“சாக்லேட் பாய் என்றால் கூச்சம்!”

த விர, ஒரு டிராஃபிக் போலீஸ் வண்டி ஓட்டுறதுக்கும், பைக் ரேஸர் வண்டி ஓட்டுறதுக்குமான வித்தியாசத்தை இந்தப் படத்துல

காட்டி யிருக்கேன். என் உழைப்பு கண்டிப்பா படத்துல தெரியும். ஜி.வி.பிரகாஷ் கேரக்டர் இந்தப் படத்துல பைக் ரேஸரால் நிஜ வாழ்க்கையில் எத்தனைபேர் பாதிக்கப் படுறாங்க, உயிரிழந்து சாகுறாங்க, அவங்களால எத்தனை குடும்பங்கள் கஷ்டப்படுறாங்கங் கிறதைப் பிரதிபலிக்கும். ஒரு படம் எந்த அளவுக்கு ரசிகர்களைத் தொடர்புபடுத்துதோ, அந்த அளவுக்கு ஒரு கமர்ஷியல் படம் சுவாரஸ்யமா இருக்கும். ‘சிவப்பு மஞ்சள் பச்சை’யில் அந்த சுவாரஸ்யம் கண்டிப்பா இருக்கும்!” என்கிறார், சித்தார்த்.

. “இயக்குநர் சசி உங்களுக்கு எவ்வளவு ஸ்பெஷல்?”

. “சசி சார்மேல எனக்குப் பெரிய நம்பிக்கை இருக்கு. இப்போதைய தலைமுறைக்குப் ‘பிச்சைக்காரன்’ சசியா தெரிஞ்சிருக்கலாம். ஆனா, 90’ஸ் கிட்ஸ் எல்லோருக்கும் சசி எப்படிப்பட்ட இயக்குநர்னு நல்லாவே தெரியும். நிஜ வாழ்க்கையிலிருந்து கருவை எடுத்துக்கிட்டுக் கதை பண்ற இயக்குநர் அவர். இப்போ இருக்கிற சினிமாவுக்கு அது முக்கியமான விஷயம். ‘பாய்ஸ்’ படம் வந்து பதினாறு வருடம் ஆச்சு. இன்றைய தேதிக்குச் சொல்றேன், சினிமாவைப் பார்த்து சினிமா எடுக்கிறவங்களோட எண்ணிக்கைதான் தமிழ் சினிமாவில் அதிகம். ரசிகர்களுக்கு நிஜ வாழ்க்கையிலிருந்து கதை கொடுக்குறது சவாலான விஷயமா இருக்கு. அப்படி ஒரு சூழல்ல எவ்வளவு நேரம் செலவானாலும், தனக்குப் பிடிச்ச மாதிரியான படம் பண்றதுக்காக சசி சார் மெனக்கெடுறது பெரிய விஷயம். இந்தப் படத்துல கிட்டதட்ட மூணு வருடம் டிராவல் பண்ணியிருக்கேன்னு சொல்லலாம்.”

. “டிராஃபிக் போலீஸ் கேரக்டரில் நிறைய பன்ச் பேசி நடிச்சிருக்கீங்களே, அந்த கேரக்டர் கொடுத்த அனுபவம்?”

