதால், அரங்கில் கூடியிருந்த பிரபலங்கள் பலரும் ஆச்சர்யத்தில் மகிழ்ச்சியடைந்தனர்.

* இளையராஜா வருகைதந்தபோது, அரங்கில் அமர்ந்திருந்தார் வைரமுத்து. எனவே, விருந்தினர்கள் அறையில் சிறிதுநேரம் காத்திருந்தார் இளையராஜா. பிறகு மேடையேறியவர், சுசீலாவைப் பற்றி 15 நிமிடங்களுக்கும் மேல் பேசினார். `நானா பாடலையே. நீதான் பாடவெச்சே' என இளையராஜாவைப் பார்த்து சுசீலா பாட, அரங்கத்தில் கைதட்டல் அதிகரித்தது. தான் இசைத்துறைக்கு வரக்காரணமான, `மாலைப் பொழுதின் மயக்கத்திலே' பாடல் பற்றி நெகிழ்ச்சியாகக் கூறினார், இளையராஜா. மேலும், ``இப்பாடலில் வரும் `மயங்குது எதிர்காலம்' என்ற வரியில்தான் நான் அதிகம் மயங்கினேன். சுசீலாவின் குரல், இந்த நூற்றாண்டில் இணையற்ற குரல்" என்றார். பி.சுசீலாவுக்கு சால்வையைப் போர்த்தி, வைர மோதிரத்தை அணிவித்தார் இளையராஜா.

சுசீலாவுடன் யேசுதாஸ்
சுசீலாவுடன் யேசுதாஸ்

* `` `ழ' உச்சரிப்பை மிகச் சிறப்பாகத் தன் குரலில் வெளிப்படுத்துவார், பி.சுசீலா. அவரைப் பாடவைக்கவே, `கண்ணுக்கு மை அழகு' பாடலைத் தயார் செய்தோம். அந்தப் பாடலை நான் எழுதி முடித்துப் பல மாதங்களுக்குப் பிறகே அப்பாடல் ஒலிப்பதிவு நடைபெற்றது" என மேடையில் நீண்டநேரம் உரையாடினார் வைரமுத்து.

* ``சரஸ்வதியை நான் பார்த்ததில்லை. கலைவாணியின் பரிபூரண அம்சங்கள் பெற்ற, பி.சுசீலாவையே நான் சரஸ்வதியாக நினைக்கிறேன்" என்று நெகிழ்ச்சியாகக் குறிப்பிட்டார் யேசுதாஸ். மேலும், `விழியே கதை எழுது' பாடலை முழுமையாகப் பாடினார் யேசுதாஸ்.

* நிகழ்ச்சியில் தான் பாடிய பாடல்களில், சில வரிகளை பின்னணிப் பாடகர் மனோவுடன் இணைந்து பாடினார் பி.சுசீலா.

சுசீலாவுடன் இளையராஜா
சுசீலாவுடன் இளையராஜா

* கங்கை அமரன், சங்கர் கணேஷ், மனோ, பாக்யராஜ், பூர்ணிமா பாக்யராஜ், சுஹாசினி, கெளதமி, சந்தான பாரதி உள்ளிட்ட பல பிரபலங்களும் நிகழ்ச்சியில் கலந்துகொண்டனர். இவர்கள் அனைவருமே மேடையேறி, சுசீலாவைப் பற்றி பேசினர். `இசைப் பேரரசி' என்ற பட்டமும் பி.சுசீலாவுக்கு வழங்கப்பட்டது.