இன்பாக்ஸ்

உ லகம் முழுக்க பாக்கெட்டுகளில் அடைத்து விற்கப்படும் உணவுப்பொருள்களின் தரம் குறித்து ஆக்ஸ்போர்டு பல்கலைக்கழகத்தின் ‘ஜார்ஜ் இன்ஸ்டிட்யூட் ஆஃப் குளோபல் ஹெல்த்’ சமீபத்தில் ஆய்வு ஒன்றை நடத்தியது. ஆரோக்கியமான உணவுகள் கிடைக்கும் நாடுகளில் முதலிடத்தில் இங்கிலாந்தும் அதற்கு அடுத்த இடத்தில் அமெரிக்காவும் இருக்கின்றன. மிகமிக மோசமான ஆபத்தான உணவுகள் விற்கும் நாடுகளின் பட்டியலில் முதலிடத்தில் இருப்பது சீனா. அதற்கு அடுத்த இடத்தில் இருப்பது இந்தியா! கவனம்!

. ‘ பொ ன்மாணிக்கவேல்’ படத்தில் வித்தியாசமான காவல்துறை அதிகாரியாகவும் `யங்மங்சங்’ படத்தில் குங்பூ வீரராகவும் நடித்துக்கொண்டிருக்கிறார் பிரபுதேவா. இதற்கு நடுவில் பாலிவுட்டில் சல்மான்கானை வைத்து மிகப்பெரிய பட்ஜெட்டில் `தபாங் 3’ படத்தையும் இயக்கி முடித்துவிட்டார். முந்தைய படங்களைவிட இந்தப்படத்தில் `சுல்புல் பாண்டே’ பக்காமாஸாகத் தோன்ற இருக்கிறாராம். நான்காண்டுகளுக்குப் பிறகு பாலிவுட்டில் பிரபுதேவா படம் இயக்குகிறார் என்பதால் படத்திற்கு ஏகப்பட்ட எதிர்பார்ப்பு எகிற ஆரம்பித்திருக்கிறது. டிசம்பரில் படம் ரிலீஸ்! சல்மானுடன் சல்மார்!

படம்: கிரண் சா

. ப டப்பிடிப்புக்காக இமாசலப்பிரதேசம் சென்ற மஞ்சுவாரியார் வெள்ளத்தில் சிக்கிக்கொண்டதும் அங்கிருந்து மீண்டதும்தான் சென்ற வார வைரல். இமாசலப்பிரதேசத்தின் சாட்ருவில் சனல்குமார் சசிதரன் இயக்கும் படத்தின் படப்பிடிப்பில் கலந்துகொள்ளச் சென்றார். சென்ற இடத்தில் தொடர் மழை வெள்ளத்தால் மலைப்பகுதிக்குள் படக்குழு சிக்கிக்கொள்ள, மஞ்சுவாரியார் சாட்டிலைட் போன் மூலம் கேரளாவில் உள்ள தன் அண்ணனைத் தொடர்புகொண்டு உதவி கேட்டார். விஷயம் கேரள முதல்வருக்குத் தெரியவர அவர் இமாசல் முதல்வர் ஜெய்ராம் தாகூரிடம் பேசி மஞ்சுவையும் படக்குழுவையும் உடனடியாக மீட்க உதவி செய்திருக்கிறார். இதையே படமா எடுக்கலாமே!

. ஒ ரு மாதமாகப் பல ஆயிரம் சதுரகிலோமீட்டர் அளவுக்கு அமேசான் காடுகள் பற்றி எரிந்துகொண்டிருக்கின்றன. உலகத்தின் நுரையீரல் அழிகிறது எனச் சுற்றுச்சூழல் ஆர்வலர்கள் கவலைப்படுகிறார்கள். உலக ஆக்ஸிஜன் தேவையில் 20% அளவுக்கு மேல் அமேசானிலிருந்துதான் நமக்குக் கிடைக்கிறது. மனிதக் குடியேற்றங்கள், காடுகள் அழிப்பு, பருவநிலைமாற்றம் என இந்தக் காட்டுத்தீக்கான காரணங்களை அடுக்குகிறார்கள். இன்னொரு பக்கம் கிரீன்லேண்டில் வெயில் வாட்டி வதைத்துக்கொண்டிருக்கிறது. எந்த ஆண்டும் இல்லாத அளவுக்கு 10.7 டிகிரி செல்சியஸ் அளவுக்கு டெம்ப்ரேச்சர் எகிறியிருக்கிறது. ஆய்வாளர்களின் கணக்குப்படி அடுத்த சில மாதங்களில் 440 பில்லியன் டன் அளவுக்கு பனிக்கட்டிகள் உருகும் என்று கணித்திருக்கிறார்கள். இயற்கை பத்திரம்!