. “போலீஸ் யூனிஃபார்ம் போட்டு இதுவரை நான் நடிச்சதில்லை. நண்பன் ஜெயம் ரவி, ‘மச்சி, முதல்முறையா காக்கிச் சட்டை போட்டு நடிக்கிற, லக்கிதான்!’னு சொன்னான். கேரக்டருக்கேற்ற டிரெஸ் போட்டாச்சு. ஆனா, பன்ச் பேச வெச்சிடுவாங்களோன்னு பயம் இருந்தது. ஏன்னா, நான் பண்ற சினிமாவுக்கும், பன்ச் வசனங்களுக்கும் தொடர்பே இருக்காது. இப்படிப்பட்ட சூழலில் சசி சாரை நம்பிப் பண்ணினேன். தவிர, சசி சாருக்கும் பன்ச் வசனங்களை வெச்சுப் படமெடுக்கத் தெரியாது. இதுவரை டிராஃபிக் போலீஸ்காரங்களைக் கிண்டலடிச்சோ, நெகட்டிவ் விஷயங்களை ஹைலைட் பண்ணியோதான் படம் பார்த்திருப்போம். ஆனா, ஒரு டிராஃபிக் போலீஸின் 360 டிகிரி எமோஷனை இந்தப் படத்துல பார்க்கலாம். அதனாலேயே இந்தக் கேரக்டர் எனக்கு ரொம்ப இன்ஸ்பயரிங்கா இருந்தது. ‘ஒரு ரோடு சொல்லிடும், ஒரு நாட்டோட லட்சணத்தை!’ங்கிற வசனம் டீஸர்ல இருக்கு. நான் மட்டுமல்ல, ஒவ்வொரு குடிமகனும் சாதாரணமா ஃபீல் பண்ற ஒரு வசனம் இது. ரியாலிட்டியான ஒரு விஷயத்தை சுவாரஸ்யமா, வசனம் மூலமா சொல்றது, சசிகிட்ட எனக்கு ரொம்பப் பிடிச்ச விஷயம். இந்தப் படத்துக்காக வெயிட்டைக் கூட்டினேன். டிராஃபிக் போலீஸாரின் ஆக்ஷன் நடவடிக்கைகள் எப்படியிருக்கும்னு பார்த்தேன். தமிழ் சினிமாவில் டிராஃபிக் போலீஸ் என்ற பேச்சு வர்றப்போ, இந்த சினிமா முதலிடத்தில் இருக்கும்னு எனக்கு நம்பிக்கை இருக்கு. முக்கியமா, சென்னையில ஒரு இடத்துல நின்னு நானே டிராஃபிக்கை கிளியர் பண்ணினேன், அதைக் ‘கட்’ சொல்லாம ஷூட் பண்ணிக்கிட்டிருந்தார், சசி சார். கிட்டத்தட்ட 15 நிமிடத்துக்கு நான் மட்டும் ரோட்டுல நின்னு டிராஃபிக்கைக் கிளியர் பண்ணினேன். இதைச் சொல்றப்போ, ரொம்ப ஜாலியா சுவாரஸ்யமா இருக்கும். ஆனா, பண்றப்போ அல்லு விட்டுருச்சு.”

. “ ‘லைலா’ வெப் சீரிஸில் நீங்க நடிச்ச கதாபாத்திரம் பா.ஜ.க அரசை விமர்சிக்கிற மாதிரி இருந்ததே?”

. “உண்மையைச் சொல்லணும்னா, இந்தக் கதை அரசியல் கதை கிடையாது. ஒரு நாவலை அடிப்படை யாக வெச்சு எடுக்கப்பட்டது. தீபா மேத்தா அதை அடிப்படையா வெச்சுத்தான் திரைக்கதை எழுதியி ருக்காங்க. எந்த அரசியலையும் நாங்க கதையில சொல்லல. எந்த அரசா இருந்தாலும், லிமிட்டே இல்லாமப் போயிட்டிருந்தா, எந்த மாதிரியான உலகம் உருவாகும்னு இந்த வெப் சீரிஸ்ல சொல்லியிருந்தோம். படத்துல வர்ற நாட்டின் பெயர்கூட ‘இந்தியா’ கிடையாது. மத்தபடி, பா.ஜ.க-வோடு சில விஷயங்கள் பொருந்திப்போறதுக்கு நாங்க எதுவும் பண்ண முடியாது. நாங்க யாரையும் குறிப்பிட்டு எதுவும் பண்ணல. எந்த மொழிப் படமா இருந்தாலும், எனக்குப் பிடிச்சிருந்தா பண்ணிக்கிட்டுதான் இருக்கேன். என் மெயின் மார்க்கெட் தமிழ் சினிமாதான். என்னால பண்ணமுடியாத சில ரோல்கள், இங்கே எடுக்க முடியாத சில கதைகள் இந்தியில் எடுத்துக்கிட்டிருக்காங்க. சீக்கிரமே தமிழிலும் இது மாதிரியான கதைகள், ரோல்கள் வரும்.”

. “உங்க ட்விட்டர் பதிவுகள் நேரடியாகவே ‘சித்தார்த் பா.ஜ.க-வுக்கு எதிரானவர்’ என்ற தோற்றத்தைத் தருதே?”

