Published:Updated:

``வேண்டாம்னு கமல் வருத்தப்பட்டார்; 'கோமாளி'ல ரஜினி காட்சியை நீக்கிட்டோம்!'' - ஐசரி கணேஷ்

தார்மிக் லீ
எம்.குணா

ஜெயம் ரவி நடிப்பில் பிரதீப் ரங்கநாதன் இயக்கத்தில் வரும் ஆகஸ்ட் 15-ம் தேதி வெளியாக இருக்கும் படம், 'கோமாளி'. காஜல் அகர்வால், சம்யுக்தா ஹெக்டே, யோகி பாபு, கே.எஸ்.ரவிகுமார் போன்ற பல நட்சத்திர பட்டாளம், இப்படத்தில் நடிக்கின்றனர்.

Jayam Ravi
Jayam Ravi ( Comali )

'ஹிப்ஹாப்' ஆதி இசையமைத்திருக்கும் இப்படத்தின் டிரெய்லர், நேற்று வெளியானது. 16 வருடங்களாகக் கோமாவில் இருந்த ஜெயம் ரவி, 2016-ல் விழிப்பதுபோல் டிரெய்லர் தொடங்கும். சமூகத்தின் சமகால விஷயங்களைக் கிண்டல் செய்யும் விதமாக டிரெய்லரின் சில காட்சிகள் இடம்பெற்றிருந்தன.

Rajinikanth
Rajinikanth

அதுமட்டுமன்றி, டிரெய்லரின் இறுதிக்காட்சியில், கோமாவிலிருந்து 16 வருடங்கள் கழித்து கண்விழிக்கும் ஜெயம் ரவி, ``இது எந்த வருஷம்?'' என யோகி பாபுவிடம் கேட்க, அவர் 2016 எனச் சொல்லியும் ஜெயம் ரவி நம்ப மாட்டார். அந்தச் சமயத்தில், ``நான் அரசியலுக்கு வருவது உறுதி'' என ரஜினிகாந்த் பேசுவதை ஜெயம் ரவிக்கு டிவியில் போட்டுக்காட்டுவார், யோகி பாபு. ``ஏய்... இது 96. யாரை ஏமாத்துறீங்க?'' என்று கேட்பார் ஜெயம் ரவி. குறிப்பிட்ட இந்தக் காட்சி, ரஜினியின் அரசியல் வருகையை கிண்டல் செய்யும் விதமாக இருப்பதால், அதை நீக்கும்படி சமூகவலைதளங்களில் பொங்கி எழுந்தனர் ரஜினி ரசிகர்கள். இதைத் தொடர்ந்து கமல்ஹாசன், ஐசரி கணேசனை போனில் அழைத்து வருத்தம் தெரிவித்ததாகவும் தகவல்கள் வெளியாயின.

இந்நிலையில் படத்தின் தயாரிப்பாளரான ஐசரி கணேசனிடம் பேசினோம். அவர், ``படத்துடைய டிரெய்லரில், அந்த விஷயத்தைப் பார்த்தப்போ நாங்க அதைத் தப்பாவே நினைக்கலை. எல்லோரும் ரசிக்கும்படியான காமெடி காட்சியாதான் இருக்கும்னு நினைச்சோம். இப்போ வரைக்கும், கிட்டத்தட்ட 40 லட்சம் பேர் அந்த டிரெய்லரைப் பார்த்திருக்காங்க. நிறைய பேர் ரசிச்சுருக்காங்க. அதுல குறிப்பிட்ட சில மக்களுக்கு மட்டும் அந்தக் காட்சியில உடன்பாடு இல்லைங்கிறது ட்விட்டரைப் பார்த்ததும் தெரிய வந்தது.

இதைத் தொடர்ந்து கமல்ஹாசன் சார் என்னைப் போனில் அழைத்து, 'அது வேண்டாம் கணேஷ்'னு சொல்லி வருத்தப்பட்டார். நானும் அவர்கிட்ட வருத்தப்பட்டுப் பேசினேன். உடனடியா இன்னைக்கே அந்தக் காட்சியைப் படத்துல இருந்து நீக்கிட்டோம். முதல்ல நானே ரஜினி சாருடைய தீவிர ரசிகன். அவர் நடிப்புல வெளிவந்த '2.0' படத்துலகூட நான் நடிச்சிருக்கேன். சிலர் தப்பா நினைக்கிறதால, படத்துல அந்தக் காட்சி கண்டிப்பா இருக்காது" என அந்தச் சர்ச்சை குறித்து விளக்கமளித்தார் தயாரிப்பாளர் ஐசரி கணேஷ்.