. ப ல ஆண்டுகளுக்குப் பிறகு மீண்டும் தன் மகன் சிபிராஜோடு இணைந்து நடிக்கிறார் சத்யராஜ். `சத்யா’ பட இயக்குநர் பிரதீப் கிருஷ்ணமூர்த்தி இயக்கும் இந்தப் படம் ஒரு மர்டர் மிஸ்டரியாக இருக்குமாம். ``படத்தில் அப்பா மகன் இருவருமே இதுவரை ஏற்றிடாத ஒரு வித்தியாசமான பாத்திரத்தில் நடிக்க இருக்கிறார்கள். என்ன பாத்திரம் என்பது மட்டும் சஸ்பென்ஸ்” என்று கூறியிருக்கிறார் பிரதீப்! மீண்டும் கோவை பிரதர்ஸா!

. பி ரபாஸும் அனுஷ்காவும் விரைவில் திருமணம் செய்துகொண்டு லாஸ் ஏஞ்சலீஸில் செட்டில் ஆகப்போகிறார்கள், அங்கே வீடுதேடிக்கொண்டிருக்கிறார்கள் என்று சென்ற மாதம் செய்திகள் எல்லாம் பரபரப்பானது. இதில் செம கோபமாகிவிட்டார் பிரபாஸ். “அப்படி ஏதாவது எங்களுக்குள்ள இருந்தா நாங்க ஒண்ணாதானே சுத்திக்கிட்டிருப்போம், எங்க இரண்டுபேரையும் கடந்த இரண்டுவருஷங்கள்ல எங்கயாவது ஒண்ணா பாத்தீங்களா... எதை வச்சு இப்படியெல்லாம் எழுதறீங்க?’ எனப் பத்திரிகையாளர் சந்திப்பில் ஒரு பிடி பிடித்துவிட்டார். கோவக்காரன் சார் இந்த பாகுபலி!

. ஸ் பைடர் மேனுக்கு குட்பை சொல்லியிருக்கிறது மார்வெல் நிறுவனம். டிஸ்னி நிறுவனத்துக்கும் சோனி நிறுவனத்துக்கும் இடையே ஏற்பட்ட கருத்துவேறுபாட்டால் இனிவரும் மார்வெல் படங்களில் ஸ்பைடர் மேன் தோன்றுவதில் சிக்கல் எழுந்துள்ளது. இந்த இரண்டு நிறுவனங்களுக்கும் சுமுகமான தீர்வு கிடைத்தால் மட்டுமே ஸ்பைடர் சிலந்திவலை வீசிப் பறக்கமுடியும். இந்த விஷயத்தைக் கேள்விப்பட்ட நெட்டிசன்கள் உடனடியாக #SaveSpiderman என்று ஹேஷ்டேக் போட்டுப் புரட்சிப் போராட்டத்தில் இறங்கி டிரெண்ட் அடித்தார்கள். ஆனாலும் சோனியோ டிஸ்னியோ இதுபற்றி வாயையே திறக்கவில்லை! மிஸ்யூ ஸ்பைடி!

. டோ லிவுட்... மாலிவுட் என அடுத்தடுத்து நடித்துக்கொண்டிருந்த விஜய்சேதுபதி பாலிவுட் போகிறார். அமீர்கானின் அடுத்த படத்தில் முக்கியமான வேடத்தில் நடிக்கப்போகிறார் என மும்பை பரபரக்கிறது. டாம் ஹேங்க்ஸ் நடித்த ‘ஃபாரஸ்ட் கம்ப்’ படத்தின் ரீமேக்கான ‘லால் சிங் சத்தா’வில் அமீர்கானின் நண்பராக விஜய்சேதுபதி நடிப்பார் என எதிர்பார்க்கப்படுகிறது. அமீர்கான் அடுத்து விக்ரம் வேதா ரீமேக்கில் நடிக்கிறார். அதில் விஜய்சேதுபதி பாத்திரத்தை ஏற்கப்போவது அமீர்தான்! அடுத்து ஹாலிவுடுங்களாண்ணா!

இன்பாக்ஸ்

விகடன் டீம்