. “ஒரு குடிமகனா தவறாம ஓட்டு போடுறேன், வரி கட்டுறேன். இந்த ரெண்டு விஷயத்தைச் சரியா செய்றதால, எந்த அரசையும் திட்டுற அதிகாரம் எனக்கு இருக்கு. ஒரு விஷயம் பிடிக்கலைன்னா, சொல்றதுக்கு உரிமை இருக்கு. என்னைச் சுத்தியிருக்கிற அநியாயத்தைப் பார்க்கிறப்போ, ‘1924-ல் இருந்த அரசாங்கம் என்ன பண்ணுச்சு தெரியுமா’ன்னு என்னால ஆரம்பிக்க முடியாது. என் விமர்சனம் நடைமுறையில் இருக்கிற ஒண்ணு. அதனால, இப்போ இருக்கிற அரசாங்கம் மட்டுமே தப்பு பண்ணுதுன்னு அர்த்தம் கிடையாது. தவிர, நான் கடந்த ஐந்து வருடமா மட்டுமே கருத்து சொல்லிக்கிட்டு இல்லை. சின்ன வயசுல இருந்தே சொல்றேன்.

. இப்போ இருக்கிற அரசாங்கம் ‘எப்போ பார்த்தாலும் எங்களைத் திட்டிக்கிட்டே இருக்கீங்க’ன்னு சொன்னா, நாம எப்படி நடந்துக்கிறோம்னு சம்பந்தப்பட்ட அரசு யோசிக்கணும். நீங்க எவ்வளவு திட்டினாலும் நாங்க அதைக் கண்டுக்க மாட்டோம்னு இருந்தா, அது நம்ம தலைவிதி. நான் எந்தவொரு கட்சியிலும் சேர்ந்து என் கருத்தைச் சொல்லல. எனக்கு இருக்கிற கருத்துச் சுதந்திரத்தை வெச்சுச் சொல்றேன். ஒருத்தரை மட்டும்தான் நான் குறை சொல்றேன்னு சொல்றது, என் புத்திசாலித்தனத்தைத் தரக்குறைவா விமர்சிக்கிற மாதிரி இருக்கு. நான் அவ்வளவு முட்டாள் கிடையாது. ஜனநாயகத்துக்கு முக்கியமான விஷயம் எதிர்க்கட்சி. அப்படி ஒண்ணு இல்லாமப்போயிட்டா, ஆள்றவங்க கடவுள் ஆகிடுவாங்க. கடவுளைத் திட்ட முடியாதுங்கிறதால, யாருக்கும் கருத்துச் சுதந்திரம் இல்லாமப்போயிடும்.”

. “உங்களுக்கு இருந்த ‘சாக்லேட் பாய்’ இமேஜ் இப்போ உடைஞ்சிருக்குன்னு நினைக்கிறீங்களா?”

. “இந்தக் கேள்வியை இன்னும் கேட்குறீங்கன்னா, அது உடையலைன்னுதான் நினைக்கிறேன். எனக்கு நிறைய பெண் ரசிகைகள் இருக்காங்க. தாய்க்குலத்துக்கு என்னைப் பிடிச்சிருக்குன்னு நினைக்கும்போது ரொம்ப சந்தோஷமா இருக்கு. உண்மையைச் சொல்லணும்னா, ‘சாக்லேட் பாய்’ இமேஜை நான் உடைச்சிருக்கேன்னுதான் நம்புறேன். ஏன்னா, கடந்த சில வருடமா நான் ஒரு காதல் படத்துலகூட நடிக்கல. இனி காதல் படங்களில் நடிக்கவே கூடாதுன்னு முடிவு செஞ்ச நான், சமீபத்துல ஒரு காதல் படத்துல நடிச்சுட்டேன். இந்தப் படத்துக்குப் பிறகு திரும்பவும் ‘சாக்லேட் பாய்’ இமேஜ் வந்தா, எனக்கு என்ன பண்றதுன்னு தெரியாது. மத்தபடி, என்னை யாராவது ‘சாக்லேட் பாய்’னு சொல்றப்போ கூச்சமாதான் இருக்கு.”

“சாக்லேட் பாய் என்றால் கூச்சம்!”

சனா